Арай биирдэ син толору киһилээх куорат диэки таксилаан истим. Сыстаҥ диэн былыргы колхоз-совхоз саҕанааҕы ферма учаастага билиҥҥи трасса кытыытыгар турар, син 3-2 кырдьаҕас ыал олорор бадахтаах сирэ. Бараары-кэлээри гыннахтарына суол кытыытыгар турар буолааччылар. Оттон биһиэхэ, хаччыга сүүрэр дьоҥҥо, ол бэртээхэй «бонус» буоллаҕа…

Дьэ ол сиргэ биир кырдьаҕас тохтотон баран, олуйуулаах ыйытыылаах буолла:

– Тоойуом, бүгүн Бүлүүттэн төннөҕүн дуо?

– Төннөбүн, киирсээригин дуо? – хардары ыйытабын.

– Суох, хотуурбар быһах ылларыам этэ…

– Ээ… Кырдьаҕаас, онтуҥ харчылаах эҥин. Босхо ким биэриэй? Чэ, мин тиэтэйэбин.

– Бээ, кукаам, харчы биэриэм, бу баар, – оҕонньор үгүс үлэни көрсөн чэрдийбит, кииллийбит илиитинэн хоонньуттан балай да үгүөрү үбү хостоон туттарда.

– Бээрэ, кырдьаҕаас, бу эн ким диэҥҥиний? Уонна ол ыллахпына ханан олорор буолаҕын? – оҕонньорум отой кэтэх санаата суох харчы биэрбититтэн улам оҕонньорбун токкоолоһон, хата мин кини кимин ордук билээри ыйыталастым.

– Ээ, манна олохтоох Уйбаныап диэммин. Оол-ол олоробун да, бу эн массыынаҥ онно тиийбэтэ буолуо, суолбут бадараан. Оттон ылан таҕыстаххына, бу хатырыгынан баттата манна ууран кэбиһиэҥ буоллаҕа…

Мин ол күн саамай кыһаллан, бириэмэбин кэрэйбэккэ хотуур быһаҕын көрдөөн булбутум. Ордубут харчытыгар өссө «Алаас» диэн буокка ылбытым. Төһө да дьаат, өлөр-өлүү аһа диэтэллэр, кырдьаҕас сайыҥҥы киэһэ балаҕаныгар олорон саҥа быһаҕын алгыы-алгыы, кыратык сүүп гыннаҕына да туох буолуой дии санаабытым.

Оҕонньорум үлэҕин эппит хатырыгын анныгар хаалларбытым. Өйүүнүгэр тохтоон көрбүтүм – ылбыт этэ.

Онтон кэнники истибитим оҕонньор ситэ оттообокко балыыһаҕа киирбит. Били буоккабын иһэн баран, от оҕустара сылдьан хотууруттан охтон түһэн улаханнык эчэйбит. Ол мин биэрбит буоккабыттан сылтаан сайын былдьаһыктаах кэмигэр сатаан ситэ оттообокко, сирин дьоҥҥо харчыга оттоппут. Кыра пенсиялаах киһи улаханнык ороскуотурбут, доруобуйата да айгыраатаҕа.

Онон саха дьоно өйдөөн кэбиһиҥ: арыгыны хаһан да кэһии оҥостумаҥ. Бу кырдьык абааһы аһа. Абааһы аһынан хотуурун алҕаан манныкка тиийдэҕэ. Онтон мин абааһы аһын кэһии гынан улахан аньыыны оҥордоҕум.

Суруйдум СУОЛ.

tuymaada 11 июня, 2026