Содержание

• Манна баарга үөрүөххэ.
• Оһоҕум барахсан.
• Билинҥи кэм.
• Таптал кырдьыбат.
• Сахабыт тыла.
• Сайдыы.

Манна баарга үөрүөххэ.

Олорор олоххор күндүтүөн,
Манна төрөөн ааһарга үөрүөххэ,
Маннык баай үтүө дойдуга,
Дьоллоохтор төрүүллэр.

Биирдэ кэлэн барарга махтаныах,
Этиһэн охсуһан манна,
Иккиһин манна кэлбэккин,
Кэлэн барар бары дьолбут.

Маннык үтүө дойдуга төрөөн,
Олох олорон ааһар үчүгэйиэн,
Орто ийэ дойдуга олорор,
Онтон ордук туох кэлиэй.

Кыра да кэмҥэ үөрэнэн,
Олоҕу билэн бары ааһабыт,
Сирбэккэ - талбакка олоруохха,
Күн сирэ дьэ күндүгүөн биһиэхэ.

Сиргэ - таптал баар эбит,
Таптал олоҕу тутар манна,
Таба таайан тапталы бэйэҥ,
Тапталынан олох очурун ааһыаҥ.

Оһоҕум барахсан.

Сарсыарда аайы мин,
Оһох оттор дьол,
Ааспыт олох кэмнэрин,
Санаан ахтан ааһабын.

Үчүгэй да кэмнэр этэ,
Умнуллубат оҕо саас,
Дьонум баарын кэмэ,
Ахтан санаан ааһаҕын.

Эрдэһиппит Аҕабыт,
Туран оһоҕун отторо,
Дьиэбит сылыйан,
Сылааһынан сыыдьаайара.

Чаайньык оргуйар,
Тыаһа үчүгэйэ,
Бэйэтэ муузука,
Дьоллоох кэммит.

Былыргы дьон эрдэһиттэрэ,
Ийэм туран чай бэлэмниирэ,
Оҕолору туруоран чаайдатара.

Бары сандалыга олорон,
Сарсыарда чаай иһэрбит,
Ийэм чайа минньигэһэ,
Ахтан санаан ылабын.

Оо дьэ аастаҕа барыта,
Кэм дьыл ааһара,
Түргэнэ сүрдээх эбит,
Бэйэбит биһиги сааһыран.

Билинҥи кэм.

Аны киһи соһуйбат буолла,
Буолуохтаах буоларын курдук,
Эргэ сылбыт бүттэ барыаҕа,
Саҥа сылга үҥэн - сүктэн.

Кэлэри үчүгэйи көрдөһүөҕүн,
Барыта этэнҥэ олох тубустун,
Аргыардаах айдааннаах,
Олохпут тупсарыгар баҕарыах.

Икки атах өйдөспөтө,
Сэриибит бүттэр,
Эйэлээх олох кэлэригэр,
Үҥэн - сүктэн бары көрдөһүөҕүн.

Олох иннинэн барыахтаах,
Оҕолору сиэннэри саныаҕын,
Бары да көрө - билэ олоробут,
Бу сайдыыбыт кэлэн олоххо.

Таптал кырдьыбат.

Сүрэх тэбэрин тухары,
Таптал баарын тухары,
Олох салгыы барыахтаах,
Киһи биирдэ кэлэн ааһар.

Маннык үтүө дойдуга,
Кэлэн ааһарга махтаныах,
Иккиһин манна кэлбэккин,
Этиһэн охсуһан тиллибэккин.

Маннык үтүө бу дойдуга,
Олорон ааһарга махтаныах,
Сүһүөх төһө уйарынан олоруох,
Сүрэх тэбэрин тухары олоруох.

Таптаа олоҕу сүгүрүй,
Таптаа баарын тухары,
Таптал киһи анала олоххо,
Таптал олоҕу оҥорор анала.

Сахабыт тыла.

Сайдыы кэлэн саба баттаан,
Сахалыы саҥарар аҕыйаата,
Өбүгэбит үгэһин сүтэрии,
Ити эстиигэ эрэ тиэрдэр.

Саха симэлийиэн иннигэр,
Сахабыт тылын сөргүтүөҕүн,
Ийээ, Аҕаа диир суох буолла,
Папа, мама дии сылдьабыт.

Өбүгэлэрбит үгэстэрин умнуу,
Айылҕабыт да уларыйан,
Ыллыктаах оллуктаах тылбытын,
Сүтэрэ симэлийэрэ кэллэ.

Сахалыы да оскуола суох,
Арай тыабыт оскуолата,
Онно да Саха тылын умнуу,
Бары нуучча буолан эрэллэр.

Саха тылын сөргүтэр кэммит,
Өссө да хойутуу иликпитинэ,
Сахалыы саҥардан сиэннэри,
Кэммит тиийэн кэллэ Сахалар.

Тыл сүтүө омук эстэр,
Саха аата сахалыы саҥарбат,
Сырайа Саха

сахалыы билбэт,
Оннук дьонтон хомойобун.

С. Сэрбэкэ.

Сайдыы.

Үчүгэй да үйэҕэ олоробут,
Сайдыы кэлэн абыранан,
Сайдыы да дьалхааннаах,
Икки атах ииригирэн сэрии.

Сэриибит бүттэр олох көнүөҕэ,
Үйэбит дьэ уһаан олоххо,
Уон сыл эдэрбитигэр түстүбүт,
Үрүҥ айыыларга махтаныах.

Олох олох куһаҕан буотах,
Эдэрдэргэ дьэ күннэрэ кэллэ,
Туох барыта баар билигин,
Көмө элбэҕэ киһи сөҕөр.

Оҕо төрөөтө харчы түһэр,
Дьэ үчүгэй да кэм кэллэ,
Дьэ итини ситиһиннэрэн,
Туох барыта ыараата олоххо.

Бу кэми этэнҥэ ааһар киһи,
Сэриибит бүттэр диэххэ,
Олорор олох тупсуоҕа көнүөҕэ,
Бары ол кэми кэтэһэбит.