Аудиота:

— Хайа блээт тур хаарга тоҥон өлөөрү гынныҥ дуо? Дьуобунай, бэҕэһээ киэһэ үчүгэй да чалбараҥҥа түбэһэн тахтааҕа таалалыах дьону эн өйө суох итириэххэр дылы аһыы ууну хантаттаҕыҥ үһү, эбиитин Биэрэ Бэрэски мааны сандалытын үрдүгэр кулгуйан кэбилэннэҕиҥ үһү. Хата чохчойботоххор махтал. Эрдэ эйэргэһиэх курдук гынаахтыыллар этэ, кистии саба остуол аннынан мин чорбоҥнуурбун тардыалаан ылбыта ээ, ити Ньукку диэн чоҕулуччу көрбүт барахсан, барытын эн иҥсэҕин кыаммакка күрдьүккэ кээстилэр–
Баахтыйар Баһылай биир кэм тохтоло суох аллар атаһын Куйаар Куосатын соһон иһэн үөхсэн баахтыйар, бөһүөлүөк биир да уота көстүбэт, ыал барыта утуйа сыттахтара,
— Хайоо нокоо көр ол Кыыбаҕалар дьиэлэрэ уот бөҕөтө, ол хотун көспүт диэбиттэрэ, баар эбит дуу, хата бу түүн Маарыйа барахсан мааны самыытын имэрийэн хонуохпут.—
Баахтыйар киһитин түҥ таҥ түҥкэлитэн уоттаах дьиэҕэ көтөн түстүлэр. Дьиэ иһэ тобус толору киһи, хаарты- арыгы оройо,, Ооо Баахтыйар илэ бэйэтинэн, мэ хантатан кэбис,, тобус толору куруускаҕа буокка уунан биэрдилэр,, бачча ас киирбитэ тахсыбыта,, Баахтыйар хантатан кэбистэ. Куйаары көтөҕөн ылан наараҕа бырахтылар.
— Хайа Баахтыйар үс күлэр эмэгэккэ киирэн хаарты таайан тырылаппаккын дуо?—
Биир ыт сырай хаарты ырытан элэҥнэттэ.
Баахтыйарга кэлтэгэй кэппиэйкэтэ да суох, соххор солкубайа сиэбигэр хачырҕаабат.
— Ээ эйигиттэн харчы ылбаппыт, ити Куйаарга оонньуубут, сүүттэрдиҥ да хамначчыт гына ылан барабыт,
Биһиги сүүттэрдибит да сүгэһэр тухары харчы, ону кытта таптаабыт кыыскын ойох биэрэбит–
Өйдөөн көрбүтэ үчүгэйкээн кыыс оҕо бөҕө кырыы кырыытынан.
Баахтыйар олоро түстэ оонньоон силлиргэтиһэн барда, субу-субу арыгы хантатар. Син ыла биэрэ эттэстэ, кэлин олох да сүтэн хаалла, биирдэ өйдөммүтэ дьиэтигэр биир кыыһы кууһан сытар эбит. Соһуйан оронугар олоро түспүтүн кыыһа хам баттаан, төрөөн баран үөйбэтэх тапталын татакайыгар ууга уокка түһэрдэ, пахаай урут дьахтары кыыһа сылдьыһара дьаабы эбит, бэрэбинэ курдук сытааччылар дьиэ үрдүн одуулаан. Бу кыыс өйүн санаатын барытын ытыйда, ойор күннэри орто дойдулары умнуор дылы көрүлэттэ. Буолар да эбит киһи киһиэхэ кэпсиир тыла кэрэгэй буолсу. Баахтыйар үйэлээх сааһыгар маннык кэрэ бэйэлээҕи кэккэлэһэ сытан, тарбаҕынан да таарыйбатаҕа, урукку көссүүлэрэ абайбыт арыгыһыттар, бара кэлэ сатаан маска окко аалына сылдьар бытааһахтар этилэр. Хайа муҥун тыыллыы тэбэн сытыай оһоҕос Уйбаан аччыктаан ойон турбута, Баахтыйар бэйэтэ да соһуйда, дьиэтэ урут орто сигэтинэн бөх сыыс буолааччы, билигин барыта сиэркилэ курдук кылбайбыт, остуолга хотойорунан

ас арааһа, түһүүбүн быһыылаах дии санаан кымаахтанан көрдө, оройго да охсунна ол дьаабылана олордоҕуна хостон солкоҕо сууламмыт мааны Куота суугунаан тахсан Баахтыйаҕы уураан сыллаан ылла.
—-Бу күнтэн аһыы ууну амсайбаккын, бииргэ олорон буруобутун унаардыахпыт–
Бахтыйар олох буккулунна, бэҕэһээ хаартылыырын өйдүүр түүл бит курдук.
— Мин Сүллүкүүн Ньукулай кыра мааны кыыһабын, бэҕэһээ хаартылаан сүүйбүтүҥ–
Кыыһа күлэн мичилийэр
— Куйаары дьиэтигэр ойоҕун хоойугар бырахпыппыт–
Ити курдук Баахтыйар Сүллүүккүүннэр мааны кыыстарын сүүйэн күн бүгүнүгэр дылы кууһа сытар үһү…

Арыылаах, С.
8-13 мүнүүтэ, 26сыл