эдэр дьахтар     Туох диэхпиний, сааһым 37-м. Номнуо – 37-м. Эдэр сааһым «пакаа-пакаа» диэн сэлээрчэх баҕайытык илиитинэн сапсыйат, миигиттэн икки атаҕынан куоттаҕа. Дьиҥинэн, тас көрүҥмүнэн эдэрбин ээ, ким да миэхэ 37 сааһы биэрбэт. 44-с размер таҥаһы кэтэбин. Өскөтүн эт саастыылаахтарым сыанан бырдьайа сылдьар целлюлиттарын кистээн, кыһыннары-сайыннары бүрүүкэ иилинэр эбит буоллахтарына, мин кылгас дьууппанан аа-дьуо дьаарбайабын, сайынын кыыс оҕолуу көнө бүгүүрэбин көрдөрө таарыйа күн сыралҕаныгар төһө баҕарар сытабын. Таҥастаах (холобура, джинсылаах) турдахпына, дыраччы улаатан эрэр уол оҕону санатабын. Оттон таҥаспын ньылбы уһуллахпына, атын теткалар курдук мэлдьи тиритэн көлөһүн аллар сыа буолбут түөс оннугар тэрбэччи көрө сылдьар кыракый бөкүнүктэр. «Холмики» диэн мин кинилэри таптаан ааттыыбын. Бюстгальтеры аатыгар эрэ кэтэбин, кэтимиэхпин да сөп этэ. Урут ийэм, тааһыҥ кыра, хайдах оҕолоноохтууруҥ буолла диэн санаарҕаатаҕына, өрө тыбыыра түһэрим. «Мин оҕоҕо баттатар санаам суох! Атыттар баҕаларын хоту ытанньах оҕолорун сыыҥтарын соттуннар, оттон мин… мин туһам туспа!» - диирим. Ол санаам туоллаҕа, кырдьык, мин туһум туспа, бэйэм бэйэбэр хаһаайкабын. Ки-им да миэхэ наадата суоҕун кэриэтэ. Холодильник муҥунан ас, ыскаап хайдарынан таҥас, шкатулка – тобус-толору – сыаналаах киэргэл, дьиэ-уот, массыына – барыта баар. Харчы счеппар сүүрүктээх үрэх уутун курдук кутулла турар. Арай… оҕом суох. Ол иһин олоҕум олус чуҥкук, ис хоһооно суох курдук. Ону кэлин биирдэ өйдөөтүм. Арай пыытикаайык оҕолоох буолуум… Уол эбитэ буоллар, Тимир диэн ааттыам этэ, оттон кыыска Нарыйа диэн аат наһаа барар. Ити санаа кэлин миигин аалан да биэрэр. Суох-суох, кэргэн тахсар, хабалаҕа тиксэр туһунан этэ да барыллыбат. Баҕам биир: суопсунас оҕо. Ол эрээри оҕо салгынтан үөскээбэт, ол аата оҕо оҥорор киһини була охсуохха наада. Бойфреннарым мин туспар кэччэгэйдэр, саараама, тыыннаах сиэмэлэрин миэхэ куппаттар, хармааннарын муҥунан презерватив укта сыльаллар. Наадалаах этилэр. Ааспыкка, тулуйбакка, биир табаарыспар, давай, резинката суох таптаһыахха диэбиппэр, «Мариночка-а, бу презерватив латекса тириитээҕэр чараас, олох мэһэйдэтиэҥ суоҕа», - диэн кулгаахпар аҕылаабыта. Туһалаах этэ кини аҕылыыра!
Ол эрээри бириэмэ ыксатар, «түргэтээ» диир. Дьэ ол иһин хараҕым далыгар киирбит эр киһини барытын Объект курдук көрөбүн. Бэл диэтэр, боччумнаах мунньахтарга олорон, кэпсэтииттэн туораан, эр дьону биир-биир барсыа эбитэ дуу суох дуу диэн харахпынан сыымайдыыбын. Дьэ, иэдээн!
Оттон бу аҕыйах хонуктааҕыта сабыс-саҥа Тойота Камрибын дьиэм таһыгар туруордум, ып-ыраас, кылабычыйа сылдьар массыынабыттан таҕыстым. Цок-цок, шпилькаларбынан сэрэнэн үктэтэлээн подъеһым диэки хааман истим. Түргэтиэхпин, тобукпунан сылдьар кыараҕас дьууппам хаамарбар мэһэйдиир, онон кыра-кыра хардыылары сэрэнэн оҥортолуубун. Ким эрэ миигин одуулуур курдук. Сэрэйбит сэрэх – нүөмэрэ да көстүбэт буолуор дылы бадарааҥҥа булкуллубут джиптэн бейсболкалаах уол ойон таҕыста. Уол да буолуо дуо, - эр киһи. Мин саастыыта. Мин кинини билэбин, Федя диэн ааттаах. Кип-киэҥ харахтаах, тоҥсоҕор муруннаах – сахаҕа соччо маарыннаабат. Ол эрээри саха.
- Привет, - диир. Харахтара уоттанан түһэн тугун сүрдэрэй, хайдах эрэ адьаһын долгуйан бардым. Ол иһин төһө кыалларынан ээл-дээл куоласпынан:
- А-а, привет, — диэтим. Туох диэхпиний уонна? Биир илиибэр тирии бартыбыалбын тутан турабын. Онтукам тобус-толору кумааҕы, бу күннэргэ барытын бэрийиэххэ, үөрэтиэххэ наада, — туох иһин финансиспыный? Уонна төһө да сүрэҕэлдьээтэрбин, ити кумааҕыларым, табылыннаҕына, харчыга кубулуйуохтара сыттаҕа. Ыарахан бартыбыал санныбын баттыыр, салгыы маннык турар табыгаһа суох буолсу. Эргиллэ биэрээт, подъеһым диэки хаамыахпын, сосед тохтотор. Кини мин диэки кип-киэҥ харахтарынан от ыйынааҕы ыраас халлаан курдук аһаҕастык көрөр, тыла да оннук, көнөтүнэн буолан биэрдэ:
- Киэһэ эрийиэм. Утарбат инигин?
- Боруобалаан көр, - тугун түргэнэй диэн сонньуйа санаатым. Аһаҕастык эттэххэ, мин испэр кинини… мыынабын. Баара-суоҕа көстүрүүлкэлэри атыылыыр. Ол иһин мин киниэхэ Кастрюлькин диэн хос аат биэрбитим. Уол обургута аҥаардас ити дьарыгынан, туох да үөрэҕэ суох бэйэтэ аҕыйах сыл иһигэр атаҕар турда. Дьокуускайга хас да эргиэн точкалардаах, биир дойдулаахтарынан малларын атыылаттарар, бэйэтэ кэтиир, саҥа табаардары сакаастыыр. Быһатын эттэххэ, иһити-хомуоһу батарыыга ураты дьоҕурдаах. Онтон атыҥҥа хайдаҕа эбитэ буолла? Биллэ-э суох…
Киэһэ дьиэбэр телефон тыаһа сатарыйда. Сосед эрийэр. Көрсөбүт дуо, диир. Онуоха мин, ты что, үлэлии олоробун диэн куотуннум. Киһим,

өйдөөбөтөх курдук: «Үлэлии даа? Оттон үлэ чааһа бүппүтэ дии!» - диэн соһуйбута буолла, бэрди, кини көстүрүлүүлэрин атыылаан бүттэҕэ. Үлэлиэх киһини сатана уола ыһан кэбистэ. Кумааҕыларбын сымыйанан бэрийбитэ буола түһэн баран, туһа тахсыа суоҕун өйдөөммүн, аккаастанным. Ноутбукпун «лип» гына сабаат, кыратык кыһыл арыгы куттан истим, онтон биэс тыһыынча доллардаах ороммор туора түһэн сыттым. Уонна санаатым… таах сибиэ Кастрюлькиҥҥа аккаастаатым дуу, диэн. Ытыс муҥунан баһыллыбыт кураанах кумах тарбахтар быыстарынан тохтон симэлийэллэринии, бириэмэ түргэнник да түргэнник элээрэн иһэр ээ… Утуйар эмп истим.

    Аҕыйах хонук буолаат сосед эмиэ эрийдэ. Чугастык билэр киһитигэр курдук:
- Хайа, Марина, тугу гынаҕын? – диэн сураста. Ити түгэҥҥэ мин куйааһа бэрдиттэн, аҥаардас ис эрэ таҥастаах диваҥҥа сурунаал көрүтэлии сыппытым.
- Интернеккэ олоробун, - диэн албыннаатым.
- Интернеккэ, да-а? Пахай, ол дьыаланы бырах, лучше миэхэ кэл! 29 кыбартыыра! – диэт, туруупканы бырахта. Арааһа душтана ойдоҕо.
    Мин сымыйанан аахпыта буола түһэн баран, сурунаалбын киэр гынным, ол оннугар толкуйдаатым: кини да эр киһи, төһө да Кастрюлькин буоллар. Суох, дьиэбэр кыайан тулуйуо-тэһийиэ суохпун. Чараас дьууппа, булууһа кэтээт, таһырдьа таҕыстым. Федя иккис подъезка олорор. 29 кыбартыыраҕа звоноктаатым. Аан аһылынна. Федя миигин көрөн ымайда. Буолумуна. Куукунаҕа аһарда. Остуолга оҕуруот аһыттан салаат, сакалаат уонна кыһыл арыгы тураллар. Музыка холбоото. Адьас ловелас быһыылаах, туттара-хаптара оннук көрүҥнээх диэн уорбалаатым. Федя иккис кэргэниттэн арахсыаҕыттан соҕотоҕун олорор. Төһө эрэ күннээн эрдэҕэ. Биир өттүнэн ол миэхэ төрүт да сыһыана суох диэн бэйэбин уоскутуна сатаатым. Үрүүмкэлээх арыгыны, аһары ньиэрбинэйдээбиппиттэн быһыылаах, түһэрэн кэбистим. Бэйэм да кыбыһынным. Киһим: «У-ух, ты!» – диэбит курдук көрөн ылла уонна өссө толордо. Мин, түксү диэн, тохтото сатаабыппын, истэ да барбата. Илиибэр биилкэ туттарда. Сымыыт буһарабын дуо диэн ыйыппытыгар: «Суох, түбүгүрүмэ», - диэн тохтоттум. Мин киниэхэ сымыыт сии киирбэтэҕим. Эмиэ бэйэ бэйэбитин көрсөн баран олордубут. Арааһа чечен хааннаах быһыылаах. Хойуу кыламан быыһыгар саспыт харахтарын уотуттан букатын ууллуох курдукпун. Дьэ, үрүүмкэлэрбитин охсуһуннардыбыт. Эмиэ биир тыынынан иһэн кэбиспиппин бэйэм да өйдөөбөккө хааллым. Хайыыр да кыах суох, кураанах үрүүмкэни остуолга уурдум. Киһим улгум баҕайытык толорон биэрдэ, кистээн иһэр дьахтар эбит диэтэҕэ. Мин синим биир буолла. Таах олоруохтааҕар, айахпар оҕурсу уктум. Ыстыы олорон, хайыахпыный, эмиэ киһибин одуулуубун. Кини да хараҕын миигиттэн араарбат. Тугу саныыра буолла, сатана уола? Этэн бэрт. Мин буоллар, көрдөхпүнэ, арай киһим илиитигэр сүүнэ улахан татуировкалаах эбит.
- Тугуй бу? – диэн ыйытабын уонна татуировкатын диэки ыйабын.
- Бу, да? Ээ, Кытайга сылдьан, оҥотторбутум. Уон тыһыынчаҕа биһиги харчыбытынан, - диэт, футболкатын илиитин өрө таһаарда. Туох эрэ олус уустук уруһуйдаммыт. Моҕой дуу, хахай дуу, бэйэм да быһаарбатым. Онтон киһим үөйбэтэх-ахтыбатах өттүбүттэн быһыыланан турда, футболкатын төрүт да устан кэбистэ уонна көхсүнэн эргиллэ биэрдэ – бүтүннүүтэ уруһуй! Тыыным хаайтара сыста.
- Ты-ый! – диэн саҥа аалайдым, туох да атыны этэрим суох буолан.
- Аныгыскы сырыыга өссө түөспэр оҥотторуом, - соседым киһиргээн барда.
- Оччоҕуна, өлүөххэр диэри татуировкалаах сылдьаҕын дуо? – ак-каары, толоостук да ыйыттым!
- Ха-ха! Өлүөххэр диэри! Дьэ, суох, разнообразиены сөбүлүүр уолбун. Алта ыйынан бу сүтүө, оччоҕуна саҥаны уруһуйдатыам! Хата, киирэҥҥин көрөөр! – диэтэ уонна күлэн күһүгүрээтэ.
Футболкатын кэтэр санаата суох. Көрдөхпүнэ, этэ-сиинэ кытаанаҕа сүрдээх, арааһа, спортзалга дьарыктанар быһыылаах. Ити туһунан ыйыта барбатым, аны бицепстарын-трицепстарын көрдөрөөрү хаайыа дии! Онон ньимийдим. Федя мин сирэйбин-харахпын рентген снимогын үөрэтэр курдук одуулуур, тугу эрэ толкуйдуур. Арааһа, эрэйдээх фригиднэй диэтэҕэ. Мин буоллар ууну оборбут кутуйах курдук бүгэн олордум. Федя тоҕо эрэ музыканы тохтотто, ол оннугар телевизоры холбоото. Муз-ТВ көстөр. Турууссуктаах кыргыттар биир-биир элэҥнэһэллэр. Хараҕым кырыытынан уоран Федяны кылап гынан көрдүм. Киһим астыммыта бэрдиттэн харахтара букатын да чаалыйан хаалбыттар. Онтон Жанна Фриске клибэ саҕаланна. Киһим иһиттэ эрэ истибэтэ, ойон турда уонна ыллаһа-ыллаһа үҥкүүлээбитинэн барда. Өссө миигин туруорда. Хайыахпыный, биир сиргэ сымыйанан тэпсэҥнээбитэ буоллум. Клип бүппүтүн кэннэ, аттыгар олорто, эбиитин кууһан ылла. Мин хапкааҥҥа түбэспит кыыл курдук сананным. Киһим буоллар кэпсии олордо:

- Мин Жанна Фрискени наһаа сөбүлүүбүн.

- Хайдах ол аата? 
- Оттон, она такая мощная, сексуальная, э-эх! - диэт, миигин уураан барда. Арааһа, хараҕар Жанна Фриске элэҥниирэ буолуо. Нэһиилэ босхолоннум ээ! 
- Тохтоо эрэ! Туалетка барыым, - диэтим уонна итинэн албастанан, аан диэки харбыаластым. Киһим ыытымаары бөҕө. Көрүдүөргэ уһуннук да мучумааннастыбыт.
- Иккиэн көҥүл дьоммут буотта, тоҕо ыксыыгын? – диэн ыкта.
- Суох-суох, бардым, дьыалам элбэх! – диэн балтайдаатым.

Федя, икки илиитин истиэнэҕэ анньан, миигин хаайан турда.
- Расслабись гыныахха. Туох ааттаах кытааттыҥ, оскуола оҕотугар дылы? Мариночка-а, дава-ай, - Федя биир илиитэ аллара түһэн буор босхо күүлэйдээн барда.
Мин нэһиилэ мүлчү туттаран таһырдьаны буллум. Түргэн-түргэнник шпилькаларбынан цок-цок, хааман истэхпинэ «Мин Жанна Фрискени наһа-аа сөбүлүүбүн» диир саҥа кулгаахпыттан арахпата.
Квартирабар үктэнээт, ньылбы душтанным, онтон телевизорынан Николас Кейдж оонньуур киинэтин көрдүм. Уонна утуйдум. Сарсыҥҥытыгар сосед эмиэ эрийдэ, албыннаспыт куолаһынан:
- Мариночка-а, хайдаххыный? – диэн сураста.
- Спасибо, барыта үчүгэй, - тимир-тамыр куоласпынан хоруйдаатым. Киһим ону өйдөөбөтөх курдук:
- Оччоҕуна бүгүн киэһэ ханна эмэ барабыт дуо, холобура, рестораҥҥа? – диэн албыннаста.
- Суох.
- Тоҕо-о?
- Тоҕо диэтэргин мин Николас Кейджы таптаатым.
- Ол аата хайдах?
- Ол аата дуо? Ол аата кини наһаа мощнай, сексуальнай. Өйдөөтүҥ? – инньэ диэт, телефон туруупкатын уйатыгар «лип» гына бырахтым. Телефонум муҥнаах итиччэ халы-мааргы хамсаныыттан, бэл диэтэр, байааттаҥнаан ылла. Оттон мин… мин умса түһэммин ытаатым. Ким да мин ытыырбын көрүө суохтаах.

Даана Сард.

БЭЧЭЭТТИИРГЭ АНААН КӨРҮҮ