РФ Силиэстийэлиир кэмитиэтин регионнааҕы управлениетын иһитиннэриитигэр этиллэринэн: «Сонуну киэҥник тарҕатар сириэстибэлэр суруйалларынан, бу сыл бэс ыйыгар Саха Өрөспүүбүлүкэтин Үөһээ Дьааҥы улууһугар үс эдэр киһи 16 саастаах кыыһы кырбаабыттар, онтон биирдэстэрэ кинини күүһүлээбит». Саба түһүү кэнниттэн буруйу оҥорооччулар кыыс өллө дии санаан, кинини баайан баран буруй суолун кистии сатаабыттар. Билигин эмсэҕэлээбит кыыс балыыһаҕа ыарахан туруктаах сытар.
SakhaDay суруйарынан, 16 саастаах икки үөрэнээччи кыыс дьаарбайа сылдьан эдэр уолаттары кытта билсибиттэр. Кинилэр бары пааркаҕа баран арыгы испиттэр. Биир түгэҥҥэ уолаттартан биирдэстэрэ кыыска саба түспүт, кырбаабыт уонна күүһүлээбит. Онтон кыыс тыына быстыбыт дии санаан, этин-сиинин бөх тоҕор сиргэ соһон илдьибит.
Ол эрээри Үөһээ Дьааҥы улууһун баһылыга Владислав Иванов уорбаланааччы соҕотох этэ диэн иһитиннэрдэ. Кини тутуллубут уонна Дьокуускайга утаарыллыбыт. РФ ХК 131 ыстатыйатынан (күүһүлээһин) холуобунай дьыала тэрилиннэ. Дьыалаҕа эриллибит дьонтон биирдэстэригэр хаайыыга угар туһунан миэрэ талыллыбыт.