— Хайа нохоо ити саҥа кэлбит кыыһы хайдах гыммыт киһи сыһытыай?—
Уолаттар оскуолаттан кэлэн иһэн ботур ботур кэпсэтэллэр, быйыл бүтэрэр сыллара, саас күн уһаан уолаттар дьээбэлэрэ хооболоро элбээн иһэр. Үһүөн да үөҥҥэ тиллэр дьон. Үөрэхтэригэр үчүгэйдэр, спордунан дьарыктаналлар. Оскуола киэн туттар ыччаттара, ол гынан баран биир дьикти быһыылаахтар. Сыылла сылдьан ону маны күрдьэҕэни тэрийэллэр, оҥороллор. Кыргыттары кытта эриссэллэрин сөбүлүүллэр. Уһун уҥуохтаах, кыанар ыал оҕолоро буолан бастакы кэккэҕэ сылдьаллар. Кирилл, Коля, Андрей бары талыллыбыт курдук өй хаата дьон, инникилэрин быһаарына сылдьаллар. Быйыл Саҥа Дьылтан үөрэх ортото Саргы үөрэнэ кэлбитэ, ким да билбэт тоҕо кэлтин, эбээлээх эһэтигэр олорор. Көстөр дьүһүнэ киһи сирбэт киһитэ, арай тоҥкуруун дуу, тугуй дуу, соччо уолаттары кытта өрө сыла, оонньуу күлэ кэпсэппэт. Уолаттар быһаччы улахамсыйар диэн абааһы көрө санаатылар. Кыра соҕустук киэһэ хараҥаҕа куттуур санаа көтөн түстэ…
Биир киэһэ таҥастарын уларыттан, сырайдарыгар мааска кэтэн, дьиэтин суолугар хараҥа муннукка кэтэстилэр. Дьахтар бырааһынньыга чугаһаан онно бэлэмнэнэн киэһэ хойутуу кэлэрин билэллэр. Арай иһиттэхтэринэ ким эрэ атаҕын тыаһа хочугураан иһэр эбит. Киксибиттэрин курдук үс сиртэн саҥата суох тахсан кэллилэр. Умса туттан испит кыыс көнө түстэ, сырайа көстүбэт, халыҥ саарпыганан эриммит. Уолаттар ыган кэллилэр. Өссө куттаары илиилэригэр кылгас мас тутуурдаахтар.онон салгыны охсуолаан көрөллөр. Кыыстара холку баҕайытык саҥата суох турар. Чугаһаан кэлээт бэйэлэрэ да билбэккэ хааллылар, кыыстара өрө көтө түһэн баран иннигэр турар Кирили түөскэ тэппитэ, бирээмэ салгыҥҥа хаста да эргийдэ, онтон соһуйан айаҕын аппыт Коляны хара быарга саайда, төҥкөс гыммытын тобугунан муос хоҥорууга саайда, киһитэ түөрт лабаата адаарыйбытынан тиэрэ таһыллар түстэ, муннун хаана ыһылынна. Андрей ыһыытаан истэҕинэ кыыһа чэпчэки баҕайытык уолугуттан ылан үрдүнэн көтүттэ, чигдигэ түһэн дөйүөрэн ылла. Арай биирдэ истибиттэрэ аттыларыгар кыыс саҥарар, сотору скорай сурулаан кэлэн үһүөннэрин балыыһаҕа илтэ.били тоһуйан куттуох буолбут Саргылара скорайы ыҥырбыт. Уолаттар лаппа эчэйэн хас да күн балыыһаҕа сыттылар. Бэйэлэрэ да билбэтилэр хайа бэйэлээх кыыс тосторун биэрбитин. Айдаан буолла да кими булан ылыахтарай. Хата үһүөн муостара тостон этэҥҥэ оскуоланы бүтэрэн, киэҥ сырдык аартыгынан тус туһунан көттүлэр. Ол курдук хайа бэйэлээххэ киирэн биэртэрэ таабырын буолан хаалла.

Арыылаах, С.