(Сиэр-майгы)

Өр кэмҥэ кэтэһэн, кэпсэтэн көрдүм да хоруй суох. Наҕылыччы санаан-өйдөөн да көрдөххө, куһаҕаннык быһыыланыы суобаһа-майгыта суох, эбиитин иҥсэ-харба санаа ханньары тардыбыт быһыыта-майгыта дии саныыбын. Ону дьон-сэргэ истиитигэр, дьүүлүгэр таһаардахпына эрэ сатанар курдук. Амма дэриэбинэтигэр маннык буолбута.
Үүт тураан олохтоох, 2 оҕолоох ыал дьиэтигэр соҕотохто холорук киирэн өрө ытыйан тахсарыныы түбэлтэ түбүлээбитэ. Дьиэлээх хаһаайка бииргэ төрөөбүт балтын сыбаайбатын тэрийсэ нэһилиэккэ барбыт кэмигэр оскуоланы саҥа бүтэрбит эдэркээн бэйэлээх кыыс, туох да туораны оҥорботохтуу, кыратык да кыбыстар, тардынар сирэйэ суох ыал дьиэтигэр киирэн олохсуйан кэбиһэр.
Хойутуу киэһэ дьиэлээх хаһаайка төннөн кэлбитэ, баһаалыста, дьиэтигэр атын дьахтар күөнтээн олорор буолар. Ол кэннэ туох, ханнык да туһунан кэпсэтиитэ суох, өй-төй да бэрдэрбэккэ, бэрт түргэнник тыас хомунан, дьиэлээх киһини курбачытан, көрдөрбүтүнэн былдьаан илдьэ тахсан, ааны “тип” гына сабан кэбиһэр. Биллибэтинэн сылбыйан киирэн, уоран ылбыт “уохтаах тапталын” кутуругар сөрөөн, хорсун сырыыны оҥорбут быһыытынан дуоһуйа көттөҕө эбээт, кыыс-дьахтар кылаан бэрдэ кини аҕай буолан.

Санаан көрүҥ, төһөлөөх ыар санааны, курутуйууну үөскэппитин. Киһи курдук кыратык да туттунар, саатыргыыр, саатар кэрэйэр санаата кылам гымматаҕын, бэйэтин эрэ үөһэ туппутун.

Амманан, Алдан куоратынан, Дьокуускайынан олохсуйан, бастаан саҥа мас, онтон үстүү хостоох таас дьиэлэрдэнэн талбытынан олоҕу бачаачайдыыр. Таах олоруохтааҕар Алданнааҕы медучилищены үөрэнэн бүтэрэн идэ ылар, онтон Дьокуускай куорат 1 №-дээх төрөтөр дьиэтигэр үлэһит буолар.

Били уоран, талаан ылбыт уохтаах таптала сонуна ааһан, саҥаттан-саҥа санаа, сырыы баҕата баһыйдаҕа буолуо, киһитин дьыалалаан, суутунан арахсан үүрэн кэбиһэр. Үс хостоох таас дьиэлэри икки хостооххо атастаһар. Үүрбүт киһитигэр сүүрэн-көтөн булбут, үлэлээн ылбыт дьиэтиттэн тугу да дук гыммакка, барытын бэйэтэ апчарынар.

Эр киһи кыһыҥҥы тымныыга хонор сирэ суох, аһаҕас халлаан анныгар эрэйэдэнэр. Икки сылы быһа ол-бу хостор муннуктарыгар, ыаллар эҥэрдэригэр бата сатаан, аанньа аһаабакка, таҥныбакка төһөлөөх күннээҕи эрэйгэ, сыллааҕы сыраҕа тэбиллибитэ буолуой?

Киһиэхэ ыллыктаах өй-санаа, саатар кэрээн диэн баара көстөн ааспатаҕа тоҕо сүрэй. Син төһөтүн да иһин 8-9 сыл олорон, биир оҕолонон мунньуммут маллара-саллара эҥин-элбэх буоллаҕа. Мин кырдьаҕас киһи, ийэлэрэ, кэпсэтэн көрдөхпүнэ тугу да көмөлөспөтөххүт диэн айдаарар. Ол эрээри мин ону ылыммаппын. Төһөтүн да иһин биһиги ыал буолбут дьоҥҥо иһити-хомуоһу, оннооҕор идэһэ буолар сүөһүнү сиэтэн, хаамтаран илдьэн биэрэрбит, утуйар хос гарнитурун, сабыс саҥа тутуллубутунан дьиэни туран биэрбиппит, ама ол суолтаҕа турбата буолуо дуо!

Бу олорбут сылларын устата дьиэ, хос төлөбүрэ, оннооҕор кыстык оһоххо оттор мас булуута син биир кырдьаҕастар үрдүлэринэн буолара. Тоҕо олус харбас быһыыный, тыыннаах киһиэхэ сокуон да быһыытынан биир хоһо ананыахтаах буолбатах этэ дуо? !

Бастакыттан олоҕу хараҥа суолунан саҕалаан баран, салгыы барыта сырдыга суохтук, киһи санаатыгар баппаттык түмүктээһин төһө сөптөөх быһыыный? Эбэтэр киһи кыһалҕатын үрдүгэр астык олоҕу туттунан олоробун диэн олоруу, дууһаҕа чэпчэки буолуо дуо? !

Кырдьаҕас ийэ.
Амма.