Мин Силип диэн ааттаах улахан убайым, биир саас дьоһуннук бултуйбутун туһунан кэпсиэхпин баҕарабын. Чурапчы Мырылата кэрэ айылҕатынан, булдунан-алдынан улууска саамай ордуктара буолуо диэтэхпинэ күүркэтии буолбата буолуо.
Биэс саастаах эрдэхпинэ, дэриэбинэ илин өттүгэр турар пиэрмэ уопсайа диэн уһун синньигэс дьиэҕэ олорор этибит. Убайым күөгэйэр күнүгэр сылдьара, холкуоска от тиэйээччинэн үлэлиирэ. Ол сыл дьыл эрдэлээн кэлбит эбит. Күнүн кэлин чуолкайдаабытым — муус устар 18 күнэ эбит. Сир-дойду хаардаах гынан баран, суолга эҥин харалдьык, кыра чалбахтар тахсыбыттара. Убайым атынан от тиэйэ сылдьыбыт. Арай, көрбүтэ арыы харыйа таһыгар Ылдьаана Хомото диэн, урут Маталах күөлэ өрүскэ куотан түспүт хоруу сиригэр кыра чалбах баарыттан сүүрбэччэ көҕөн көтөн тахсыбыттар уонна эргийэн кэлэн хат олорунан кэбиспиттэр. Оччону көрбүт эдэр киһи, отун ситэ тиэйбэккэ эрэ дьиэтин диэки ыстаннарбыт. Ол кэлэн, биир уостаах 16-лаах саатын уонна кур ботуруоннары харбаат төттөрү көтүппүт. Талахтарынан сөрүөстэн үөмэн киирэн көрбүтэ, кустара кыра баҕайы ууга бөлүөхсэ сылдьаллар эбит. Хаһы эрэ хаалларабын дии санаан баран талах нөҥүө ытан хабылыннарбыт. Кустара көтөн тирилэһэн тахсыбыттар, убайым талаҕы силэйэн ыстанан киирбит. Арай, биир эрэ көҕөн кынатын тосту ыттаран баран уҥуор куотан эрэр эбит. Ону иккитэ ытан өлөрбүт. Онтун ылан баран, итиччэ элбэх кустан биири эрэ ылаахтаатаҕым диэн бэйэтиттэн кэлэйбит. Кэлин эрэ доруобунньуктара талах лабааларыттан оҕустарбытын өйдөөбүт. Ол да буоллар, аан бастакы көҕөнү өлөрбүт киһи быһыытынан күн уотугар сыламныы олорбут. Кынат тыаһа куһугуруу түспүтүгэр көрбүтэ, кустара төннөн кэлэн түһэн эрэллэр эбит. Олороллорун кытары ытан саайан иккини хаалларбыт. Өр кэтэһиннэрбэккэ кустара хаттаан кэлэн түһэн биэрбиттэр, бу сырыыга эмиэ иккини бултуйбут. Кур ботуруоннарын сатыылаабыт кустары ытыалаан бүтэрбит. Ол гынан, дьиэтигэр биэс кустаах үөрэн-көтөн кэлбитин олус үчүгэйдик өйдөөн хаалбыппын.
Ити курдук, улахан убайым Филипп Данилович 1955 сыл муус устар 18 күнүгэр, хаардаахха биэс көҕөнү өлөрөн дьону сөхтөрөн турардаах.