Мин билигин билбэт дьоммуттан дьиэ куортамнаһан олорорбун хайдах эрэ сэрэхэдийэр буоллум. Чугас улуускун диэн уопсайга ылбаттар. Хайа уонна бэйэм хаһан баҕарарбынан кэлэрбин-барарбын сөбүлүүр буолан, үөрэммит үс сылым тухары араас дьиэҕэ олордум. Урут абааһы диэннэрэ, баар эбит да буоллаҕына, эргэ мас дьиэҕэ эрэ баар дии саныырым. Оннук буолбатах эбит.

Дьиэ хаһаайката аламаҕай саха дьахтара. Сыаната да сөбүгэр этэ. Уола хаайыыга олорор буолан, ити дьиэтиттэн эбии дохуоттанар. Онон ханна баарын, хайа диэки турарын эппэппин, баалаамаҥ.

Омос көрүүгэ тып-тап курдук хомуллуулаах, бары миэбэлэ, тэрилэ баар дьиэҕэ түбэһэн, мин үөрүү бөҕө этим. Түөрт-хас күн ол курдук күннээн олорбутум. Биирдэ табаарыс уолбуттан хойутаан кэлбитим. Киирэр хос лаампата умайан хаалбыт. Арай атаҕым таҥаһын устуохча буолан, аан диэки сирэйдэнэн кэннибинэн турдахпына, санаабар, хос ааныгар ким эрэ сүөдэллэн турар курдук. Хайыспытым, туох да суох. Онон хараҕым иирдэ ини диэн, бааннаҕа ааһан, илиибин сууна турдум. Ол тухары кэннибиттэн ким эрэ миигин тонолуппакка одуулуур курдук. Көхсүбүн этитэ-этитэ, куукунаҕа ааһан чэй кутуннум. Айаҕым тоҕо эрэ эмискэ кууран хаалбыт курдук этэ. Арай, доҕоор, аан дьиэҕэ сонум сиргэ күр гына сууллан түспэт дуо! Мин кичэйэн ыйаабыппын өйдүүбүн. Быата быстыан иһин, сырдыкка аҕалан көрбүтүм, бүүс-бүтүн.

Үөхсэ-үөхсэ тиийэн иккиһин ыйаатым. Ол кэнниттэн утуйардыы оҥостон сыттым. Мунньулла охсубут “Ватсап” сонунун ааҕан, ити мучумааммын эрэ санаабакка сыттым. Киирии хоско эмиэ куурка сиргэ күр гына түһэрэ иһилиннэ. Бу сырыыга баҕас бэйэбин туораттан көрбүтүм буоллар, хараҕым “орбитатыттан чахчы тахсыа” этэ. Киһи саспыта дуу диэх курдук акаары санаа да киирдэр, суотабайбынан сырдатынан кууркам диэки хаамтым. Хос иһин эргиччи сырдатан көрбүтүм, туох да суох. Кууркабын, тоҕо эбитэ буолла, дэлби сахсыйан баран хат ыйаатым. Ол туран хос иһэ хайдах эрэ никсик сыттааҕын дьиктиргии биллим. Хоспор төннөн, уоппун умуруорбакка, наушникпын кэтэн баран, муусукабын буолунайынан саайан кэбистим. Төһө өр оннук сыппытым буолла, хата, утуйбут этим.

Сарсыарда прихожка ортотугар кууркам сытарын көрөн, сүрдээхтик куттанным. Куортамым төлөбүрүн эрдэттэн төлөспүтүм. Аны хайдах эрэ “абааһыттан куттанан, көһөбүн” диэхпин санаам буолбата. Дьиэ да баҕа хоту көстө охсоро саарбах. Онон сарсыныгар биир кууруска үөрэнэр уолбун ыҥыран, киниэхэ тугу да эппэккэ эрэ хоннордум. Соннорбут тураллар. Ким да сиргэ элиппэтэх. Бэркэ утуйан турдубут. Сарсыныгар хонноро сатаабыппын, субуота эбит, дойдутугар

тахсар буолла. Онон эмиэ бэйэм “элитэр абааһыбын” кытта хонор чинчилэнним.

Лаампа атыылаһан умайбыппын уларыттым. Сырдаан, ханнык да абааһы кэлбэт ини диэх курдук, бэл умуллара соруммакка, хоспор киирэн сыттым. Тэлэбиисэр холбоон баран бииртэн-биир ханаалга эргитэ-эргитэ көрдүм. Туй-сиэ! Аан дьиэҕэ туох эрэ тыаһаата. Тоҕо эрэ олус кыыһырдым. Ойон тахсан көрбүтүм – кууркам сиргэ сытар! Бу сырыыга биэтилэтэ быстыбыт! Онтубун суулуу тутан, хоспор киллэрэн дьыбааҥҥа бырахтым. Идэбинэн наушникпын кэтэн, утуйарга сананным.

Сарсыарда туох да буолбатаҕын курдук уһугуннум. Хайдах эрэ сэниэм суох курдук. Утуйарга дылы гыммытым да, дьэ, тоҕо эрэ оннук.

Ол кэнниттэн хас да күн туох да биллибэтэҕэ. Оттон мин туох да төрүөтэ суох сэниэм эстэн испитэ. Бэл, бииргэ үөрэнэр уолаттарым: «Бу киһи туох буоллуҥ?» – диэхтэригэр дылы. Кимиэхэ да эппэккэ эрэ атын дьиэ көрдүүр мучумааныгар түспүтүм. Арба, өссө кэлин биир түүн баттатан, ийэ-хара көлөһүнүм тахсан уһуктубутум. Сирэйэ бүтүннүү баас буолбут киһи үрдүбэр түһэ сатыыр этэ. Хараҕа диэн сүрдээх, арааһа, өйө көппүт киһи итинник көрөрө эбитэ дуу.

Мин дьолбор, биир дойдулааҕым ипотекаҕа дьиэ ылан, “малосемейкаҕа” баар дьиэтин уларсан, билигин онно олоробун. Сэниэм ол дьиэттэн тахсааппын кытта киирбитэ. Арааһа, ол сиргэ өсөһөн салгыы олорбутум буоллар, бөрүкүтэ суох быһыы тахсыа этэ дии саныыбын.

Уйбаан, устудьуон.

tuymaada 14 мая, 2026