Сөбүлүүр хаһыатым “Эдэр саас” дорообо! Бу мин, тыа кыыһа, суруйабын. Наһаа дол- гуйабын. Суругум ис хоһооно маннык.
Оскуоланы 1998 сылга бүтэрээт орто анал үөрэххэ киирбитим. Маҥнайгы сылым кэннэ билигин академическай уоппускаҕа олоробун. Сөбүлээн ааҕар хаһыатым сүбэлээтин диэн суруйабын.
Мин тулаайах кыыспын. Дьонум суох. Эдьиийбэр иитиллибитим, ол иһин барытыгар оттомноохтук, эппиэтинэстээхтик сыһыаннаһабын. Ол иһигэр күүстээх аҥарга эмиэ. Тулаайахпын диэн бэйэбин түһэриммэппин, дьүһүммүнэн куһаҕана суохпун, доҕоттордоохпун, бэһиэлэйбин. Ол эрэн биир ыйытыы баар.
Бэйэм саастыылаах уолаттартан кими да сөбүлүү көрө иликпин. Бэйэбиттэн быдан аҕа киһини кытары сылдьабын, кинини таптыыбын. Ол маннык. Оскуолаҕа биэчэргэ кэлбитим. Оскуоланы бүтэрэр сылбар онно аан маҥнай өйдөөн көрбүтүм. Кэлэн бэйэтэ кэпсэппитэ. Кини сүрдээх үчүгэй дьүһүннээх, бэйэтин сааһыгар эппиэттээбэт, быдан эдэр курдук. Волейболга куруук көрсөр буолбуппут. Онтон ыла хайдах эрэ кинини наар саныыр буолбутум. Итинник биир ый ааспытын кэннэ мин соҕуруу барбытым, күүлэйдээн кэлэн баран эмиэ көрсүбүтүм. Ол киэһэ кини миигин дьиэбэр атаарбыта. Ити тухары дьүөгэлэрим билбэт этилэр. Аан маҥнайгы көрсүһүүбүт олунньу 23 күнүгэр буолбута. Итинник кыра кыралаан элбээн испитэ. Мин оскуолам кэннэ үөрэххэ туттарсан кэлбитим, эмиэ сылдьыбыппыт, ол тухары кимиэхэ да эппэтэҕим. Истиҥ доҕорум курдук саныырым. Онтум кэнники улахан тапталга кубулуйбута. Ону кини билбэт этэ. Кэнники кэргэннээҕин билбитим. Кинини араарыахпын баҕарбатаҕым, уол оҕотун аһыммытым. Кэргэнэ учуутал этэ.
Күһүн буолан үөрэхпэр барбытым. Онтон саҥа дьылга эмиэ кэлбитим, көрсүбүппүт. Ити тухары биһиги бэйэ-бэйэбитин сөбүлэһэрбитин эппэтэхпит. Бу сылдьарбыт тухары биирдэ да уураспатахпыт, кини эмиэ ону ирдээбэт да этэ. Үөрэхпин бүтэрэн, экзамеммын ситиһиилээхтик туттаран дьиэбэр үөрэ-көтө кэлбитим, онно дьүөгэбэр дьэ эппитим. Соһуйбута аҕай да, туох да диэбэтэҕэ. Сайын устата үчүгэйдик сылдьыбыппыт. Бэйэбэр чугаһаппатаҕым. Иккис сылбар күһүн үөрэххэ барбытым, онтон улаханнык ыалдьан төннөн кэлбитим. Уонна доҕорум атын кыыстыын сылдьарын билбитим. Быһаарсан барбыппыт. Кини миигин таптыырын туһунан эппитэ, онтон мин эмиэ эппэтэҕим. Ол атын кыыһа хаһааҥҥы эрэ дьүөгэм. Мин киниэхэ: “Өскөтүн миигин таптыыр буоллаххына, тоҕо кинилиин сылдьаҕыный? ” — Диэбитим. Ону кини бэйэтэ эккирэтэр диэбитэ. Өссө кини, эн миигин чугаһаппаккын диэн эппитэ. Ол аата кини миигин бэйэтигэр чугаһаппат диэн атын кыыһы туһанаары сылдьар дуо? Уонна миигин таптыыр дуо? Мин

кинини олус таптыыбын да, ол кыыстыын сылдьарын олох өйбөр киллэрбэппин. Аны кинини сүтэриэхпин баҕарбаппын. Оччоҕо хайыыбыный?
Баһаалыста сүбэлээҥ. Баҕар мин курдук тапталлаах дьон бааллара буолуо.

А. Майа.
1999 сыл