Мандар Уус армияҕа уу анныгар устар атомнай тыыга сылдьыбыт. Биирдэ ыраах балҕайга онтуойдара алдьанан хаалбыт. Сатаан ремоннамматах, ол иһин радиорубканан ыҥырыы эппиттэр, ким кыахтаах, кэлэн көмөлөһүҥ диэн. Онуоха Мандар баҕар көмө имэ буолаайамый диэн аллара отсекка түспүт. Тыылара оҥоһуллан этэҥҥэ портарыгар төннүбүттэр эрээри, Мандар ыалдьан хаалбыт, лейкоз, хаан рага. Сыл аҥара хотунан соҕуруунан, Владивостоктан Москваҕа диэри госпиталлары кэритэн эмтии сатаан баран, саас, уҥуох тирии буолбут, өлөрө чугаһаабыт киһини носилканан военнайдар дьиэтигэр аҕалан биэрбиттэр.
Ону ийэтэ уолун таһыгар үс хас күн ытыы ытыы олорон баран, биир сааскы ылааҥы күн суорҕаҥҥа суулаан, көтөҕөн таһааран, күн сыламыгар сытыарбыт. Онтон булууһуттан сылгы быарын синньигэс баҕайытык эллээн быһан уолугар, төһө кыайаргынан эмэ сатаа, тобоҕун таһааран ис, диэбит, уола аһыыр, ыйыстар да кыаҕа суох эбит. Оннук күн аайы, сүгэн көтөҕөн таһырдьа таһааран, салгын сиэтэн, эбиитин хаамтара, хамната сатыыр эбит, саатар атаххынан тайана сатаа, салгыы, үктүү сатаа, онтон хардыылыы сатаа, хаама сатаа…Инньик гынан аан бастаан олбуор сиэрдийэтиттэн тутуһан турар буолар.
Олохтоохтор ийэтэ уолун сылгы быарынан эмтиирин истиһэн билэн, биир биир быар аҕалтааннар, булуустарын толоро сыспыттар. Онон ити быары күн аайы ийэтэ сулуйан эмтэрэр, кэлин сиэтэр эбит.
Уол турар буолуоҕуттан икки үс хаамыыттан саҕалаан, бастаан ийэтин көмөтүнэн, тиэргэн иһигэр, хотоҥҥо диэри, салгыы таска тахсан суолга диэри, онтон ойуурга диэри… хааман барбыт. Дьэ, ити ойууру булан баран бэйдиэ кэриэтэ барбыт, күнү быһа да сылдьыах курдук эбит, сылайан сынньанан сыта сыта хаамар эбит. Ол сылдьан, дьэ, от мас ойуутун дьарҕаатын өйдөөн көрөн, үөрэтэн ити аатырар Мандар Уус буолан тахсар