Субуотаҕа уруокпутун кэнниттэн тэринэн мотуорканан Улахан Түбэҕэ киэһэ-сарсыарда кус ытан сүүрбэччэ кустанныбыт. Онтон уҥуоргу Сыһыы сайылыгар мин кэргэним убайыттан Ефимов Г.И. (Түүлээхтэн) оскуола музейыгар былыргы саары этэрбэһи биэриэхтээҕин ылар үлэхтээҕин ыла бардыбыт. Михаил Александрович төрүттээбит музейыгар экспонаттары сылдьыбыт сирин аайы хомуйарын хаһан да умнубат этэ. Түүлээх оҕонньор кырдьык да сиэдэрэй, кыһыл-күөх дьарҕаалаах сукуна билэлээх, тумустаах, ыас хара саары ийэтэ тикпит этэрбэһин таҥаска суулаан холбука түгэҕэр уга сылдьарын биэрдэ. Төннөн иһэн киһим Самаллаах үрэҕин төрдүгэр үппүт илимин уонна ситтэрин көрөр буоллубут.

Мотуорбутун эрдэ умуруоран, илими көрөөрү аргыый эрдинэн иһэн сүүрүк муспут сиппэҕэр мас сытарын көрдүбүт. “Оо, дүлүҥ! Илиммин бүтэрдэҕэ буолуо”, – диэбитигэр, “дүлүҥүн кутуруктаах” диэбиппэр киһим төрүт да улахан хараҕын муҥунан көрөн баран туран кэллэ. Бастаан кутуругуттан көрөн бил быһылаах диэбиппит, хатыыс туһунан өйгө да суоҕа. Мин эрдиинэн илими эргитэн балыгы ыга суулаан, төбөтүн өндөтөн таһааран иһэн көрбүтүм, сүүнэ улахан хатыыс буолан биэрдэ. Киһим быһаҕы биэрэ охсубутугар, сүнньүгэ анньан көрбүтүм, быһах кыайан киирбэтэ, онтон сүгэни көрдөөн ылан сүүскэ охсубуппар куһаҕан аҕайдык саҥа таһаарбытыгар, балыкпын илимнэри соһон таһааран лодкаҕа устатынан бырахтым. Ону Михаилым үрдүгэр түһэн баттыы сыттаҕына, мин сүгэнэн хаста да сүүскэ биэртэлээтим.

Онтон балыкпытын өлөрөн баран, дьэ өйдөнөн кэлэн ситтэрбитин көрдүбүт. Дьиҥинэн сит курдук биир эрэ күөгүнү иилбэт, хас да бөдөҥ сит күөгүтүн мундунан мэҥиэлээн иилэр бэрэмээтэ эбит, ол гынан баран лаппыныахтаабакка дьаакырдаан тимирдэ бырахпыт. Мантыбытыгар биэс-алта иккилии киилэлээх сыалыһардар хаппыттар этэ.

Дьиэбитигэр балыкпытын киһи көрбөтүнэн, бөһүөлэккэ атаспыт Атласов арадьыыс көлөөскөлөөх матасыыкылынан таһааттардыбыт. Балыгы көрөөт, Оппуонньабыт тылыттан матан, таалан турда. Кини хаһан да маннык улахан хатыыһы ким да туттарбытын көрө-истэ илик эбит. Хатыыспытын ыйаан көрбүппүт 18,5 киилэ буолла. Мин да билэрбинэн, бу Адыаччыга урут оччо хаптарыллыбатах улахан хатыыс буолуо.

Семён КОЛЕСОВ.

tuymaada 18 июля, 2026