Билиҥҥи кэмҥэ эдэр ыччат, сүрүннээн студент киһи, бэйэтин сынньалаҥын түүҥҥү диско-бардарга атаарарын ордорор. Аныгы тэтимнээх музыка, төһө баҕарар арыгы, пиибэ тоҕо эрэ кинилэри ордук угуйар. Сураҕа, дьон үксэ “Океан” диско-барга ордук сөбүлээн сылдьар үһү. Ол төһө кырдьыгын-сымыйатын билээри биир үтүө киэһэ анаан оҥостон, бэлэмнэнэн “Океаҥҥа” сылдьан, көрөн-истэн кэлэргэ сананным.
Бүгүн чэппиэр буолан киириибит хата босхо эбит (ити студент киһиэхэ ордук абыраллаах! ). Бастакы сылдьыым буолан, барыта да сонун курдук. Бэркэ фантазиялаан оҥорбуттар. Үөһэ диэки көрдөххө, элбэх быа-туһах ыйанан турар. Истиэнэ уу долгунун курдук күөх дьүһүнүнэн кырааскаламмыт, араас балыктар, муора үөннэрэ уруһуйдаммыттар. Күөх кырааска эҥин-араас чаҕылхай уоттары кытта силбэстэҕинэ, кырдьык даҕаны, океан түгэҕинээҕи сири-дойдуну санатар. Оттон хараабыл саамай иннигэр (ол эбэтэр ди-джей остуола) хас биирдии дьон сүрэҕин аймаабыт “Титаник” киинэттэн “океан сүрэҕэ” күндү тааһынан киэргэтиллибит. Маннык үчүгэй, кыраһыабай оҥоһуулаах сири ким барыта көрүөн баҕарар.
Дьон саҥа кэлитэлээн эрэллэрэ. Түгэх диэки аһаары гыммыппытын маҥан ырбаахылаах охрана уола ыыппата. Ити эрдэттэн сакаастаммыт остуоллар үһү. Бэрт түргэнник өрүсүһэ соҕус өҥөс гыммытым, тарбах саҕа суон көмүс сыаптаах эр дьон бильярдыы сылдьаллара. Оттон дьахтар аймах өттө остуолга олороллор. Төннөн кэлэн сыаналарын интэриэһиргиибин. Син ботуччу соҕус, таһырдьа атыылыылларынааҕар икки төгүл үрдүк. Ол бириэмэҕэ дьон биирдэ кутулла түстүлэр. Киирээт даҕаны остуолларга ааһан, харса суох харчылара төһө көҥүллүүрүнэн ордук пиибэни атыылаһан иһэллэр. Сотору кэминэн сүргэлэрэ быдан “көтөҕүллүбүт” дьон туран, ким хайдах сатыырынан үҥкүүлээн бардылар. Дьэ, манна мээнэ саҥарбат да дьон саҥалара-иҥэлэрэ элбээн, харса суох билсэн-көрсөн истилэр.
Киһи сөҕөрө диэн, улахан аҥара кыргыттар уонна үксэ бэйэлэрин бэрээдэктэригэр эппиэттиир кыахтара суох сылдьаллар. Биир оннук кыыс кэлэн биһиги остуолбутугар “кыттыһан” олорбутугар ыйыталаспыппыт. “Үөрэҕим дьылын этэҥҥэ түмүктээбиппин сууйа сылдьабын”, — диэн кэпсээннээх буолан биэрдэ. “Саҥа доҕорбут” быстах-остох кэпсээниттэн өйдөөбүппүт манна син хаста да сылдьыбыт, ордук стипендия кэлбит күнүгэр “по полной программе” күүлэйдиир үһү. Туох санааттан эбитэ буолла, кыыспыт ойон тураат, үҥкүүлүүр сир хабыллар хаба ортотугар киирэн, имигэс-имигэстик хамсанан, биир-биир таҥаһын устан барда. Биир бэйэм олох барытын сыгынньахтанаары гынна диэн куттаммытым, киһим хата ис таҥаһыгар тиийэн тохтоото! (Хор,

сорох-сорохтор кыбыстар диэн тугун умнууга тиийэллэр! ).
Сайыҥҥы сынньалаҥнар саҕалананнар оскуола да оҕото аҕыйаҕа суох! Кинилэр манна кэлэн дьэ “тыыннарын таһааран”, ийэ-аҕа көрбөт сиригэр талбыттарынан табахтыыллар, иһэллэр да быһыылаах. “Бу куорат курдук улахан сиргэ, бачча хойут төрөппүт оҕотун ыыта турара да баар” диэн санаа охсуллан ааһар. Аттыбытыгар олорбут оскуола оҕолоруттан биир кыыстара остуолга утуйан хаалбытын туруоран, “дьүөгэлэрэ” нэһиилэ өйөөн тахсан бардылар (хаалларбакка илдьэ барбыттарыгар баһыыба). Мантан киэһэ ити оҕолор хайдах, ханна тиийэллэрин ким да билбэт (! ).
Баҕар сорохтор “тугу эрэ үлүннэрэн суруйара буолуо” диэн саныыргыт буолуо эрээри, бу кырдьык биһиги күннээҕи олохпутугар баар түбэлтэлэр.
Дойдутуттан ыраах сиргэ тэлэһийэн үөрэнэ сылдьар студеҥҥа харчы саамай “ыарыылаах” боппуруоһунан буолар. Оттон тыа сиригэр боростуой үлэһит, элбэх оҕолоох дьиэ кэргэн хайдах усулуобуйаҕа олорорун биһиги, дэриэбинэттэн сылдьар студеннар, бэркэ диэн билэ олоробут. Онон, стипендияттан стипендияҕа эрэ олорорбутугар тиийэбит. Ол эрээри хомойуох иһин, үгүстэр ону тоҕо эрэ өйдөөбөттөр. Стипендияларын сыыһын маннык бардарга таах тэбээн, биир киэһэлээх оҥорон тахсаллар. Ийэ-аҕа хонтуруоллаабат сиригэр оннук көҥүл көччүйэ сылдьаллар. Түмүгэр үөрэхтэриттэн хаалан, сессияларыгар улахан ыарахаттары көрсөн, бу ый аайы ылыахтаах харчыларыттан эмиэ маталлар. Оччоҕо төрөппүттэрэ эрэйдээхтэр сылга иккитэ, үстэ ылар хамнастарын “оҕобут аччыктаатаҕа буолуо” диэннэр бүүс-бүтүннүү ыыталлар. Онон, эн, эдэр кыыс, уол харчыгын таах тыалга ыытыаҥ иннинэ толкуйдаан көр. Ким барыһырарый? Эн маннык “хармааммытын эрэ халыҥаттарбыт” диэн толкуйдаах дьоҥҥо, бэйэҥ саҥа тыллан эрэр эдэр организмҥын арыгы, табах дьаатыгар сиэтэн тураҥҥын кинилэри байытаҕын. Ол эрээри “олох ханна да сылдьыма” диэн бобор эмиэ сатаммат. Ханнык баҕарар киһи, оһуоба ыччат дискотеката, араас сынньалаҥа суох табыллыбат. Ханна баҕарар сатаан сылдьарга үөрэн, бэйэҥ ааккын түһэн биэримэ.
Хайа, харчы киллэрээччи кырдьык барыһырар, оттон эн, ыччат?

Муся ЗАХАРОВА,
СГУ журналистикаҕа
салаатын студена.
1999 сыл