Сиимэн оҕонньор куоракка уолун ааҕы кытта олорор. Дьиҥэр бэйэтин кыбартыыратын курдук этэ да ,бэйэтин туоратыллыбыт курдук сананар. Кырдьаҕас киһи сөтөллөрө, айалыыра - дьойолуура ханна барыай. Ол аайы кийиитэ сиргэммиттии, сирэйин мырдыччы туттар. Эмээхсинэ тыыннааҕар үчүгэйдик да олорбуттар эбит. Кытта кырдьыбыта тугу саҥарбыта, туоҕу буһарбыта аны санаатахха, оччолорго аахайбатаҕын иһин, барыта күндү да эбит.

Ханнык эмит бырааһынньык буолла да кийиитэ " Аҕаҕын ханна эмит илдьэн эр, ыалдьыттар кэлэллэр! " диэн буолар. Сиимэни уола үөлээннэҕэр илдьэр , эбэтэр даачатыгар илдьэр.

Бүгүн ыам ыйын 1 күнүн бырааһынньыгар ,кийиитэ эмиэ дачатыгар аҕалтарда. Биэнсийэтин туһанар буолан баран бырааһынньыкааттаах күҥҥэ Сиимэҥҥэ саатар биир кыһыл арыгы туруорбатылар.

Кыһыны быһа оттуллубатах сайылык дьиэтин оттон, буруо бөҕөнү таһаарда.
Сиимэн бу даачаны туталларыгар, муоста анныгар уурумньу көмүһүн кистээбитэ. Чопчу ханна уурбутун өйдөөбөт. Көрдүү сатаан баран “уорбуттар” диэн сабаҕалаабыта. Сиимэн эдэр сылдьан хас эмит сыл, көмүскэ үлэлээбитэ. Онтон дьоҕус дьааһыкка " кыыстаах уолум улааттахтарына наада буолуо, билиҥҥитэ харчым баҕас баар" дии санаан кистээбитэ. Кэнники онтун көрдөөн муостатын онон - манан көтүрэн көрбүтэ да булбатаҕа. Ол кэннэ балай эмэ сыллар элэҥнээтилэр.
Онтон Сиимэн бүгүн умса туттан олорон өйдөөн көрбүтэ, арай оһох кэннинээҕи икки салҕааһын былааҕылар иккилии өттүлэрэ, үстүү хатыынан сааллыбыттар. Онуоха " арба даҕаны! " диэн санаан кэллэ. Ампаарыгар тахсан хатыы туурарын киллэрэн, балачча сыралаһан икки былааҕыны көтүрдэ. Олуйдаҕын аайы " Абаккабыаан!" - диэбиттии дьэбиннээх хатыы, хаҕыстык ньылбырыйан хаахыныыр.
Оҕонньор салҕалыан, салыбырыан быатыгар көмүстээх тимир хоппото, хайдах уурбута да оннук турар. Наай гыннар кутуйах ииктээбит, саахтаабыт.Тимирэ дьэбиннирбит. Ону тирээпкэнэн сотон баран, арыйан көрбүтэ, көмүс кылаата барыта баар. Бу көмүс туһуттан элбэх эрэйи эҥэринэн тэлбитэ ,да үлэлээбитэ даҕаны. Бу көмүс туһуттан бэйэтин да атаҕын тэҥнии сыспыттара. " хата ол илээттэр билигин суохтар !" диэн оҕонньор өссө туоҕу эрэ ботугураан, уруккуну санаан кириэстэнэн ылла.
" Дьэ уонна бу үлүгэри ханна, хайдах туттабын? Оҕолорбор биэриэххэ. Суох! “Оҕо сүрэҕэ тааска” эбит. Ый күн ыһыаҕа оҥоруохтара. Бүттэ да эмиэ манна тоҥ - хаһаа даачаҕа аҕалан быраҕыахтара " - Сиимэн көмүһүн төттөрү уган кэбистэ.

Сарсыныгар уола кэлэн Нива массыынанан төттөрү аҕалла.
Нэдиэлэ курдук олорбутун кэннэ ,кийиитэ киксэриитинэн уола аҕатыгар эттэ.

– Аҕаа эйигин кырдьаҕастар дьиэлэригэр

киллэрдэххэ хайдах буолуой? - уола “эйигин ол ыалга ыалдьыттататаилдьиэм " - диэбиттии холкутук эттэ. Аҕата саҥарбатаҕын көрөн эбии этэ олордо - онно эн тэһийиэҥ этэ. Бэлэм ас таҥас. Тэлэбиисэргэ да көрдөрдөхтөрүнэ сынньалаҥа үчүгэйэ бэрт курдук…онно бэйэҥ саастыылаахтарыҥ…

– Суох онно барбаппын. Миигин даачабар илт!

– Тоҥ хаһаа диэбитиҥ дии. Уонна кыһын эмиэ кэлэ туруоҥ. Кийиитиҥ Люба эмиэ сөбүлүө суоҕа дии.

– Ол кини сөбүлүүрүнэн буолуохтаах дуо? Сөбүлээбэт буоллаххытына дьиэбин босхолооҥ! Кыыспар аныаҕым! - диэбитигэр уола мух - мах барда.

Сиимэн хомунан даачатыгар бырахтарда. Уолугар этэн көмүһүн хостоппутугар, уола сөҕөн хараҕын муҥунан көрдө.

(Салгыыта бэчээттэниэ)

Ородьумаан

24.04.2026.