Аудиота:

Содержание

• 1 чааһа
• 2 чааһа

1 чааһа

Айдаар уута кэлибинэ, хаста да уһукта-уһукта эрэйдэннэ. Үһүстээн оннук уһуктубутун кэннэ, куукунаҕа баран чэй иһэргэ сананна. Аргыый аҕай, бииргэ олорор уолаттарын уһугуннарымаары, Айдаар куукунаҕа барда. Уол итии чэйи куттан, түннүк таһыгар туран, түүҥҥү куораты көрө-көрө чэйин иһэ-иһэ өрө тыынна. Кини уута кэлбэт төрүөтэ, куттанарыттан этэ. Уолу улахан буруйга буруйдаан, хаста да милииссийэҕэ ыҥыра сылдьыбыттара. Сотору кэминэн хаайыы киһитэ буолуохтаах. Буруйугар Айдаар билинэрэ. Билигин аны тугу да уларытар кыаҕа суоҕа.
Барыта икки ый анараа өттүгэр саҕаламмыта. Айдаар, университет иккис кууруһун устудьуона, сессияҕа бэлэмнэнэ олордоҕуна, эмискэ доҕоро эрийбитэ:

• Привет… Өйдүүгүн, хаһан эрэ харчыга наадыйабын диир этиҥ дии… - диэн Витя сэргэх куолаһынан эппитэ
• Өйдүүбүн, билигин да үлэ көрдөнөбүн
• Мин эйиэхэ биир үчүгэй баҕайы этиилээхпин. Харчы бөҕөтө төлөнөр үлэни билэбин, бэйэм эмиэ онно үлэлиибин , наада буоллаҕына тойонум нүөмэрин ыытыам - диэбитэ
• Хата, ыытаар. Олус наадыйабын үлэҕэ - диэн Айдаар сонно сөбүлэспитэ. Кырдьык да харчы киниэхэ олус диэн наадата. Үһүс сылын аччаан хаалбыт бачыыҥкалаах сылдьара, кууркатын туһунан этэ да барыллыбат. Аһыгар харчыта суох буолан, бииргэ олорор уолаттарыттан бэрсиһиннэрэн аһаан-сиэн олороро. Айдаар, Витя ыыппыт нүөмэригэр эрийэн , көрсүһүүгэ барбыта. Эппит аадырыстарыгар тиийбитэ, кинини орто саастаах, эр киһи көрсүбүтэ. Ильдар диэн ааттаммыта. Ильдар уолга барытын быһааран биэрбитэ. Айдаар, ити киһи кэпсээниттэн, наркотигы эргитэрин билбитэ. Бастаан аккаастаары гынан баран, кыра балтыларын санаат сөбүлэспитэ. “Уонна мин бэйэм оҥорбот буоллаам дии, дьоҥҥо тиксэрэбин эрэ” дии санаабыта.
  “Үлэтин” бастакы нэдиэлэтэ бэркэ табыллыбыта. Иккитэ баран, пааркаҕа Ильдар эппит сиригэр хара бакыаты уурбутун кэннэ, киэһэтигэр каартатыгар икки сүүс тыһыынча түспүтэ. Ол харчынан уол нөҥүө күнүгэр, саҥа таҥас-сап ылыммыта, уолаттарын рестораҥҥа ыҥыран бэйэтин үбүгэр босхо аһаппыта. Ордубут харчытыттан ийэтигэр ыыппыта.

Айдаар, элбэх оҕолоох ыалга бастакы ,соҕотох уол этэ. Кини кэнниттэн өссө биэс кыра кыыс баара. Айдаар кыра сааһыттан үлэҕэ сыстан улааппыта. Алта саастааҕар аҕата суол саахалыгар түбэһэн өлөн хаалан, дьиэтээҕи үлэ барыта кыракый уол санныгар түспүтэ. Оскуолаҕа үөрэнэ сылдьан, Айдаар эһэтин кытта куска, балыкка сылдьара. Эһэлээх эбэтэ сиэннэрин булчут буолсу дииллэрэ. Айдаары өссө элбэххэ үөрэтиэхтээх эһэтэ, эмиэ аҕыйах сылынан өлөн хаалбыта. Ол иһин уол дьиэ кэргэнигэр соҕотох эр киһи буолбута. Оскуоланы бүтэрэн баран,

сонно университетка туттарсан үөрэнэ барбыта. Үөрэҕин бүтэрэн, үлэһит киһи буолан дьонун хааччыйыах баҕа санаалааҕа да, аны ол баҕа санаата туолбат буолбута.

2 чааһа

Айдаар бэйэтин сыыһатыттан тутуллубута. Билигин ону саныы-саныы олус кэмсинэрэ. “Баҕар атыннык гыммытым буолла, итинниккэ тиийиэм суох этэ” дии саныыра да, онтон аны туһа суоҕа.
Ол күн уол эмиэ сакааһы уура барбыта. Ильдар аадыраһы, ханна уурарын барытын ыыппыта. Барыта уруккутун курдук этэ, милииссийэ күүтэн турарыгар туох да туоһу суоҕа.
Айдаар этиллибит сиргэ тиийэн баран, ыскамыйа анныгар пакыаты иилбитэ. Эмискэ иилбитэ сууллан түһэн, төттөрү скотч хостоноот хаттаан иилэргэ тиийбитэ. Оннук түбүгүрэ сыттаҕына, оруобуна милииссийэ үлэһитэ ааһан иһэн, олус дьиктитик туттар уолу, тутан ылбыта. Айдаар “Пааркаҕа күүлэйдии сылдьыбытым” диэн албынныы сатаабыта да, милииссийэниэр итэҕэйбэтэҕэ. Пакыакка туох баарын ыйыта да барбакка сонно хаһаат, милииссийэниэр наркотигы булан ылбыта. Уолу учаастакка илдьээт, үс сууккаҕа хаайбыттара. Ол кэннэ, өссө дьыала быһаарыллыар диэри “Под невыездом” ыыппыттара. Сотору эмиэ ыҥырар буолуохтаахтар.
Айдаар бэйэтин быһыытыттан кэлэйэн, дьонугар өссө да ханна түбэспитин кэпсии илигэ. Уол хараҕын саптаан ахсын, утары ийэтэ барахсан ытыы олороро көстөрө. Ол ону тулуйар кыаҕа суох буолан, уһуктан иһэрэ.
Нэдиэлэ курдугунан, Айдаар суута буолбута. Милииссийэниэрдэр киниэхэ утары дакаастабыл бөҕөтүн булбут эбиттэр. Уол санаатыгар Ильдар кинини көмүскэһиэ, быыһаан ылыа диирэ да, Ильдар Айдаары туппуттарын билэн, куораттан номнуо күрэммитэ. Кини элбэх итинник Айдаар курдук эдэр уолаттары уган биэрбитэ, ол иһин Айдаарга наадыйбата даҕаны.
Суут , Айдаары “За распространение наркотиков” диэн ыстатыйаннан сүүрбэ биэс сыл хаайыыга олороругар уураахтаабыта. Айдаар ийэтэ, Агафья Васильевна, уола хаайыыга түбэспитин атын дьонтон билбитэ. Уола оннукка тиийбитин билэн, ийэ сүрэҕэ төһөлөөҕүн ыалдьыбыт, аһыйбыт буолуой. Соҕотох уола, эрэлэ, дьиэ кэргэн баар суох эр киһитэ Айдаар, харчы эрэ туһуттан сокуону кэһэн, хаайыы киһитэ буолбута. Уол хаайыыга олорон, көҥүлгэ тахсар күнүн ааҕара , таҕыстаҕына саҥа олоҕу саҕалыах санаалааҕа

Бүттэ
Халыма