Дьиҥ олоххо баар түгэнтэн биир интэриэһинэй түгэни быһа тардан суруйуум. Арай массыынаннан айаннаан иһэбит. Суоппар дэриэбинэҕэ киириэр дылы тугу да саҥарбакка олорон эмискэ быдьар саҥаннан мааттаан барда: “Оо, баҕайы, балбаах курдук буола сытыйан өссө суолу туораан иһэр ээ, баҕайы” диэбитигэр, соһуйан кими үөҕэн-үтэйэн барда диэн түннүгү манаспытым, биир улахан суумкалаах дьахтар суолу туораан иһэрин итинник саҥарбыттын өйдөөбөтүм…төһө да буолбутун иһин билбэт дьахтарын тоҕо итинник үөҕүөххэ сөп этэй диэн санаалаах салгыы айаннаан саҥа дойдуга үктэнним. Кэлин бу дойдуга олохсуйан дьонун сэргэтин биэс тарбах курдук билэр буоллум. Киһи сөҕүөҕүн били бу дойдуга аҕалбыт Бааска диэн суоппарым билбэт дьахтарын үөҕэн бытарыппыт дии санаабытым,илэ бэйэтигэр маҕаһыынтан ас ылан киниэхэ ас астаан тоһуйуом этэ диэн ыксаан бохсоон испит ойоҕун сүөргүтүк быһыыламмытын билэн сиргэ силлээтим. Билэр дьоммуттан бу киһи туһунан ыйыталаһан, кэпсэтэн билбитим, куруутун ойоҕун дьон ортотугар түһэрэн, бүтэһик тылларынан үөҕэн сэниирин көрдөрөр быдьар быһыылаах киһи эбит, дьон оннооҕор онтон сөҕө сатаан баран сөхпөт да буолбут.
Кэлин суоппар кэргэнин Дуняны кытары билсиһэн, олус тапсан билсэр көрсөр буоллубут, киһи быһыытынан олус ис киирбэх, саҥалаах иҥэлээх, киһи сирбэт дьахтара. Арай биирдэ, туох эрэ наадалаах бу ыалларга эмискэ көтөн түстүм, оһох иннигэр Дуня табахтыы олорор эбит. “Хайа, дорообо, туох сонун?"-диэн ыйыталаһан кэпсэтиини саҥа саҕалаан истэхпитинэ,хостон Бааска сүүрэн тахсан: “Ити кимниин кэпсэтэҕин, ким баарый, хайа буккуллаары гыммыккыт дуу,хайдах дуу?"-диэбитигэр, соһуйан “Бүт эрэ…"-диэн хардардым, киһим: “Ээ бу оһох диэккиттэн туох эрэ саах сыта кэлэр ээ,баҕайы бу манна бу сатана илэ бэйэтинэн олорор эбит дуу?"-диэн баран күлэ-күлэ хоһугар киирдэ. Дуня саҥатыттан матан сирэйинэн харах уута халыйан түспүтүгэр: “Чэ, сөп, мин баарыым” диэн тахсан баран бэйэбиттэн кэлэйдим,ити барахсаны хайдах даҕаны өрөһүйэр кыаҕым суох диэн. Кэлин Дуняны көрсөн: “Арахсар санааҥ суох дуо? Хайдах итинник киһилиин олороҕун?"-диэн ыйытыыбар туох да хоруй биэрбэккэ кэпсэтиибитин атын кэпсэтиигэ көһөрөрүттэн олус диэн кыһыйарым. Ол курдук биир үтүө сайын Бааскабыт кэргэнигэр: “Айака сылайдым, сайын аайы оттоо да оттоо, мин от-мас хачыгыра буолбатахпын бэйэҥ хайдах да оттоо мастаа, мин сынньаныахпын наада”-диэн баран барбыт сурахтанна. Ол баран куоракка сыл устата сылдьан игин араас аһаабыт-сиэбит дьахталлардыын күүлэйдиирэ сурах хоту иһиллэрэ. Ону Дуня истэ-истэ “Ээ, чэ сырыттын, сылдьыан баҕаран дьаабылыыра билиннэҕэ”-диирэ. Сотору бу дойдуттан көспүтүм, кэлин сурах хоту истибитим, Дунялаах аттыларыгар биир сулумах бэйэтин саастыы киһи соҕотох дьахтарга көмөлөһөр ааттанан, уруккуттан хараҕын хатыырын билинэн сылдьыһалларын туһунан истэн мин саҕа үөрбүт киһи суоҕа. Ол кэннэ Дуня саҥа истиҥ тапталга угуттанан умуллубут хараҕа уоттанан, сэбэрэтин көрүнэн дьахтар бэрдэ буолбут диэн дьон сөҕөрө манньытар. Маны истээт били Бааска обургу куораттан түргэн-тарҕан соҕустук кэлэн айдаара сатаабытын үүрбүттэригэр аһыы уу утахтанан,кини быраҕыллыбыт аатырбыта.
Мантан ситтэрэн эттэххэ,дьахтар хаһан баҕарар таптыыр эриттэн болҕомтону эрэйэр, эр дьон таптыыр дьахтаргытын сибэкки курдук тутан, күҥҥэ, ыйга, сулуска, чыычаахха тэҥнээн харыстаан,кини кэрэтин сүтэримэҥ!

МАРИЯ КОБЕЛЬЯНОВА - ТУСКУЛААНА