“Боссоойко төрөөбүт сирэ” диэни интэриэһиргээччи арааһа элбэх буолара буолуо. Рахматуллин Ылдьаа — Боссоойко Уус Алдан оройуонугар Чэриктэйгэ Ыччат диэн сиргэ төрөөбүтэ.

Ыччакка Түүлээх Ньукулай өтөҕүттэн чугас, Татаар кыыһын уҥуоҕа баар. Түүлээх оҕонньор араспаанньата Свешников Николай диэн, уола мин учууталым этэ. 1927 сыллаах төрүөх. Түүлээх оҕонньор хойут 1971 сыллаахха өлбүтэ. Кини оҕо сылдьан Боссоойколуун бииргэ оонньуур эбиттэр. Боссоойколоох Ыччакка уонча ыал буолан олорбуттара үһү. Онтон Дүпсүҥҥэ тахсаннар үс-түөрт сыл олорбуттар.

Шергин Петр Иванович 1926 сыл төрүөх уонна Рожин Николай Петрович 1929 сыл төрүөх дьон кэпсииллэринэн, Дүпсүҥҥэ Уолакалар – Рожиннар тастарыгар олорбуттар. Дүпсүҥҥэ уопсайа үс сыл олорон баран куоракка киирэллэр. Онтон Мэҥэ Хаҥалас Мэлдьэхситигэр көскө баран онно дьэ киһилии олороллор. Ол иһин мэҥэлэр Боссоойкону биһиги киһибит дииллэр.

Суох, оннук буолбатах эбит. Хойут Боссоойко үрүҥнэр хамандыырдара буола сылдьан Чэриктэй Ыччатыгар Түүлээх оҕонньорго үс-түөрт хоммут. Аттарын сынньата таарыйа табаарыһыгар Түүлээх Ньукулайга былыргы улахан чиэппэрдээх испиир арыгыны туруорбут. Оҕо сааһын доҕоругар, кэлин бандьыыттааһын саҕана, Ыччакка Түүлээх оҕонньор ийэтин уҥуоҕар арыгы куппут. Ботугураан саҥарбыт. Боссоойко атын Түүлээх оҕонньор үчүгэй отунан аһаппыт. Өссө баралларыгар атыгар өйүө от бөҕөтүн биэрбит. Оҕонньор Боссоойколооҕу эмис этинэн күндүлээбитэ үһү. Боссоойко саллааттара таһырдьа улахан олгуйдарга эмис ынах этин харса суох буһарбыттар. Дьиэҕэ киллэрэн аһаабыттар.

Боссоойколоох баралларыгар сирдьит киһи көрдөөбүттэр. Онуоха Түүлээх оҕонньор биир Ыччат киһитин биэрбит. Бу киһи Боссоойколооҕу Хара Алдан сиригэр тиэрдибит. Боссоойко бэйэтэ икки ат көлүллүбүт сыарҕатыгар олороро үһү.

Мин кыра эрдэхпинэ Түүлээх Ньукулай биһиги таспытыгар Дьиибэ Дьөгүөр дьиэтигэр ыаллыы олорбуттара. Ол 1965 сыллар диэки этэ. Билигин Чэриктэйгэ биир киһи хаалла, Түүлээх оҕонньор аймаҕа – Свешников Иван Васильевич диэн, 1947 сыл төрүөх. Уйбаанчык улахан спортсмен киһи, от охсуутугар Саха сирин элбэх төгүллээх кыайыылааҕа. Ыччат сирэ Чэриктэй бөһүөлэгиттэн отой чугас, балтараа көс. Свешников Иван Васильевич этэринэн татаар кыыһын уҥуоҕа Түүлээх Ньукулай оҕонньор өтөҕүттэн чуп-чугас. Кырдьаҕастар этэллэринэн Түүлээх Ньукулай Боссоойко туһунан отой кэпсээбэтэ үһү. Кыһыллар Боссоойко дьонун имири эспиттэрэ хомолтолоох дьыала эбит.

Бу кылгас ахтыыбын Рожин Николай Петрович уонна Свешников Иван Васильевич кэпсээннэрин түмэн суруйдум. Бары үчүгэйи, этэҥҥэ буолууну баҕара хаалабын.

Иннокентий ГОРОХОВ-Күлүбүр.

Уус Алдан, Чэриктэй

tuymaada 12 июня, 2026