(Сүрэх кистэлэҥэ)

Мин билигин сааһым 21-рим. Дьокуускай куоракка үрдүк үөрэххэ үөрэнэбин. Урут эһиги хаһыаккытыгар “Сүрэх кистэлэҥин” ааҕаммын сороҕор, соччо суолтата суох дуу дии санааччыбын. Ол эрээри, сыыспыт эбиппин. Киһиэхэ тус бэйэтигэр ыган кэллэҕинэ, кимиэхэ эрэ кэпсээҥҥин, суруйаҥҥын дууһаҥ чэпчиир эбит.
Мин эмиэ атын оҕолор курдук улаатан, оскуоланы бүтэрэн, студент буолар чиэскэ тиксибитим. Наһаа да үөрбүтүм, миигиттэн дьоллоох киһи суоҕа. Ол курдук эдэр баҕайы оҕолор, үрдүк үөрэххэ киирэн 1996 сыллаахха муҥутуур Москва куоракка үөрэнэ барбыппыт.

Тиийээт, дьүөгэлэрбин кытта дьиэ куортамнаан олорорго санаммыппыт. Ити кэмтэн ыла студент көрдөөх-нардаах олоҕо саҕаламмыта. Биир күн бииргэ олорор кыргыттарбар оскуолатааҕы доҕотторо, табаарыстара күүлэйдии кэлбиттэрэ. Бары даҕаны эдэр дьон элбэх саҥалаах-иҥэлээх, бэһиэлэй этилэр. Аан бастаан, доҕорбун — Коляны көрөн баран атын уолаттартан туох да уратыта суох курдук көрбүтүм. Ол эрэн кэлин үчүгэйдик билэн барбытым кини, доҕотторуттан саамай аһыныгас санаалаахтара, эппит тылын толорооччулара этэ. Дьэ хардары-таары күүлэйдэһэн, бырааһынньыктары бииргэ атаарар буолбуппут. Үс ый ааспыта. Мин наһаа атаах, ыал кыра оҕото буоламмын, дьиэбин, дьоммун ахтарым, ытыырым.

Арай биирдэ үөрэхпэр барбаккабын эрэ таҥаспын хомунаат, табаарыстарбар сурук хаалларан баран дойдулуур санаам күүһэ бэрдиттэн аэровокзалга киирбитим. Дьокуускайдыыр билиэт ылан баран, рейспин хаһан биллэрэллэрин кэтээн олордохпуна, хантан да баар буолбута биллибэккэ иннибэр Коля кэлэн мичээрдии турара. Кэлэн миигин наһаа өр ааттаһан үөрэхпин салгыырбар, хааларбар көрдөспүтэ.

Дьэ ол кэнниттэн биһиги иккиэн олус истиҥ доҕордоһуубут саҕаламмыта. Бастаан көннөрү табаарыстыы этибит. Онтон улам-улам бэйэбитигэр ылларан, ээр-сэмээр ахтыһар буолбуппут. Кини миигинэ суох сатаммата. Мин эмиэ суохтуурум күүһүрбүтэ. Хас киэһэ аайы Москва куорат биир уһугуттан, олорор сириттэн миэхэ куорат биир түгэҕэр кэлэн барааччы. Өссө үөрэҕин таһынан “Макдональска” үлэлиир, харчылаһар этэ.

Кыһын биһиги маҥнайгы хаар түһэрин өр да өр кэтэспиппит. Дойдубутун куруук санаан, ахтан ааһааччыбыт. Билигин санаатахпына, ол саамай дьоллоох күннэрбит эбит.

Билигин мин соҕотохпун. Колям миигиттэн ыраах да ыраах барбыта… Хойутаан баран билбитим мин кинини таптаабыт эбиппин. Кини баҕар миигин быраҕан атын кыыска барбыта буоллар, ытыы түһэн баран, дьоллоохтук олордун эрэ дии саныам этэ. Ону баара аны хаһан даҕаны эргийбэт…

Москва куорат туһунан истиэхпин, көрүөхпүн даҕаны баҕарбаппын. Кини мин тапталбын миигиттэн былдьаабыта. Сессиябын эрдэ туттаран, Колябын Москваҕа хаалларан, сотору кэминэн көрсүһүөх буолан дойдубар кэлбитим. Кэлиэхтээх рейсигэр көрсө диэн аэропортка киирбитим. Кини тоҕо эрэ суох этэ. Онтон… Кэлин хоруопка угуллан кэлбитэ.

Ытаан да ытаабат буоллум. Сарсыарда Коляны санаабытынан турабын, киэһэ санаабытынан утуйабын. Түүн буоларын күнү быһа кэтэһэн тахсабын, саатар түүлбэр көстөн ааһыа диэн.

Туох буруйум, айыым-харам иһин айыы таҥара миигин ыараханнык накаастаата. Мин саҥа олоҕу олорон эрэр эдэр киһини. Эдэр дьоҥҥо этиэм этэ: биһиги бу орто дойдуга кэлбит бука бары дьон инникибитин тымтыктанан көрбөппүт. Кими төһө өр олордорун биһигиттэн ыйыппат. Онон хас биирдии киһи хаһан да кыыһырсыбакка, кыраны улахаҥҥа уурбакка, сүбэлэһэн, үөрэ-көтө олоруҥ. Хас күн аайы бэйэ-бэйэҕитигэр тапталга билиниҥ. Бэйэ-бэйэҕитин харыстаһыҥ.
Оттон мин тапталлаахпар Колябар элбэҕи да эппэтэх эбиппин.

Кыраһа.
Дьокуускай.