Саха эстрадатыгар кэнники сылларга элбэх талааннаах эдэр дьон тахсан иһэллэр. Саҥа ааттар, саҥа ырыалар баар буоллулар. Кинилэртэн биирдэстэрин: Игорь Егоров диэн ааттаах саҥа тахсан эрэр ырыаһыты билиһиннэрэбит. Кини ыллыырын биирдэ эмит истибитиҥ? Сценаҕа ыллыы турарын көрбүтүҥ? Суох да буоллаҕына кэлин хайаан да көрүөҥ дии саныыбыт. Бэйэҥ саастыы (эбэтэр кыратык аҕа) ырыаһыт уол хайдах, тугунан тыынан олорорун билиэххин баҕарарыҥ чуолкай. Оччоҕо дьэ бүтэһик туочукаҕа диэри ааҕарга тиэтэй.
Игорь сааһа 19, зодиага ВОДОЛЕЙ. Ньурбаттан төрүттээх. Музыкальнай училище 3 курсугар үөрэнэр (фортепиано салаатыгар). Быйыл сайын атыы-эргиэн колледжын кэтэхтэн үөрэнэн бүтэрдэ. Майгытынан көнө, аһаҕас, эмоцияларын бэйэтигэр хаайа сылдьыбат. Компанияларга үксүгэр “душа компании” буоларын ордорор, кэпсэтинньэҥ, элбэх табаарыстардаах, кыргыттарга эмиэ успехтаах. Оттон бэйэтин куһаҕан өрүтүнэн барытын бэйэтэ билэринэн эрэ оҥорорун этэр. Дьоҥҥо сыаналыыра: ис-тас кэрэни, эйэҕэс майгыны. Олоххо сыаналыыра: дьоҥҥо убаастабыллаах сыһыан уонна таптал. Сценическэй имиджэ: продюсера этэринэн, Казанова уобараһа сөп түбэһэр (маннык киһи хайдаҕын билбэт буоллаххына, сибис гынабыт: өссө атыннык плейбой, Дон жуан диэн этиэххэ сөп) . Игорь ыра санаатыгар: ” саха дьонугар ырыаларбын бэлэхтиэхпин уонна бары улуустары кэрийиэхпин баҕарабын”. Ити чугастааҕы былааннара, кэнникитэ кистэлэҥ үһү. Кини: ” хас биирдии киһи олоххо бэйэтэ миэстэлээх, үлэлиир сирдээх, баҕарар, астынар дьарыктаах, дьоҥҥо-сэргэҕэ сөбүлэтэр, бэйэтэ духовнай-материальнай өттүнэн тэҥ буолуохтаах” диэн принцибинэн сирдэтинэр.
Туох барыта оҕо саастан саҕаланар, оттон кини оҕо сааһын туһунан кэпсээтэххэ: оҕо садыгар олох “заводила” уонна “запевала” үһү. Ол эрээри мэнигэ бэрт буолан муннугу элбэхтик “харабыллыыр” идэлээх эбит. 1 Кылааска киирэригэр сэргэ музыкальнай оскуолаҕа киирэн, 7 кылааһы (фортепиано) бүтэрбит. Маны таһынан көҥүл тустуунан, дзюдонан дьарыктаммыт. Бу кэмҥэ Юрий Шатуновы кумир оҥосторо. Оскуолаҕа ди-джей, “дьуһуурунай” ырыаһыт, активист быһыытынан биллэр эбит. Бастакы билиниини эмиэ оскуола эркиннэригэр билбитэ: аппаратураҕа хасыһа сылдьан, кыра хаачыстыбалаах да буоллар, оҕолор сүрэхтэрин хамсатар ырыаны, музыканы айан ыллаабыта. Онтон Ньурбатааҕы “Кыталык” культура киинигэр тиийэн, бэйэтэ тылланан, концертарга ыллыыр буолбут. 17 Саастааҕар “Полярная звезда” конкурска лауреат аатын ылбыт.

Онтон дьэ олоҕун музыканы, ырыаны кытта сибээстииргэ сананан, 97с. Музучилищеҕа үөрэнэ киирэр. Дьокуускайга аан бастаан

СГУ КК “Student party” ыллаабыт.
— Эн санааҕар дьиҥнээх ырыа диэн тугуй?
— Ырыа диэн олус элбэх суолталаах, ол эрэн дириҥник ырыппакка этэр буоллахха, ырыаны маннык хайысхаларынан сыаналыахха сөп: 1. Ис хоһооно, матыыба, аранжировката, бу этиллибити барытын холбоотоххо ырыа буолан тахсар. 2. Ол эрээри саамай тутаах оруолу толорооччу оонньуур: кини хайдах ыллаан көрдөрөрүттэн, куолаһыттан, уобараһыттан, туттарыттан-хаптарыттан ырыа сыаналанар. Бу барыта табылыннаҕына биирдэ дьиҥнээх ырыа төрөөн тахсар. Ырыа ис санааҕын атын киһиэхэ тиэрдэргэ “тиксэрээччи” оруолун толорор: тапталга билинии, аккаастаныы, куотунуу — ити курдук бара турар.
—Эн училищеҕа фортепианоҕа классическай музыканы оонньуугун уонна Никольскай таҥара дьиэтигэр камернай айымньылары ыллыыгын. Оттон хайдах эн эстраднай ырыаны классикаттан ордорон ыллыыгын?
— Фортепиано уруогар учууталым сороҕор ити теманы таарыйан ылааччы: “иккиттэн биирин тал” диэччи. Ол эрэн ону ылыммакка, иккиэннэригэр бэриниилээхтик сыһыаннаһабын, инникитин эмиэ оннук буолуо диэн эрэнэбин. Сороҕор субуота киэһэ диско-шоуга түүннэри ыллаан баран, дьиэбэр кэлэн кыратык утуйан ылаат, сарсыарда эрдэ храмҥа архиерейскэй хорга ыллыы барабын. Саха сиригэр итинник хор соҕотох, үтүөлээх артыыстар кытары ыллыыллар. Ол иһин үүнэрбэр, үөрэнэрбэр ити миэхэ элбэҕи биэрдэ. Манна куолаһы оҥорууга (постановка голоса) улахан болҕомтону уураллар, оттон эстрадаҕа “оҥоһуллубатах” да куоластаах киһи ыллыан сөп. Уопсайынан, Саха сиригэр сценаҕа тахсар олус чэпчэки, фонограмма оҥорторор эрэ наада. Хомойуох иһин, үксүгэр хаачыстыба мөлтөх буолар, ол эрээри кэнники үчүгэй студиялар баар буоллулар, хаачыстыбалаах ырыалар элбээн эрэллэр.
— Эн таҥараны итэҕэйэҕин дуо?
— Саха буоларым быһыытынан, таҥара дьиэтин көннөрү музей курдук көрөбүн.
—Ким ырыаларын ыллыыгын?
— Бэйэм 2-3 ырыалардаахпын, ол эрээри үксүгэр Владимир Васильев диэн элбэх үчүгэй аныгы ырыалардаах киһини көрсөн, билигин наар кини ырыаларын толоробун. “Сулусчаана” диэн ырыатынан кини бэйэтэ “Чуона” конкурска Гран-при хаһаайына буолбута. Уһуна суох уҥуохтаах, куудараламмыт курдук баттахтаах, сыанаҕа таҕыстаҕына элбэх саҥалаах, ырыаларыттан иһиттэххэ — олус элбэх тапталлардаах, кыргыттардаах саха биир “красавчик” уола (ш).
Игорь уонна кини табаарыстара училищеларын олус сөбүлүүллэр. Олох атын эйгэ, бары бэйэ-бэйэбитин билсэбит, биир улахан дьиэ кэргэн курдук олоробут диэн кэпсииллэр. Үөрэх бастакы күнэ дьиҥнээх бырааһынньык курдук буолар эбит. Хас сыл ахсын саҥа оҕолор, саҥа билсиһиилэр… “Преподавателлэрбит

биһигини өйдүүллэр, хас биирдиибитин кытта туһунан дьарыктаналлар, бириэмэлэрин, сыраларын харыстаабаттар, ”— дэһэллэр. Интэриэһинэй дьарыктаах, үөрэхтээх дьон: гастролларга сылдьаллар, концертартан иллэҥ буолбаттар, ол эрээри маннык олороллорун, сылдьалларын сирбэттэр.
Оттон Игорь Егоров бэрт сотору баҕа санаатын толорон “Солли Тутти” студияҕа уһултаран, ырыаларын бар дьон дьүүлүгэр таһаарыаҕа.

1999 сыл