Эдэр Саас №35 (1.09.1999)

Мин хаһыакка хаһан да суруйан көрбөтөх киһи хайдах саҕалыахпын билбэппин. Онон судургутук суруйарга былааннанным. Хайдах баарынан.
Сааһым 19. Билигин 5 ыйдаах ыарахаммын. Төрөппүттэрим өйдөөбүттэрэ, онтон оҕом аҕата билинэр гынан баран, кыһаммат курдук. Миэхэ уонна оҕотугар хайдах эрэ улаханнык наадыйбат. Аны миигин дьонун кытары билсиһиннэрбитэ эрээри, билигин да күүлэйдиир, биир да дискотеканы көтүппэт. Өссө урукку кыыһыгар эмиэ оҕолоох. Онон билигин иккиэммитигэр хардарыта сылдьар курдук. Сатаатар анарааҥы оҕотун ийэтигэр тиийбэтэҕинэ биир аҥы улахан айдаан тахсар. Оччотугар икки сиринэн сылдьарыгар тиийэр дуо? Мин онтон сылтахтаан үүрэ сатаабытым. Киһим син биир кэлэ турар. Итирэн баран эмиэ кэлээччи. «Эйигин таптыыбын», — диир. Оттон мин ону итэҕэйиэхпин да, итэҕэйимиэхпин да билбэппин. Төһө да таптаатарбын, инники олохпор эрэйи көрсүбэт баҕаттан, истибэтэҕэ буолан тэйитэбин дуу. Баһаалыста миэхэ сүбэлээҥ эрэ.

Улуус кыыһа.
Андрей Апросимов уруһуйа.