Сандаархай саас барахсан салаллыбыта. Соҕурууттан, итии сирдэртэн араас кынаттаах бииһэ кэлэн, үҥкүүнү-битиини, көрү-нары көҕүлүттэн туппуттара. Бу кэмҥэ улуу өрүстэр уһукталлар.
Мин бу кэмҥэ айылҕа сааскы ыраас салгынынан дуоһуйа тыынан, сынньанан, саас дьиктилэрин көрө-көрө аа-дьуо хааман иһэбин. Арай көрдөхпүнэ ытылла турар улуу өрүс үөһүгэр туох эрэ хара муустан мууска ыстаҥалыыра көстөр. Хараҕым иирдэ дуу диэн көрөбүн, кырдьык иэҕэйэр икки атахтаах киһи эбит. Таах бадарааны туоруур курдук элэҥнэтэлээн, көстө-көстө сүтэн хаалар. Ыксаан, долгуйан, хаһыытыахча буолан иһэн, ырааҕа бэрдиттэн ах бардым. Төһө өр турбутум буолла, аттыбар сэрбэйбит баттахтаах аҕамсыйбыт киһи турарын дьэ өйдөөн көрөн үрүт-үөһэ ыйыталаһан бардым: «Ити кимий? Итини көрдүҥ дуо? » Киһим хата холку баҕайытык: «Көрөн, » — диэн хардарда.
Онтон кэнники ыйыталаһан билбитим, кини бэйэлээх бэйэтин уола эбит, уҥуор тапталлааҕын көрсө барбыт. Ыйытыыларбынан топпут киһи быһыытынан, өрүс диэки хайыһан өссө төгүл көрөбүн, ким да көстүбэт, арааһа туораата быһыылаах.
Көр, таптал, дьол туһугар ити уолчаан аналын көрсөөрү халтарыйан охторун, өлөрүн кэрэйбэккэ, муустан мууска ыстаҥалаан туоруурун!
Онтон били киһим: «Туораата быһыылаах», — диэт, дэриэбинэ диэки аргыый аҕай хааман бара турда. Мин өр да өр уол барбыт сирин одуулаан турдум. Дьэ, саха барахсан таптаатаҕына, баҕардаҕына кимиэхэ да былдьаппат модун, күүстээх санаалаах буолар эбит. Мин көрбөтөрбүн да билэбин: уоллаах кыыс бэйэ-бэйэлэрин күүскэ ахтыһан, куустуһан уол туораабыт муустарын диэки көрөн тураалларын уонна кинилэр дьоллоохторун. Онтон ытылла сытар өрүс кинилэр тапталларын уруйдаабыттыы ыллаан ньиргитэ сыппыта.

Мария СОЛОВЬЕВА.
2-С Дьөппөн оскуолатын XI
кылааһын үөрэнээччитэ.
Эдэр Саас №41 (13.10.1999)