Бөлүүн таксига ностальжиттан икки саас ортолоох дьону ыллым. Биирдэстэрэ ачыкыылаах саха интеллигенцията көрүҥнээх, биирэ боростуой үлэһит отчут-масчыт мөссүөннээх. Бу олорон кэпсэтэллэр.

• Һуу, таах сибиэ эрдэ баран, ити биир Елена диэн дьахтар миэхэ олох хатааста сылдьыбыта дии, сектор шанс, шанс! Мин явно кинини тутуохтаах этим, харчы бөҕө бараатым, ити барыта эн Лүөнь, төннүөххэ!
• Ээ суох кэбис доҕор, ити олох страшнай дьахталлар дии, мин эйигин поддержкалаан таах көннөрү үҥкүүлэһэ эрэ киирбитим Бүөккэ, кэбис дьиэлиэх!
• Лүөҥкэ эн оттон син эмиэ эр киһи элээмэтэ буоллаҕын, бачча киирбиччэ биир эмит бытааһаҕы кыбынан гостиницаҕа илдьэ барыаҥ этэ буо. Биирдэ бу курдук дьиэттэн-уоттан төлө барбычча. Бу да киһи доҕоор, мужик буоллаҕын дии, күүлэйдиэхтээххин!
  Онуоха биирдэстэрэ били саха интеллигенцията көрүҥнээх киһи дьэ тулуйара ааста быһыылаах, төлө барда:
• Доо, эн миигин туох эрэ кыыл курдук саныыгын дуо? Итинник испит аһаабыт, арыгы сытынан биэрэстэнэн аҥылыйа сылдьар дьахталлары кытта сылдьан баран, дьиэбэр-уоппар хайдах тиийэбин? Кэргэммин, оҕолорум харахтарын хайдах көрөбүн? Киһи кыылтан уратыта тугуй? Кини толкуйдуур дьоҕурдаах. Үчүгэйтэн куһаҕаны араарар. Киһиэхэ сиэр-майгы баар буолуохтаах. Нууччалыы эттэххэ этика, мораль!
• Этика, мораль ээ пошоол! Эн миэхэ нотация ааҕыма! Бэйэм билэбин хайдах сылдьарбын. Бу түөрт уон түөрт сааспар кэллим. Ханна баарбыный соҕотохпун. Хас дьахтары бараатым? Аахпыт суох. Бары туһанар эрэ аакка сылдьаллар. Биир оҕолоох дьахтары ылбытым эдэрбэр, үлэ бөҕө үлэлээн ол оҕону дьиэлээбитим. Ханна баарый махтала? Итирэн баран үлтү кырбаан уулуссаҕа бырахпыта. Ол кэнниттэн бу перекати поле киһи буолан бу сылдьабын. Ону маны холтууралыыбын. Хата таҥара уһанар дьоҕуру биэрэн кыһын муус оҥоһуктары кыһабын, сайынын дьиэ тутабын. Ол харчым дьиэм куортамар барар ч/б мас снимайдыырбар. Уонна, уонна тугу кистиэмий бу маннык хас өрөбүл аайы маннык кэлэн дьахтардыыбын. Көҥүл олох! Никто никому ничего не должен, никто никому ничего не обязан! Манна өрүү биир дьон сылдьабыт ээ, уже бары этэргэ дылы попробовали друг друга ха ха хаа! Оттон эн Лүөҥкэ порядочный семьянин, подкаблучник, интеллигент, олоҕун оннук үчүгэй, интириэһинэй дуо?
• Бүөккэ, киһи хаһан баҕар киһилии сиэринэн сылдьыахтаах. Дьоҥҥун өйдөө, сопхуос туруу үлэһиттэрэ этилэр дии, аҕаҥ бастыҥ кадровай булчут, ийэҥ передовой дайаарка. Эһигини алта оҕону атаххытыгар туруоран киһи-хара оҥорбуттара. Ама аҕаҥ маннык күүлэйинэн олорбута дуо Киргиэлэй Ыстапаанабыс? Ийэҥ ама пиибэттэн күнэ ыйа тахсар

  этэ дуо? Эн эмиэ ып ыраас санаалаах тыа уола этиҥ дии, арыгы испэт, табах тарпат, сырдык ыралаах. Кими батан дьоҥҥун сэргэҕин түһэн биэрэ сылдьаҕын? Төрөппүттэрин барахсаттар маннык сылдьаргын көрбөккө эрдэ бараахтаабыттара да үчүгэй эбит. Мин биири сүбэлиэм этэ Бүөккэ эйиэхэ, эн боростуой, үлэһит тыа кыыһын бул. Оннук маннык күүлэйи баппатах. Дойдугар тахсан ыал-күүс буол, хаһаайыстыбата тэрин, оҕо-уруу тэнит, дьонун өтөхтөрүн өрө тарт, сөргүт, өссө эбии саҥа дьиэ-уот тутан дьэндэт! Дьонун барахсаттар дэлэ эрэ үөрүөхтэрэ этэ дуо үөһэттэн көрөн, хор эрэ оҕобут олохпутун салҕаата, уһун буруо унаарта, удьуор-утум салҕаата диэн?
  Массыына иһигэр уу чуумпу сатыылаата. Хас биирдии бэйэлэрэ бэйэлэрин толкуйдарыгар бүгэн олордулар. Оо олох, олох эн уустуккун. Ол эрээри хас биирдии киһи дьылҕата тус бэҋэтин илиитигэр. Үтүө тыл кынаттыыр, чугас доҕор өйүүр-өйдүүр. Ойуурдаах куобах охтубат - дьонноох киһи тутайбат! Орто дойдуга олох салҕанар.

Чаҕыл