(Поп-кулууп)

“Тэбэнэт” диэн тыл ис хоһооно хорсун, мэник санаа, хорсуннук мэниктээһин. Маннык ааттаах бөлөх ырыаһыттарын Марианна Саввинованы, Иванна Иванованы, Мирослав Егоровы кытта көрсөн кэпсэттим.
Марианна Саввинова — Сунтаартан төрүттээх, зодиага Игирэлэр. Мин көрөрбүнэн киириилээх-тахсыылаах, бэһиэлэй, кэпсээннээх-ипсээннээх кыыс.
Иванна Иванова — Ньурба улууһун Ньурбачааныттан сылдьар, зодиага — Балык. Холку, сайаҕас майгылаах, сэмэй кыыс.
Мирослав Егоров — Сунтаартан төрүттээх, Мэҥэ-Хаҥаласка улааппыт. Зодиагын бэлиэтэ — Водолей. Дьээбэлээх, бэһиэлэй, эмиэ кэпсээннээх-ипсээннээх уол.
Дьэ, бу курдук тус-туспа дьон көрсөн, хайдах бөлөх тэринэн, үлэлии-хамсыы сылдьалларын туһунан маннык кэпсииллэр.
— Аан маҥнай СГУ саха салаатыгар киирэн бииргэ үөрэнэ сылдьан билсибиппит, доҕордоспуппут. Устудьуоннуу сылдьан тус-туспа ыллыыр этибит. СГУ культурнай киинигэр буолар мероприятиеларга кыттааччыбыт. Онтон үһүс курска үөрэнэ сырыттахпытына эстрада мастарыскыайа СГУ-ну кытта дуогабар түһэрсибитэ. Онно киирэрбитигэр кэпсэтэн, истэн, көрөн баран ылбыттара. Маҥнай төрдүө этибит, онтон биир уол салгыы үөрэммэтэҕэ.

— Онно киирээт, бөлөх буоллаххыт дии?
— Суох. Биһиги тус-туспа ыллыахтаах этибит. Онтон биирдэ аудиторияҕа үһүөн гитаранан ыллыы олордохпутуна, Ю. Е. Платонов — биһиги “аҕабыт”, салайааччыбыт (оҕолор этэллэринэн, Юрий Егорович дьиҥнээх аҕаларын курдук, тус олохторун, кыһалҕаларын кытта тэҥҥэ быһаарсар үһү. Ол иһин таптаан, убаастаан “аҕабыт” дииллэр) киирэн истэн, көрөн баран, бөлөх оҥоруохха баар эбит диэбитэ. Дьэ, ол курдук бөлөх буолбуппут.
— Бөлөххүт хаһан тэриллибитэй?
— Былырыын, сэтинньигэ, театр сезона арыллыытыгар тэриллибиппит.
— Ханнык ырыаҕытынан аан бастаан сүрэхтэммиккитий?
— Маҥнайгы ырыабыт студенческай доҕорбут Алеша Павлов ырыата этэ. Онтон билигин ырыаларбытын бэйэбит суруйабыт. Үксүн Слава суруйар.
— Ырыа айарга маҥнай мелодиятын суруйаҕыт дуу, тылын дуу?
Иванна: мин гитараны тутуохпуттан ыла, быһа холоон 1995 сылтан суруйабын. Маҥнай тылын, онтон мелодиятын айабын.
Слава: сэттис кылаастан саҕалаан суруйабын. Ол иһин билигин сорох урукку ырыаларбын уларытан, тупсаран эрэ баран, көрөөччү дьүүлүгэр таһаарабын. Маҥнай матыыбын, онтон тылын суруйабын.
Марианна: 1992сылтан суруйабын. Ардыгар мелодиятын айан баран тылын суруйабын. Сороҕор төттөрү буолааччы. Уопсайынан, атын да дьон хоһоонугар суруйааччыбыт.
— Устудьуоннуу сылдьан ыллыыр этибит диэбиккит дии, саамай дьоҥҥо-сэргэҕэ өйдөммут тахсыыгыт ханныгый?
— Устудьуоннуу сылдьан бөлөхпүтүнэн чугас улуустарга

гастроллуу барааччыбыт. Биһигини кытта араас талааннаах оҕолор үөрэммиттэрэ. Гастролларга сылдьар бэһиэлэй буолааччы.
— Бииргэ үөрэммит оҕолоргутун кытта билигин сибээстэһэҕит дуо?
—Үгүстэрэ куоракка бааллар, наар көрсөбүт, олус көмөлөһөллөр, өйүүллэр.
— Артыыс быыс кэннинээҕи олоҕо хайдаҕый? Иллэҥ кэмҥитигэр тугунан дьарыктанаҕыт?
— Артыыс үлэтэ диэн, биллэн турар, ыарахан. Холобур, бырааһынньык кэмигэр биһиги саамай үлэбит үгэнэ. Онтон иллэҥ кэмҥэ концерт туруоруута, репетиция, тренинг, шейпинг, вокал, куолаһы оҥостуу уо. Д. А. Онон үлэбит дэлэй.
— Саамай умнуллубат түгэҥҥит?
— 1999 С. Нам Хамаҕаттатыгар “Ырыа кытыла” диэн триолар уонна дуэттар күрэхтэрэ. Онно бастакы лауреат буолбуппут. Билигин биһигини онно идэтийбит ырыаһыттар диэн киллэрбэттэр.
— Ырыа күрэхтэригэр өссө туох ситиһиилэрдээххит?
— Слава Майаҕа 1998 с. Буолбут “Ыра санаам кыымнара” диэн эдэр мелодистар конкурстарыгар Гран-прини ылбыта. Марианна онно үһүс лауреат буолбута. Онтон Иванна 1999 с. Студенческай фестивальга корпустарынан күрэхтэһиигэ бастакы степеннээх лауреат буолбута.
— Мастерскойу бүтэрэн, диплом ылан, туох идэтин баһылаатыгыт?
— Солист-вокалист, эстрада артыыһын дипломун ыллыбыт. Онтон иккис идэбит — культуролог. Онон учууталлыахпытын да сөп.
— Ырыаһыт буоларга ханнык хаачыстыба
нааданый?
— Айылҕаттан бэриллибит талаан уонна тулуур. Юрий Егорович этэринии: “Здесь вас будут не только давить, но и топтать”. Онон муҥура суох тулуур наада.
— Арҕааҥы Российскай эстрадаттан ханнык ырыаһыттары ордороҕут?
— Хас биирдии ырыаһыт табыллыбыт нүөмэрдээх буолар. Саха сиригэр шоу-бизнес сайда илик, эстрадабыт сайдан эрэр. Онуоха ордук сахалыы “Виктория” көмөтө улахан.
— Инники былааннаргыт?
— Бары бу курдук бииргэ сылдьыбыт киһи-и. Былааннарбыт диэн сольнай программабытынан киин улуустарга, Бүлүү бөлөххө барыы. Кыаллар буоллаҕына альбом таһаартарар санаалаахпыт. Чэ инникибитин олох көрдөрөн иһиэ.
Дьэ ити курдук, “Тэбэнэттэр” бэлэмнэнэ сырыттахтарына аралдьытан, үөрэ-көтө кэпсэттибит. Кинилэр курдук сүрдээх сайаҕас, бэһиэлэй, интэриэһинэй эдэр дьоҥҥо киһи тугу баҕарыай? Биллэн турар, туох баар кэрэни, үтүөнү, дьолу-соргуну, айар үлэлэригэр ситиһиилэри.
Кэпсэттэ Марианна ТАРАСОВА,
СГУ студена.
2000 сыл