Баабылла таптала

2

Баабылла " Москвич " массыынаны матасыкылынан кэннилэриттэн эккирэттэ. Сайылык диэки баран иһэн туора салайан, өрүс диэки бардылар. Тыа быыһыгар массыына тохтоото. Баабылла матасыкылын умулларан сатыы барда. Уоскуйаары олорбохтуу түһэн баран чугаһаата. Арай көрбүтэ Хаабый Шураны тиэрэ баттаабыт. Биирэ сарылыыр, төлө мөхсө сатыыр. " Ыыт миигин! Мин Павлигы таптыыбын! Мин киниэхэ эрэ аналлаахпын! " - диир. Баабылла кинини этэрин биллэ. Оҕо төбөтүн саҕа таас сытарын харбаан ылан, сүүрэн тиийэн Шураны күүһүлээри баттаан сытар Хаабыйы, тааһынан кэтэххэ сырбаталаата. Өҥүргэһинэн көрөн тиэрэ барбытыгар, эбиитин сүүскэ уоптартаата. Өссө да үлүһүйэн барыаҕын Шура тохтотто.
Хаабый төбөтө үттү сынньыллан, хаан билик буолан сытар.
Шура “Өлөрбүккүн дии! “- диэн айманна.

Баабылла уһуктан кэлбитэ сүрэҕэ өлөхсүйэн , биллигирэччи тэппит.
Шуратын Хаабый илдьэ барбытын кэннэ дьиэтигэр киирэн ону - маны саныы сытан утуйбут. Устунан кинилэри түһээбит.
" Кырдьык түүлүм курдук дьиҥнээхтии кэннилэриттэн эккирэтэн барбакка. Ол эрээри Шура " Мин Павлигы таптыыбын! " - диирэ саарбах соҕус - дии санаата Баабылла.

Шура дьиҥэр Павлигы сөбүлүүр. Ол эрээри таһыгар биллэрбэт. Таансылыы сылдьан холуочуйан баран, күлүөс бүрүүкэтиттэн иҥнэн охтон уонна , оруобуна муусука арахсарыгар " Суураа…үҥкүүлүөх.. чыычаах " диэбититтэн кыбыстыбыта аҕай. Эмиэ да Павлигы аһына санаабыта. Кэнники аны матасыкылтан охторбута. Онтон Павлигы “кэһэтэ” таарыйа Хаабыйы кытта барсыбыта.
Хаабый Павлик курдук кинини кытта ньэҥкэлэспэтэҕэ. Таптал мүөттээх тыллара да суохтар. Тиэрэ баттыыр эрэ санаалааҕа. Бүтэһигэр Шура нэһиилэ мүччү туттаран, сатыы куотан кэлбитэ.

Шура Павлик кэлэрин күүппүтэ да уол биллибэтэҕэ. Үнүр Хаабый массыынатыгар олордоҕуна Павлик " баҕар Шура тахсыа " диэбиттии эргиллэн көрөрө. Бу санаатаҕына уолга ыарахан эбитэ дуу. Бэйэтигэр итинник сыһыаннаһаллара буоллар хайыа эбитэ буолла.
Бэҕэһээ Лүүсэ кыыс " эн сураҕа Хаабыйдыын сылдьаҕын үһү дуо? Оччоҕо Павлик ? " - диэн ыйыппытыгар өмүттэн саҥарбатаҕа. Павликтаах Лүүсэ киниэхэ көрдөрбүтүнэн, матасыкылынан баран хааллахтарына хайыа эбитэ буолла. Лүүсэ обургу кини курдук ырааҕынан эргитэн күнүүлэппитэ буолан, тапталларын күүһүрдэ сатыа суоҕа. Малтаччы тыллаах - өстөөх. Павлигын туура эрийэн ылыа да бүтүүтэ - Шура үөһэ тыынар.

Бүгүн Баабылла дьону кытта, куобах күрэтиһэ барсар буолла.
Икки уостаах саатын ылан барыста.
Арай көрбүтэ кэнники Хаабый кэлбит. Сураҕа кинини саанар сурахтааҕа. " Ол мин кинини хайаабыппар эбитэ буолла? Ама түүлүм кырдьык буолуо

дуо? Шура Хаабыйга :- " мин Павлигы таптыыбын " диэбитэ буолуо дуо? - уолга эҥин араас санаалар киирэллэр. Куобахчыттар тараахтаан хааман, үөгүлэһэн күрэтэ киирэн иһэллэр. Саатар кини аттыгар Хаабый сылдьар. " Ама түүлүм кырдьык буолуо дуо? " - хараҕар хаан - билик буолбут Хаабый көстөн ылла.

(Салгыыта бэчээттэниэ)

Ородьумаан

06.04.2026.