👨🏼‍🦳 Мунчаарбыт саха эр киһитэ суруйда:

🦣 Сэлии (мамонт) муоһун аньыыта - харата баар эбит…

Ыарахан санааҕа киирэн суруйарга соруннум.

Муос көрдөөһүнүгэр туруммутум … учугэйдик, кыахтаахтык олоруом диэн.

Олох кэрэтигэр тардыһыы эбитэ дуу, ол саҕана эдэр да этим.

Аньыы - хара диэни билиммэтэҕим!

Билигин эбитэ буоллар, аккаастаныам этэ!

Акаары да эбиппин!

Муос буллахпытына ыраастанар, буруолатар этибит, араас араҥаччылыыр ньыманы барытын туттубуппут!

Туох да туһалаабата!

Муос аньыыта - харата куруутун олоҕуҥ тухары батыһа сылдьар дииллэрэ кырдьык эбит!

Бастакы, иккис сылларым үчүгэйдик ааспыттара.

Харчы бөҕөтүн оҥорбуппут!

Бастакы аньыым ийэбин ылбыта, сүрэҕэ эмискэ тохтообута.

Онтон, аҕам - тойон киһи үлэлии сылдьан саахалга түбэһэн өлбүтэ.

Ол кэнниттэн хайдах эрэ сэрэхэчийбитим: муос аньыыта - харата кэлэр дуу диэммин.

Хайдах эрэ оҕобун, кэргэммин таарыйбатар эрэ ханнык диэн сылдьыбытым.

Муоска сылдьыһар табаарыһым кэргэнэ уҥуох ыарыытынан ыалдьыбыта, билигин орон - тэллэх
киһитэ буолан сытар.

Онтон, бэйэм кэргэним ыалдьыбытыгар иэдэйэ сыспытым, төрүүр - ууһуур буотараҕын быһан кэбиспиттэрэ, ол кэнниттэн оҕо хантан кэлиэҕэй?

Дьиҥэр, уол оҕоҕо баҕарар этим …

Кыыһым улаатан устудьуон буолан үөрэнэ барбыта, ол сылдьан сайыҥҥы куйааска сөтүөлээри ууга былдьаммыта!

Ыарахан да кэмнэр этилэр!

Арыгыга охтон иһэн бэттэх кэлбитим кэргэним көмөтүнэн!

Кини: “Муостаан бүт!” - диирэ да истибэтэҕим.

Оҕобун ылбытын кэннэ туохтан да иҥнибэт буолбутум.

Дьэ, байан - тайан куоракка көһүөххэ диэн буолбута.

Оннук гынан муостуурбун бырахпытым!

Аны, муос аньыыта - харата батыспат ини дии санаабытым.

Аҕыйах сылга үчүгэйдик олорбуппут.

Икки кыбартыыраны, биир даачаны, хас да массыынаны ылыммыппыт.

Киин куоракка таҥас атыылыыр этибит, син харчы киирээччи.

Муостаабытым 14 сыл ааспытын кэннэ аньыым - харам эмиэ кэлэн кэргэммин - күндү киһибин куртах искэн ыарыытынан ыарытыннаран илдьэ барда!

Билигин бу остуолга бүк түһэн олоробун, хараҕым уута тохтоло суох сүүрэр …

Кэргэммин олус да суохтаатым … кини ыраас мичээрин, сылаастык кууһан ыларын!

Кэмсинии бөҕөтүн кэмсинним, соҕотох хааллым!

Муос аньыыта - харата үйэҥ тухары батыһар эбит!

Аны, бэйэм хайдах дьылҕаланарым биллибэт!

Бу икки дьиэ, биир даача туохха наадалаахтарый?

Ол кэриэтин, дьадаҥытык дьоллооохтук олорбутум буоллар кэргэним, оҕом баар буолуо этилэр диэн санаа киирэр.

Манан сурукпун бутэрэбин.

“Бар дьонум муостаамаҥ!” - диэн этиэхпин баҕарбытым.