Имэҥ

    Төһө да ааттан-суоллан, төһө да үллэр үптэн – бу сүрүн соругу толорботох буоллаххына КИһИ ааттаныаҥ дуо, КИһИ дэттэриэҥ дуо? Эн сири бааһырпыт омоон суолгун өтөх талаҕа бүөлүү үүнүө, эрбэһин отунан саба бүрүллүө. Ыччата суох буоллаххына ким эн ааккын ааттыай, кэнэҕэскитэ суох буоллаххына ким эйигин ахтыай.
    Сүрэҕим сүмэтэ, соҕотох кыыһым – Саргым бу күннэргэ улаханнык хомотто. Дьахтар өйө аһынааҕар кылгас диэн итини этэн эрдэхтэрэ. Аныгы дьахталлар суһуохтара өссө кылгаабытынан сылыктаатахха, өйбүт өссө кылгаатаҕа…
    Былыр дьахтар оҕо туһугар олороро. Билигин эр киһи туһугар. Дьахтар оҕо эмтэрээри улахан эмиийгэ баҕарбат. Эр киһини умсугутаары. Ыччатын иитээри кэтит санныны көрдөөбөт. Бэйэтэ көҥүл баайга-дуолга көччүйээри ыйааһыннаах сиэби манаабыт. Ол хомолтолоох, хоргутуулаах. Билиҥҥи эр киһибит уларыйбыт. Кырдьык, уларыйбыт эбит мин оҕом кэпсээнинэн.
    Эмээхсиним барахсан Саргыбын сүрэҕин анныгар илдьэ сырыттаҕына төһөлөөх кэтэспитим буолуой, күнүн-дьылын аахпытым буолуой. Уолаттарбын даҕаны долгуйа күүппүтүм, кэтэспитим. Ол саҕана түһэттэрэр эҥин диэн өй киириэхтээҕэр чугаһынан сыттыын да суоҕа. Оҕо – таҥара бэлэҕэ. Мааныта-далбара. Онтон аккаастаныы улахан аньыы, суураллыбат-сууйуллубат хара дьай.
    Саргым кэргэннэммитэ ыраатта. Ол тухары ат сүүрдэр баараҕай дьиэтигэр эринээн иккиэлэр. Оҕото суох ыалга киһи тэһийбэт, кута-сүрэ тохтообот. Ол курдук кыыспар күнүс сылдьар ыалдьыппын. Куоракка тиийдэхпинэ сыры-сыллата үс бытыгырас оҕолордоох кыра уолбар хонобун-өрүүбүн. Сиэннэрбин кытары бодьуустаһабын, көрү-нары тэрийэбин.
    Эмээхсиним наар Саргы ыалдьар, кыайан оҕоломмот диэн этэрэ. Кыыспын аһынан-харыһыйан биэрэр да этим… Онтум баара, бу күннэргэ биллибитинэн, бэйэлээх бэйэтин эрэ оҕоҕо БА5АРБАТ буолан, хаста да оҕо түһэттэрбит эбит! Иэдээн буолбатах дуо, бу?! Хайдахтаах эр киһи бэйэтин бэйэтэ суох оҥоруон сөбүй?! Хайдах буолбут дьахтар тыыннаах дууһаны хастатан өлөртөрүөй?! Эр киһи бүгүн баар, сарсын суох. Буолаары буолан оннук санаалаах аныгы эр киһи дуома. Оттон ийэтиттэн аккаастаммыт оҕо баарын эһиги истэн-билэн көрбүккүт дуо? Саарбахтыыбын. Ийэ өрүү кыраһыабай, өрүү кэрэ, куруук эдэр – оҕоҕо.
    Соторутааҕыта, Эмиэрикэ учуонай киһитэ оҕо түһэттэрэллэрин УЗИ аппараатынан көрдөрөн дьону уолуппута. Онно дьахтар иһигэр үс нэдиэлэлээх оҕону (мини аборт диэн ааттаан) тугунан эрэ оботторон ылаллар. Онно сордоох айаҕын атан – хаһыытыыр курдук – ол оборчоттон куота сатаахтыыр эбит. Аны үс ыйыгар диэри медицинскэй аборт оҥороллор. Онно оҕону тыыннаахтыы сэймэктээн, быһыта-тырыта тыытан илиитин-атаҕын бысталаан ылаллар эбит… Ама, уонна икки атахтаахтан дьиикэйи көрдөөн көрүҥ эрэ.
Харыстанар тэрил баһаам. Ону туттуохтааҕар тыыннаах дууһаны өлөрөрү ордоруохпут. Тугун сүрэй!
    …Кыыспыттан кэлэйдим, хомойдум, хоргуттум. Көрбөтөх, таптаабатах, быыкаайык илиилэриттэн сиэппэтэх, ньуолах баттахтарын имэрийбэтэх, сыллаабатах сиэннэрбин аһыйдахпын ньии, аһыйдахпын…

Бүөтүр АРЫЫЛААХАП.

Кыым №27 2007.07.12