Главная / Кэпсээннэр / Аймах албына
Добавить комментарий
Кыра уолчаан ийэтин уҥуоҕун аттыгар, умса туттан олорон ытаан санна дьигиҥниир. Тугу эрэ саҥарар да дьүүлэ биллибэт.
– Чээ тоойуом Русланчик бардыбыт. Массыына күүтэр - тастыҥ эдьиийэ бастаан эйэҕэстик төбөтүн имэрийдэ. Уолчаан истибэтэхтии олорор.
– Бардыбыт диибин дии. Дьон күүтэр! - эдьиийэ санныттан өрө тардан уолчааны дэллэриттэ. Руслан төлө мөҥүөх курдук буолан иһэн барсарыгар тиийдэ. Дьон аһыммыттыы көрөллөр. " Уолчаан барахсаны", " Эдэр сааһыгар бараахтаата" диэн ботур - итир кэпсэтэллэр.
Руслан ийэтэ ыарахан ыарыыга ылларбыта. Соҕуруу эппэрэссийэҕэ барарыгар диэн, ыксаан аҕаларыттан хаалбыт Нива массыынаны урал мотосыкылы атыылаабыта. Москваҕа олорор убайдара уонна харчы ыыппыта. " Маама тоҕо атыылыыгын, мин улааттахпына сүүрдүөм дии!" - уолчаан уулаах харахтарынан чоҕулуччу көрбүтэ. Онуоха ийэтэ барытын кэпсииригэр тиийбитэ. Уол туоҕу эрэ, ырааҕы анааран эрэрдии көрбүтэ. " Оттон тал оччоҕуна, массыыната суох хаалар ордук дуу маамата суох хаалар дуу?" - диэбитэ ийэтэ.
" Суох мама. Эн папа курдук эмиэ кэлбэттии бараары гынаҕын дуо? Барытын атыылыахха " - диэн уолчаан таһырдьа тахсан биэлигин киллэрдэ.
" Мама маны эмиэ атыылыахха. Маны мин дэлби сууйуоҕум. Сатыы сылдьыам буоллаҕа зато эн миэхэ бааргын " диэхтиир.
Ийэтэ уолун уйадытымаары хосхо киирэн, уйа - хайа суох ытаата. Уола киирэн.
" Маама ытаамарыый. Паапа саата эҥин баар дии, ону эмиэ атыылыахпыт " - диэтэ. Иккиэн куустуһан олорон ытаатылар.
Күн сирэ күндү. Уоллаах ийэ бөрөөн - сөрөөн мунньубут харчыларын, аҕаларын саатын сиэйпэтигэр хатаабыттара. Оннук сылдьан ийэтэ ити буолаахтаата.
Руслан эдьиийэ Маргарита уолу иитэ ылла. Руслантан үс сыл аҕа кыыстаах, уонна икки сыл аҕа уоллаах эбит. Маргарита Русланы илдьэ кини дьиэтигэр бардылар.
– Руслан эн ийэҥ харчылаах буолуохтаах этэ дии? Ханна уурбутай?
– Ону хайаары гынаҕын? Эмтэнэригэр диэн мунньубуппут. Уонна успейдаабатыбыт. Ол харчы ити сейфэҕэ баар. Мин улаатыахпар диэри турар. Уонна мин матасыкыл массыына ылыныам - диэн уолчаан эдьиийин диэки көрөр. " Кып кыра эрээри хараҕа сытыытын! " - Маргарита бэйэтин хараҥа санаатыттан кыбыстыбыттыы туора көрдө.
– Бу дьиэни дьоҥҥо куортамныахпыт дии. Ол иһин ити сейфэни арыйыахха наада. Уонна ити харчыны син биир ууруохпут. Эн улааттаххына массыына ылыахпыт буоллаҕа - Маргарита уолу утары көрүмээри сейфэни имэрийбитэ буолла. Руслан итэҕэйэн күлүүһү биэрэригэр тиийдэ.
Эдьиийин ааҕар нэдиэлэ курдук олорбутун кэннэ эдьиийэ икки күн кэлбэтэ.
– Эдьиэй Маргарита тоҕо кэлбэтий? - кыыһыттан ыйытар.
– Соҕуруу күүлэйдии барбыта.
– Оттон
" харчыбыт суох"- диэн кэпсэтэр этигит дии?
– Буллаҕа дии! Барыта эйиэхэ наада!
25.02.2026.
Руслан оҕо саадыгар сылдьар. Дьоҕурдаах буолан бэлиэр ааҕарга суруйарга үөрэннэ. Уонна суоттуурга үчүгэй эбит. Дьиэтигэр кэллэҕинэ үксүн онон дьарыктанар.
" Эһиги бу дьиэтээҕи үлэҕитин санааҕытыттан оҥоруоххутун! Ити кыра уол Руслан бэлиэр ааҕар, суруйар буолбут. Оскуолаҕа киирдэҕинэ отой ыраатыыһы! " - аҕалара Савелий иккис кылааска үөрэнэр уолун Романы кытта, иитиэх уолун Русланы мүнүүтэҕэ аахтаран көрдө. Руслан аҕыйах этиинэн чорбойон таҕыста. Рома маһыттаран кыыһыран буугунуур.
Кэнники аҕалара үлэтиттэн кэллэҕинэ, уола Рома икки сыананы ылбыт буоллаҕына кыйаханар буолла. Уолун Русланынан сирэй - харах анньар. Таһырдьа оонньото ыыппат буолла.
Ол иһин Рома дьоно суохтарыгар сымыйанан " харчыбын уорбуккун!" - диэн баайсан Русланы дьиэтиттэн үүрэн таһаарда. Русланҥа Рома эргэ сонун биэрбиттэрэ, тэллэҕинэн киэҥ буолан тыал көҥүл оонньуур. Уолчаан ойоҕоһо тоҥон шарфигынан курдуу бааммыта , аны кыһыҥҥы чысхаан сирэйин хаарыйар. Уол ыксаан ханна барыан саныыр. Бэйэлэрин дьиэлэрин нэһиилэ булан тиийдэ. Киирбитэ киниттэн обургу икки уолаттар бааллар, уонна кини барыллаата кыысчаан баар. Дьоно көстүбэттэр. Руслан тоҥон тииһэ тииһигэр ыпсыбат.
– Һок! Бу киммит кэллэ? - уолаттар өрүкүнэйэ түстүлэр. Руслан иттэ түһээри бытааннык дорооболоспута буолла.
– Дорообоҥ баппатах буоллаҕына дорообо! Ханна баран иһэҕин? Хайыы сылдьаҕын дуу!?
– Мин манна олоро сылдьыбытым ээ…
– Абырааб ыккын. Оттон билигин биһиги олоробут дии!
– Атыыласпык кыт дуо?
– Ону тоҕо билэ сатаатыҥ?!
– Көннөрү ыйытабын.
– Чэ таҕыс. Мэһэйдээмэ биһиги оонньуубут!
– Тохтоо..ычуу кыратык иттэ түһүөм…
– Иттимэ хайаама! - диэн уолаттар Русланы таһааран хаарга төкүнүттүлэр, буккуйдулар. Эбиитин күлсэ, күлсэ хоонньугар хаары симтилэр. Уонна дьиэлэригэр киирэн хааллылар.
Руслан ытыы сытан баран турда. Хоонньугар хаар киирбит буолан, эбии титирээтэ. Тэйиччи уоттар көстөллөр. " саатар онно тиийэн ханнык эмит подьездка иттибит киһи" диэн санаалаах. Суолу икки гына хааман байаатаҥнаан истэн. Этэ - сиинэ дьагдьайа сатаан баран, устунан итийэн барда. Арай көрбүтэ ханна эрэ ийэтэ ыҥырар. Саҥа хоту тиийбитэ ийэтэ турар. " Хайыаа оҕом тоҥмут дии " диэн кууһан ылла. " Маама эн уонна ханна да барыма, миигин баһаалыста быраҕыма, ыалга хаалларыма! " диэн уолчаан ытыыр.
Русланы дьиэлэриттэн үүрэн таһааран хаарга буккуйбут, уолаттар аҕалара үлэтиттэн кэлэн иһэн, хаарга оҕо сытарын көрдө. Үгүһү элбэҕи токкуйдуу барбакка, дьиэтигэр аҕалла. Аҕалара дьиэҕэ баарыаҥы
уолу көтөҕөн киллэрбитин көрөн соһуйдулар, куттаннылар. Үүрбүт уолаттартан биирдэстэрэ ыалларын уоллара эбит. Дьиэтигэр тахсыбыт.
Сотору ийэлэрэ кэлэн эмиэ айманна.
– Бу оҕону таһырдьаттан булан киллэрдим.
– Оо бу хантан кэлбитий? Кимнээх оҕолоро эбитэ буолла?
– Ити уол баарыан манна иттэ диэн киирбитэ. Ону убайым Владик уонна ити сосед Максим үүрэн таһааран хаарга буккуйбуттара, мин буойталыы сатаабытым - диэн кыысчаан дьонугар эттэ. Русланы аһынан хараҕын уута тахсар.
– Оо бу иэдээни! - диэн дьиэлээхтэр эбии айманнылар.
Владик мөҕүллэн баран Максимҥа таҕыста. Максимы таһырдьа ыҥыран таһаарда.
– Максим дьэ хаайыыга барар дьон буоллубут! - диэн мунна сурдурҕаан сыҥсыйар.
– Аһара дендилаан өйгүнэн бырахтараары гынныҥ дуо? – Максим күлэр.
– Күлэн ырбаҥнаан бүт! Баарыан хаарга буккуйбут уолбут үлүйбүт.
– Оо кырдьык дуо? - Максим күүлэ уотун сырдыгар, дьэ Владик сирэйэ кубарыйбытын өйдөөн көрдө.
– Итэҕэйбэт буоллаххына тахсан көр. Аҕам биһиэхэ киллэрдэ.
– Хайдаҕый тыыннаах дуо?
– Билбэтим. Хамсаабат. Дүлүҥ курдук көтөҕөн киллэрдэ. Миигин дэлби мөхтүлэр.
– Оттон миигин эппэтиҥ ини ?- Максим ыксаата.
– Балтым барытын кэпсээтэ - диир Владик.
27.02.2026.
Ыаллар аҕалара Русланы дэлби массажтаата. Этин эһэ сыатынан сотто.
– Бу оҕо чуолаан тоҕо биһиэхэ кэлбитэ эбитэ буолла?
– Эрдэ манна олоро сылдьыбыттар үһү.
– Оо оччоҕуна бу Савелий Романовичтаах иитиэх оҕолоро буоллаҕа.
– Балыыһаҕа илдьиэххэ.
– Кэбис тохтоо! “Үүрэн таһааран хаарга буккуйбуттар”- диэн оҕолорбутун эрийиэхтэрэ. Халымыр соҕус. Бэйэбит эмтээн көрүөххэ.. температуралаах…хата кыл мүччү түбэһэн булбуппун - дэһэн дьиэлээхтэр кэпсэтэллэр. Русланы түгэх хоско киллэрэн сытыардылар. Уолчаан “этэ умайар” түлээгирэн баллыгырыыр. Ийэтин ыҥырар.
Русланы аҕыйах күн бу ыаллар, олордон эмтээтилэр. Буруйдаах уолаттар кинини бэрийэн бөҕөлөр. Албыннаһан дендилэрин,сегаларын уларсан оонньотоллор.
Руслан эдьиийэ Маргарита күтүөтүнээн Савелийдыын, бастаан иитиэх уоллара баарын суоҕун аахайбатахтара. Онтон киэһэлик оҕолоруттан ыйыттылар.
– Мин үүрбүтүм. Манна олорботун! - уоллара Рома буугунуур.
– Ол эйигин хайаабытыгар үүрэҕин?!
– Эһиги биһигиннээҕэр кинини эрэ ордороҕут. Папа кинини эрэ хайҕаан тахсаҕын! - уоллара ытаары мунна сурдурҕуур.
– Ити оҕону биһиги опекунҥа ылбыппыт. Билигин ханна эрэ тоҥон үлүйбүт буоллаҕына, хаайыыга бардахпытына ким эйигин иитэр?! - Савелий Романович уолун куттаан этэр. Ол тыллартан дьиэлээхтэр бэйэлэрэ дьиксинэн, тахсан Русланы көрдүү сатаатылар. Аҕыйах күн көрдүү сатаан булбакка ыксаан олордохторуна, били дьиэлэрин куортамнаабыт киһи Русланы аҕалан
биэрдэ. Мунан сылдьар оҕо тоҥмутун булан, дьиэтигэр эмтээбитин кэпсээтэ. Икки өттүттэн буруйдаах буолан, мээнэ үгүс кэпсэтии тахсыбата. Оҕо көстүбүт, чэгиэн туруктаах диэн онон, оннук ааста. Тулаайах эрэйдээх - буруйдаах уолчаан олоҕор син биир туох да уларыйыы, чэпчэтии тахсыбата. Көйгө оҕо быһыытынан дьиэ иһигэр " биир муостанан хаамар". Сүрэх баастаах оҕо барахсан, эмиэ тымныыга таһырдьа үүрүөхтэрэ диэн куттанар. Дьиэлээхтэр маастарын таба сатыыр. Этиллибити улгумнук толорон иһэр. Иһит сууйар, муоста сотор. Аһы сатаан да буһарбатар, хортуоска хаҕылаһан санаатыттан көмөлөһө сатыыр. Ол да үрдүнэн син биир булан мөҕүллэр. Тугу эмит булан сиилииллэр. Тэлэбиисэри аһара улаатыннарбыт аатырар. Бөх кэмигэр тоҕуллубатах буолар. Сыччах сөтөлүннэҕинэ " Бу быччаныах ыарыытын сыһыарыа!" диэн буолар. Онон сөтөллөрө, ытырдара да көҥүлэ суох курдук. Эгэ төбөм ыарыйда диэн эмп көрдүүрэ кэлиэ дуо. Оннооҕор буруйа суох кэмигэр да " Бу философ учуонай, мэлдьи туоҕу үөрэтэрий, оскуолаҕа киирэ да илигиттэн! “- диэн була сатаан тыл иһиллэр. Эбэтэр ыаллар бэйэлэрин оҕолоро үөрэхтэригэр кыһамматтарыттан ,кыйыттан ордугурҕууллара эбитэ дуу. Ыаллар этистэхтэринэ " аны мин хаарыллыам " диэн уолчаан куттанан " кутуйах иинин кэҥэтэр “.
Руслан оҕолор курдук дендинэн оонньуон баҕарар. Эдьиийиттэн Маргаритаттан киниэхэ ,денди ылан биэрэригэр ыйытыан баҕарбыта да, тыла тахса илик. Эдьиийэ мэлдьи дьэбин уоһуйа сылдьар курдук. Арай биирдэ арычча көнньүөрэн сылдьар кэмигэр ыйытта. Онуоха уолчаан ыарыһах ийэтэ мунньубут харчытын, апчарыйбыт дьахтар хайыай саҥа дискеттэрдээх денди оонньуу ылан биэрдэ. Ону уоллара Рома былдьаан ылан бэйэтин эргэтин биэрдэ. Туоҕа да суох тулаайах уолчаан онтон санаатын түһэрбэтэ. Эргэ да буоллар бэйэтэ бас билэр оонньуур тэриллэннэ.
Руслан саас халлаан сылыйыыта ,эмиэ үүрүлүннэ. Ыаллар сааскы бырааһынньыкка ыалдьыттары ыҥыртаан, күүлэйдээн аргылаабыт түмүктэригэр Рома биир дьахтартан харчытын уоран баран, Русланҥа баайсыбыта. Савелий холуочугар тэптэрэн уолчааны саҕатыттан таһырдьа анньыбыта.
Тулаайах уолчаан ханна бараахтыай. Көмүскэтэрэ эрэ көмүскэтин уута, харыһылтатара эрэ хараҕын уута буолан, уулусса устун мээнэ хаама тураахтаата.
28.02.2026.
Руслан ийэлээх аҕата ,кини күн сирин көрөрүн биэс сыл күүппүттэрэ. Кэмниэ кэнэҕэс, хомнуо хойут күүтүүлээх оҕолоро күн сирин көрбүтэ. Көрдөр харахтарын дьүккэлэрэ, көтүрдэр тиистэрин миилэтэ буолан, күннэрэ кининэн тахсара ыйдара кининэн киирэрэ. Дьиэлэрин иһигэр оҕо саҥата чаҕааран, дьэки - курус барыта үөрүүнэн туолбута. Олохторо атын өттүнэн түөрэ эргийэн оҕолоро тулаайах хаалан, дьонтон атаҕастанан аһаҕас халлааҥҥа хаалыа эрэ диэн санаа суоҕа. Аҕалара милииссийэ үлэһитэ, хаайыылаахтар күрээбиттэрин тутуһа сылдьан ытыалаһыыга түбэспитэ.
Руслан бөх дьааһыгын хаһан ,дьон бырахпыт аһыттан үссэнэр. Киэһээ теплотрассаҕа киирэн утуйар. Халлаан сылыйан күнүс ичигэс. Иитэр ыалыгар мөҕүллэн - этиллэн сынньыллыахтааҕар манна көҥүлгэ арычча ордук курдук. Уулуссаҕа олорон ытыһын оҕотун тоһуйдаҕына, дьон кэппиэйкэ быраҕар. Онтун да ардыгар атын умнаһыттар былдьаан ылаллар. Уолчаан оҕотук санаатыгар ким күүстээх, былаастаах ол барытын баһылыыр дии, саныыр. Холобура кыра тэллэх ыттан улахан ыт былдьаан ыларыныы Руслан буфет аттыгар дьон ордорбут бирэскитин сиэн ньэмээритэ олордоҕуна, умнаһыт улахан уол былдьаан, хабы тардан ылар. Уолчаан ийэтэ бирэскини хатаҕалаан сиэтэ сатыырын саныыр. Хараҕа ууланар. Иитэ ылбыт эппэкиин дьон буруйга - сэмэҕэ тардыллымаары Русланы уулуссаттан булан аҕалбыттара. Эдьиийэ Маргарита уонна кыыстара, " фуу! - фаа! " буолан сиргэнэн уолчаан таҥаһын таһырдьа уһултарбыттара. Киирэн сууммутун кэннэ Рома кыччаабыт ыраас таҥаһын кэтэрдибиттэрэ. Сарсыныгар оҕо дьиэтигэр илдьибиттэрэ. Приют салалтатыгар киирэн. Русланы отой кыайтарбат, санаата да баран хаалар уорар идэлээх, киһи тылын истибэт ,этиһэр. Маннык кэмэлдьилээх оҕону кыайан ииппэппит- диэн сымыйанан кэпсээн туран сайабылыанньа суруйдулар.
Соһуйуохтарын иһин уолчаан, улахан киһилии туттан туран барытын кэпсээтэ. Ийэтэ олохтон барбытын кэннэ эдьиийэ Маргарита, ийэтэ эмтэнээри мунньубут харчытын сейфэлэриттэн хостоон ылбытын уонна дьиэлэрин атыылаабытын дуу, куортамнаабытын дуу кэпсээтэ. Савелийдаах Маргарита биир биэс тылы саҥарбат уоллара, хантан маннык эр санаа булан, чобуо баҕайдык эппитин көрөн, соһуйан тиэрэ кэлэн түһэ сыстылар.
01.03.2026.
Руслан опекун дьонун туһунан кэпсээбитин, оҕо дьиэтин дириэктэрэ бастаан сөхпүттүү көрдө. Итэҕэйиэх курдук буолбутугар, иитэр опекуннар уу тэстибэт гына этэн быһааран кэбистилэр.
" Бу оҕону итэҕэйимэҥ ,дьэ киһи итэҕэйиэн эрэ курдук оҥорон кэпсиир идэлээх. Ончу фантазер! Сороҕор бэйэбит кинини итэҕэйэн киирэн биэрээхтиибит!” - дииллэр. Уолу приютка туттаран таҕыстылар. Көрүдүөргэ Руслан эдьиийин Маргаританы кэлэйбиттии көрөр. Тулаайах уолчаан баайын апчарыйбыт эдьиийэ киһи эрэ буоллар, уулаах харахтары утары кыайан көрбөккө, мүлтү - халты туттар.
– Эдьиэй баһаалыста тохтоо эрэ, биир этэрдээхпин - уолчаан тохтотто.
– Туох баарый? эт чэ!
– Маамам баарыгар эйигин наһаа үчүгэйдик саныыр этэ…эдьийиҥ Маргарита көрө - истэ сылдьыа диэбитэ…уонна миигин эдьиийиҥ тылын истэр буолаар диэбитэ. Ол иһин мин биир да тылы өрө саҥарбакка, эппиккин барытын толорор этим - диэн эппитигэр Маргарита киһи эрэ буоллар, суобаһа оонньообута эбитэ дуу, ханна эрэ ыксаабыта эбитэ дуу, тахсар ааны былдьаста.
**
Русланҥа оҕо дьиэтигэр атын олох саҕаланна. Биллэн турар улахан уолаттар оройун чопчуйалларын аахсыбатахха, мантан ким да уулуссаҕа үүрэн таһаарбат. Бөх дьааһыгыттан ас көрдүүр курдук буолуо дуо. Син аһаталлар. Манна бэйэтин курдук тулаайах оҕолор бааллар. Төгүрүк тулаайах да буолбатар, элбэх оҕону төрөтөн иһэн - аһаан, эбэтэр үлэ булан үлэлээбэккэ ыксаан оҕолорун приютка биэрбиттэрэ да бааллар. Руслан бэйэтин барыллаата оҕолору кытта билистэ. Оҕолор барахсаттар бэйэлэрин эрэйдээх олохторун кэпсэтэннэр, бэйэ бэйэлэрин аһынсаннар харахтарын уутун соттоллор.
Русланы эдьиийэ сымыйанан эбэн - сабан ,сүрдээн - кэптээн кэпсээбитин курдук буолбакка, сүрдээх дьоһуннаах, өйдөөх оҕо буоларын, оҕо дьиэтин иитээччилэрэ биллилэр. Эбиитин саҥа суотабай төлөпүөн үөдүйэн эрэрин, киниэхэ хастараллар, оҥоттороллор. Спутниковай антеннаны холбууру сатыыр. Тэлэбиисэри да хасыһар. Ол иһин хатаҕалаан да аһаталлар. Обургу уолаттар ону көрөн сөбүлээбэттэр. Руслан ардыгар кырбаннаҕына да үҥсэргээбэт.
Руслан биирдэ утуйа сыттаҕына, икки уон биэс саастаах уолаттар түүн туруоран илдьэ бардылар. Олорор уопсайдарыттан үөмэн таҕыстылар. Руслан уутугар аҥарыйа сылдьар буолан өйдөөбөтө. " Ханна илдьэҕитий?! " диэн ыйыттаҕына саҥарбаттар. Сирэйигэр сутурук үҥүлүтэллэр. Хараҥаҕа ханна эрэ аҕаллылар. Уолчаан өйдөөн көрбүтэ арааһа маҕаһыыны халыы кэлбиттэр. Иһиттэн таһыгар килиэп уган биэрэр хорууданан уолчааны уган киллэрээри гыналлар. " Суох мин харчыны уорбаппын! " - диэбитигэр быарга оҕустулар, онуоха охтон түһэн түүрүллэн баран ,тыынын ыла сатыыр.
02.03.2026.
Русланы түүннэри күһэйэн аҕалан, күүстэринэн маҕаһыыны халата, киллэрээри туран аймаммыт саҥаларын истэн маныыһыт киһи кэлэн иһэрэ билиннэ. Руслан быарга охсуллан тыынын нэһиилэ ылла. Уолаттар кинини өрө тардан туруоран куотар аакка бардылар. Былааннара туолбатаҕар кыбдьырыналлар. " Кимиэхэ эмит кэпсиэҥ да сэрэн. Аныгыскыга атын маҕаһыыҥҥа барыахпыт! " – дэһэллэр.
Марфа Григорьевна уонна Геннадий Петрович иккиэн, институтка үлэлииллэр. Геннадий Петрович дириэктэр солбуйааччыта, кэргэнэ Марфа Григорьевна преподователь. Түөрт уон саастарын ааһыахтарыгар диэри оҕолоро суох. Икки төгүл сатамматаҕа. Эмтэнэн да көрбүттэрэ. Оҕо дьиэтиттэн оҕо иитэ ылаары өр сүбэлэстилэр. Кыраны ылыахтарын иккиэн ,үлэҕэ умса түһэ сылдьар буолан арычча обургуну ылыахтарын сананнылар. Иккиэн дет.домҥа тиийбиттэрин таллардылар. Онон оҕолору сирийэн көрөллөр. Бу диэн кими талыахтарын билбэттэр. Оҕо бөҕө сүүрэккэлиир, мэниктиир. Марфа Григорьевна биир кыыс оҕону сөбүлүү көрдө. Геннадий Петрович Русланҥа чугаһаата. Кини көрдөҕүнэ оҕоттон эрэ ураты курдук. Тумбочкаҕа кинигэлэрэ бааллар. Уонна туоҕу эрэ суруйар ,ааҕар. Геннадий тиийэн иитээччиттэн Руслан туһунан ыйытар. " Саамай бэрээдэктээх, дьоһуннаах, өйдөөх оҕобут. Оҕолор кинини " философ” диэн хос ааттыыллар" диир. Русланы хоско киллэрэн кэпсэттилэр. " Бу ыаллар эйигин иитэ ылыахтарын баҕараллар . Сөбүлэһиэҥ этэ дуо"?- диэн ыйыппыттарын уол тута саҥарбатар да, өйдөөх харахтарынан кэриччи, үөрэтэрдии көрүтэлиир. Санаатыгар онно тиийэн эмиэ ,хайдах дьылҕаланара биллибэт. Сүрэх баастаах оҕо санаата ханна тиийэн алдьамматаҕа баарай.
" Чэ быһаарынан этэ оҕус. Оҕо эрэ элбэх, эн эрэ буолбатах. Бу үөрэхтээх, интэлигиэнтнэй ыалларга барар үчүгэй шанс эрэ буоллаҕа! Хайыыгын!? " - баспытаатал токкуйдуу сатыы олорор уолу, ситэ күүппэккэ ыксатар. Русланҥа бүгүн улахан уолаттар " бэлэм сылдьаар бүгүн барыахпыт! " - диэн хараҥа дьыалаларыгар кыттыһыннараары кулгааҕар ботугураан эппиттэрэ. Илиитин кымаахтаан кыбдьырыммыттара. Уолчаан санаатыгар " дьолго " барсар шанс көһүннэ диэн буолбакка , " сортон " куотар шанс диэн курдук буолла. Маҕаһыыны халаан баран бэйэлэрэ ыраас хаалан, син биир кинини уган биэриэхтэрэ. Оччоҕуна хаайыыга бардаҕына, олоҕор эбии эрэйдэниэҕэ…
Маргарита эмискэ ыйытыкка кыайан хоруйдаабакка туран чэй куппута буолла.
– Русланы дет.домҥа биэрбиппит. Кыайан көрөр кыахпыт суох. Киһи тылын истибэт…түүннэри баран хаалар. Бэйэм да оҕолорбун нэһиилэ ииттэхпинэ сөп - Маргарита бөлүүһэттэн үүттээх чэй иһэн сыпсырыйар. Евгений тулаайах уолчаан туһунан ыйытта да аһын бэрийбитэ буолан хаалар.
– Руслан миэхэ сурук суруйбута саҥа тиийбит, ону туппутум - диир Евгений.
– Москваҕа сурук суруйан ыытар эбит да ол биэс саастаах оҕо - Маргарита билбэтэҕэ буолар.
– Да еще как суруйар эбит - диэн Руслан суругун биэрдэ. Онно уолчаан ийэтэ хаһан олохтон туораабытын, мөлүйүөнүнэн харчыны эдьиийэ Маргарита сейфэттэн ылбытын, дьиэлэрин атыылаабыттарын тиийэ суруйбут. Маргарита " сымыйа !!" диэн баран ойон туруоҕун, барыта дьүһүнүттэн көстөн турар буоллаҕа. Уонна ханна эрэ иһин түгэҕэр суобаһын оҕото сөҥөн хаалбыта онто туппута эбитэ дуу. Кыайан мэлдьэспэтэ.
– Оҕону иитэр манан аҕай буолбатах.. аһа.. таҥаһа…саатар моҕуһа диибин диэн! - силбиэтэнэр киибэһэ киирээри сүнньэ босхо барда.
– Ол оҕо биир сыл иһигэр төһөккөөнү аһаабыт таҥныбыт үһү?!
– Төннөрүллүө! Бэйэтигэр эппитим улааттаххына төннөрүөм диэн! Ону быһаарса манна кэлбит эбиккин дии!
– Тулаайах уолчааны син биир ким эмит көмүскэһиэхтээх буоллаҕа дии! - диэн Евгений Маргаритаҕа племянниктара Руслан, уон аҕыс сааһын туоллаҕына балтараа мөлүйүөнү төлүөм диэн кумааҕыга суруттаран илии баттатта. Ол кэмҥэ ити сумма баһаам буоллаҕа.
Евгений оҕо дьиэтигэр тиийэн Русланы ыйыппытын, ыаллар иитэ ылбыттарын эттилэр. Адрыстарын ылан аны онно тиийдэ.
Марфа Григорьевна кытта Геннадий Петрович иитэ ылан сөбүлээн ,бэлиэр киниэхэ убаммыт уолларыгар эмискэ ханнык эрэ аймахтара күөрэйбитигэр соһуйдулар. Евгений уолу Москваҕа илдьэ барар санаалааҕын истэн сүөм түстүлэр. Онтон Руслан " Суох мин кинилэртэн ханна да барбаппын ! Кинилэр билигин миэхэ, ийэм уонна аҕам буолаллар!" - диэбитигэр долгуйан, кистии саба харахтарын уутун сотуннулар.
" Мин көннөрү эн санааҕын билээри гыммытым. Оннук буоллаҕына бэрт дии " - диэн таайа кэһиитин биэрдэ. “Оскуолаҕын бүтэрэн үөрэххэ киириэҥ. Баҕар Москваҕа кэлэн туттарсыаҥ. Онно биһиги да өйүөхпүт. Чэ этэҥҥэ буол!” - диэн таайа алҕаан баран барбыта.
Сыл - хонук. Руслан оскуоланы туйгун сыанаҕа, кыһыл дипломунан бүтэрбитэ. Москваҕа үрдүк үөрэҕи эмиэ бүтэрэн кэлэн, билигин институтка дириэктэрдиир. Үтүө үлэтин көрдөрөн, наҕыраада, чиэс бочуот бөҕө. Маргариталаах хаһан эрэ уулуссаҕа анньыбыттарыгар, бөх дьааһыгын хаһа сылдьыбыт оҕолорун Россия каналыгар тэлэбиисэргэ көрдөрбүттэрин сөҕө көрдүлэр. Отучча саастаах мааны киһи буолбут, бу этэрэ тыынара эриэккэһин. Туох эрэ учуонай буолара эрдэттэн биллэрэ. Билигин интэриниэти баһылаан , приложение оҥорон бу күөх экраҥҥа көстөр. Үөрэтэр оҕолоро эмиэ үрдүк ситиһиилэммиттэр.
Маргарита бэйэтин күлүгээннээн, хаайыыга киирбит уолун Романы санаан, хараастан ылла. Өссө онтон харчы көрдүү сытар. Кыыстара эргэ тахсан барбыта да кинилэри умунна. Эрийэн кэпсэппэт даҕаны.Хаһан эмит пенсийэлэрин көрдөөрү гыннаҕына эрэ биллэр. Маргарита балыыһаҕа көрдөрүммүтэ, быраас эппит ынырык диагноһа кулгааҕын тэһитэ кэйиэлиир курдук. “Хантан харчы булан эмтэнэр?” " Кырыыстаах сейфэ! Аны ити уол Руслан кэлэн харчытын ирдэстэҕинэ иэдээн! Барыта наар аанньа" - Маргарита ыалдьар сирин туттан, ынчыктаан ылла.
06.03.2026.
Маргарита уола Рома хаайыыттан босхолонон тахсыбыт. Куорат шайкаларын кытта куодарыһыаҕыттан үөрэҕэр да кыһаммат буолбута. Чэпчэки харчы хантан кэлэрин билэн онно аһара үлүһүйэн барбыттара. Сойуус ыһыллан, тас дойдуттан омуктары киллэртээн атыы - кутуу дэлэйиитэ бандалар баар буолбуттара. Ромалаах эмиэ шайка тэринэн эргиэмсиктэртэн нолуок курдук харчы ылар этилэр. Ол сылдьан киһини эчэтэн сууттаммыттара. " Уолбут Рома куһаҕан уолаттары булсан иэдэйдэ!" - диэн дьоно атын оҕолору буруйдуур этилэр. Дьиҥэр бэйэлэрэ аһара тараҥната ииппиттэрэ. Туоҕу эмит көрдөөтө да ыла охсон биэрэллэрэ. Уоллара онно үөрэнэн тугу эмит ылбатылар да өчөһөн баран хаалара. Ол иһин араас биэликтэн саҕалаан, “Рига” мопед, " Ява", " Иж Планета Спорт" мотосыкыллары ылаллара. Уоллара кэнники “массыына наада”- диэбитигэр Руслан уурумньу харчытынан " Волга " массыына ылбыттара.
Эрдэ Руслан ийэтэ ыалдьан ыксаан харчыга наадыйан " Нива " массыынатын атыылаабыта. Оччолорго кырачаан Руслан ийэтин күн сириттэн сүтэримээри, үс кыырыктаах биэлигин эмиэ атыылаары хараҕыттан уу - хаар баһан тураахтаабыта.
Маргарита уола Рома ол да " Волга" массыынаны өр гымматаҕа. Шайкатынаан арыгылыы сылдьан көтүтэн, үлтү түспүттэрэ эбиитин атын дьон массыынатын тоҕо астаран ботуччу ыстарааптаммыта. Ону биллэн турар дьоно төлөөбүттэрэ. Кэнники Ромаларын суутугар адвокатка эмиэ төлөөрү устунан мөлтөөн ахсаан, быстаран барбыттара. Дьиэлэрэ да эргэрбитэ.
" Туох буруйбут, аньыыбыт харабыт иһин? !" - диэн Савелий холуочуйан ойоҕун диэки таайтарардыы көрбүтэ. Онуоха Маргарита бокуонньук балтын, үүрбүт племяннигын санаан туора көрбүтэ, хараҕын куоттарбыта.
Билигин сааһыран мөлтүүр - ахсыыр , ыалдьар кэмнэригэр эбиитин уоллара Рома хаайыыттан тахсан эрэйдиир. Хаайыыттан майгыта - сигилитэ алдьанан тахсыбыт.
Рома Руслан туһунан дьонуттан истибитэ. Эрдэ охсо - тэбэ сылдьыбыт уола улаатан, үөрэхтээх баһырхай хамнастанан, дьиэлэнэн - уоттанан үүнэн - сайдан тахсыбытын, бэйэтин олоҕор тэҥнээн ордугурҕуу санаабыта. Эбиитин били харчы иэстэрин ирдэһиэ диэн, хайдах эрэ Русланы суох гынар санаа киирбитэ. Урукку шайкатыттан биир икки уол хаалбытыттан, кинилэргэ тиийэн сүбэлэһиэн санаата.
08.03.2026.
Русланы иитэн улаатыннарбыт Марфа Григорьевна уонна Геннадий Петрович, билигин пенсийэҕэ тахсан бочуоттаах сынньалаҥҥа олороллор. Санааларыгар Русланнара ыал буоларын күүтэллэр. Руслан бастаан үөрэххэ, онтон үлэҕэ умса түһэн кыыс диэҥҥэ кыһаммат этэ, иллэҥэ да суоҕа. Кыргыттар билсэ , сырса сатаан баран " ботаник " дииллэрэ.
Руслан аны санаатаҕына кини саастыылаахтара, бииргэ үөрэммиттэрэ ыал буолан ырааппыттар. Кырдьык даҕаны ыал буолан оҕо уруу төрөттөҕүнэ эрэ, кинилэр, сыдьааннара араспаанньалара хаалыыһы. Ийэлээх аҕата эдэрдэригэр да бараахтаабыттар эбит. Этэҥҥэ эбитэ буоллар өссө оҕолонуохтара эбитэ дуу. Руслан кыыс оҕолоноро буоллар ийэтин аатын биэриэ этэ. Кэргэннэнэ да илигиттэн оҕолонорун санаабытыттан, сонньуйан күлэн ылла. Ийэтин хаартыскатын портретка оҥотторбута иилиллэн турар. Уолун диэки санньыйбыттыы көрөр. " Үтүө киһи буолаар…" диэн эппит тыллара хатыланан, кулгааҕар сипсийэр курдук. Ийэтин сүтэриэҕиттэн төһөлөөх эрэйи көрбүтэй. Дьиэлэриттэн үүрбүттэригэр үлүйэ да сыспыта. Бөх дьааһыгын хаһан, килиэп хоручуоскатын хачыгыратарын оҕолор күлэ, күлэ ааһаллара. Эдьиийэ Маргарита чанчыгыттан тардара, Рома охсон - тэбэн көрөрө Рома эдьиийэ күлэн сыһыгырыыра хараҕар көстөн ааста. Бу билигин икки этээстээх дьиэҕэ ,собус соҕотох олорор . Ииппит дьоно бэйэлэрэ туспа олороллор. Руслан баҕар туспа олордоҕуна кэргэннэниэ диэн сэмээр күүтэллэр. Марфа Григорьевна " Бу үлүгэр улахан дьиэҕэ аскын астыыр, таҥаскын сууйар кэргэн наада, хайа уонна оҕо саҥата чаҕаарыа дии. Биһиги даҕаны кэлэн сиэннэрбитин көрүө этибит" диэбитэ.
Руслан студенныы сылдьан Зина диэн кыыстыын билсибитэ. Билсэн да диэн үөрэҕэр үлүһүйэн, бу кыыстыын билсэн сылдьабын да диэбэт курдуга. Курсовойун суруйан кыыска көмөлөһөрө. Зина күн аайы киниэхэ бэйэтэ кэлэн кэпсэтэрэ. Уолтан тугу эрэ эрэйэр курдуга. Руслан бу санаатаҕына Зина кинини сөбүлээбит курдуга. Атын уолаттар курдук кинини ухаасыбайдаабатаҕа. Арай аттыгар чочуонай таһаалаах, уһун суһуохтаах, нарын кыыс баара үчүгэй эрэ курдуга. Ис сүрэҕиттэн тугу эрэ таайтаран кэпсэтэ сатыыра. Арай үөрэҕиттэн быыс булан киһилии билсибитэ буоллар ,баҕар манна оҕолор саҥалара чаҕаарыа этэ дуо? - Руслан ааспыт уонна, инники олоҕун санаан үөһээ тыынна. Билигин Зина ханна баара буолла? Нүөмэрин булбут киһи - дии саныыр.
Арай ханнык эрэ биир кыыс кинини кытта, интэриниэтинэн билсэ сатыыр. Эппиэттээбэккэ гынан баран бүгүн дьэ суруйда. Ону эрэ күүппүттүү ол кыыс эрийдэ. Саҥалаах иҥэлээх эбит. Уол адырыһын ылан ойон кэллэ. Хаартыскатыгар көрөр курдук, аһара эдэр кырасабысса буолбатах эбит. Соноон эрэр отут түөрт саастаах дьахтар. Устунан отой да баайсан кэбистэ. Дьахтар аймаҕы дьарыйбатах, кэрэ куолары кытта мээнэ кэпсэппэтэх уолу ынньаҕалатан сүрдээх. Марфа Григорьевна кэнники билбитэ үс оҕолоох, эриттэн арахсыбыт татаар хааннаах Фатима диэн дьахтар эбит. Руслан хайдах да диэн тыла тахсан үүрэр кыаҕа суох. Дьахтар устунан баайсан дьиэтийэн хаалла.
Маргариталаахха сыаналаах омук массыыната кэлэн тохтоото. Маргарита түннүгүнэн көрбүтэ, бэрт мааны киһи түстэ. Бу кинилэр оҕо сырыттаҕына, санаатылар да саҕатыттан таһырдьа анньар тулаайах уоллара Руслан буоларын биллэ. Маргарита барыах - кэлиэх сирин билбэтэ. Утары көрсөн илэ - сала көрсүөх курдук буолан иһэн, оронугар баран сытынан кэбистэ.
– Дорообо лоруҥ. Дьиэлээхтэр бааргыт дуо? - Руслан киирэн аан хостон өҥөҥнүүр.
– Ким киирдэ? - хостон кэһиэхтээх саҥа иһиллэр.
– Мин Русламмын.
– Ээ оҕобут кэлбит эбиккин дуу. Көрбөтөх ырааппыт. Сыгынньахтан киир, аас - Маргарита айалаан - дьойолоон чэй бэлэмниир. " Били чолоҕор!" " Илэчиискэ! " диэн Русланҥа анаммыт кырыктаах тыллары истибит аҕай уолга " Оҕобут " диэн тыл дьиктитик иһилиннэ. Баҕар ол кэмҥэ " оҕобут" диэн тылы истэн ким эрэ аһынна диэн, уолчаан хараҕа ууланыа эбитэ дуу. Билигин истэн сонньуйар эрэ. Аҕалара үлэтигэр барбыт. Кини да сааһыран мөлтөөн ахсаан сылдьар. Уоллара Рома ханна эрэ барбыта хас да хоммут. Чэйдии олорон ону маны кэпсэттилэр. Маргарита быраата харчытын иэһин көрдөөбөтүн сэрэйэн, эмтэммэт ыарыытын кэпсээтэ. Аһыннараары устунан ытамньыйан ылла.
– Эдьиэй күн сарсын көрдөрүнэ барыах.
– Харчым суох буоллаҕа дии. Били эн иэскин да биэрэр кыахпыт суох – аһыннарбыттыы эттэ.
– Ол иэһи мин аахсыбаппын. Ааспыт да ааспыт буоллаҕа дии.
– Оо махтал тоойуом. Ийэҥ эмиэ үтүө да киһи этэ. Миигин бука диэн баалаама, алы гын дуу.
– Мин тугу да санаабар туппаппын. Манна көрдөрүнэн баран устунан Москваҕа бараар. Евгений убайбыт тоһуйуо мин кэпсэтиэм. Харчыга төбөҕүн ыарытыма мин барытын бэйэм төлүөм.
– Оҕобут барахсан үтүө да санаалаах эбиккин. Өссө төгүл бырастыы гын. Бу аньыыбытыгар харабытыгар маннык буоллубут - диэн Маргарита ытамньыйда. Руслан эдьиийин ааттаан баран. Төлөпүөнүн нүөмэрин ылан баран дьиэлээтэ. Тиийбитэ Фатима үчүгэмсийэн сиэркилэ иннигэр краскалана олорор . Тугу да буһарбатах.
" Кафеттан сииргэ туоҕу да ылан кэлбэтиҥ да? " - диэннээх. Эбиитин " Эн Маргаритаҕа харчыгын тоҕо биэрэҕин?! Оҕолордоох дии көмөлөстүннэр ээ! " - диир. Фатима баҕата диэн курортка сынньаныы, көрүлээһин эбит.Уонна сыаналаах бэлэх ылаары араастаан иҥээҥниир. Руслан кинини үс оҕолооҕун, эрдэнэ сылдьыбытын да билээхтээбэт.
09.03.2026
Марфа Григорьевна уола кэмниэ кэнэҕэс ,хомнуо хойут кыыс булан аҕалбытын истэн үөрбүтэ. Онтон үс оҕолоох дьахтар уолларын, куйаар ситиминэн билсэн , устунан бэйэтинэн баайсан кэлбитин истэн, тириитин таһынан ылыммыта.
Дьүөгэтигэр кэпсээбитин төттөрү өттүн эппитэ.
– Билигин оннуктар холбоһон кимнээҕэр үчүгэйдик олороллор дии.
– Үс оҕо диэн элбэҕэ бэрт дии, саатар биир буолуоҕун.
– Оҕо да оҕо диэбитиҥ дии. Дьэ сиэн оҕо бөҕөнү аҕалар кийиит көстүбүт дии. Уолгутугар эмиэ оҕо төрөтүөҕэ. Руслан Тулаайах оҕолорго көмөлөһөр сурахтааҕа - дьүөгэтэ эппитигэр,сөбүлэһиэх курдук буолбута. Марфа Григорьевна уолун ааҕар баран нэдиэлэ курдук олордо.
Бастаан дьүөгэтэ эппитигэр, сөбүлэһиэх курдук буолбута этэ да ол санаата сүттэ. Барыта наар аанньа дьахтар түбэһээхтээбитин биллэ. Үс оҕолоох буолуо ини, таҥас сууйбат, ас астаабат буолуо ини. Санаатыгар уолларын " подкаблучник" оҥостууһу. Күнү быһа төлөпүөнү тутан баран сытар. Өссө ханнык эрэ киһилиин кэпсэтэр быһыылаах.
– Руслан кэлэригэр эбиэт буһарыахха наада дии - Марфа Григорьевна эттэ.
– Маҕаһыы нтан наскоряк буһар астары ылан кэлиэх буолбута - баһынан баайсыбыт кийиит хата кыһаммат. Үчүгэмсийэн олорон сиэркилэҕэ көрүнэн краскаланар. Тарбыйах гиэнин курдук хойуу уһун кыламаны олордубута, халтаһата уйбакка хараҕа симириҥниир.
– Эн оттон ас астаабат, таҥаһы, дьиэни сууйбат буоллаххына хайыы кэлбиккиний?! – Марфа Григорьевна төһөлөөх уолаттары, кыргыттары үөрэппитэй. Ким хайдах майгылааҕын өтө көрөн билэрин кэриэтэ. Бу дьахтар уолларын эрэйдииһи дии санаата.
– Айуу чэ! Сууйуллуо буоллаҕа - туох үлүгэр ыксаатыҥ! – диэн соноон эрэр дьахтар оҥоһуу кыламанын симириҥнэтэр.
Марфа Григорьевна уоллара дьахтар аймахха кэнэнин , өс киирбэҕин дьэ биллэ.Буолумуна үөрэххэ умса түһэ сылдьан. Уонна бэйэлэрэ эмиэ " Үөрэххэр кыһан , кыыс аймахха пока санааҕын уурума " – дииллэрэ.
Руслан маҕаһыынтан ас бөҕө ылан кэллэ. " Мама кэл аһыыбыт " диэн ыҥырбытын барбата. Хостон кэпсэтэллэрин истэ сытта. Баайсыбыт кийиит саҥата " Хаһан курортка барабыт " " Мин сотору төрөөбүт күнүм, кимнээҕи ыҥыртыыбыт? " диир. Уонна бэлэх эрэйбиттии этэр саҥата иһиллэр.
Руслан үлэтин туһунан, сонунун кэпсиирин истэ да барбат. Быһа түһэн бэйэтэ туһанарын эрэ этэ сатыыр. Уонна сибигинэйэ былаан " Ити старушка хаһан дьиэлиирий зкб гынаары гынна! " диэбитин Марфа Григорьевна иһиттэ. Уонна уола туох диирин тыыммакка да кэтэстэ.
– Эн мин ийэбин мээнэ итинник диэмэ! - Руслан бу бастакы куолаһын сонотуута этэ. Марфа Григорьевна дьахтар сирэйин көрүөн баҕарда. Хос быыһынан өҥөҥнүөх курдук буолан иһэн, ситэри кинилэргэ тиийдэ. Дьахтар сирэйэ дьэс алтанныы кытарбыт.
– Турдуҥ да ийээ. Олорон чэйдээ - диэн уола үүттээх чэй кутта.
– Күн аайы маҕаһыын аһынан аһыыбыт дии. Бэйэ буһарыныахха баара - Марфа Григорьевна таайтарбыттыы этэр. Киибэстээх кийииттэрэ олоппоһу тыаһатан туран хоско барда.
Марфа Григорьевна тоҕо эрэ сүрэҕэ ытырбахтаан, хоско киирэн сытынан кэбистэ. Аһара дириҥник тыын ыла сатаан, ынчыктыырын Руслан истэн.
– Хайа маама туох буоллуҥ?
– Сүрэҕим эмин дьиэбэр умнубуппун…
– Ханнык эмий этэ эрэ. Мин аптекаттан ылан киириэм - ыйытан баран таҥнан хачыгырайан тахсан барда.
" Ооуу маменькин сыночек! " - диэн Баайсыбыт дьахтар, сиилээбиттии батыһа көрөн хаалла. Иһит сууйуон сүрэҕэлдьээбиттии остуол диэки көрдө.
Руслан эдьиийин ааҕар Маргариталаахха киирэн истэҕинэ, кэннигэр ким эрэ саҥарда. Рома эбит. Улахан холуочук. Аргылаан түбэһэн уон биэс хонукка киирэн тахсыбыт. Онтон сирэйэ - хараҕа холлон, кыйыттан сылдьар кэмэ. Рома быраатын Русланы соччо эйэҕэһэ суохтук көрүстэ. Дьиэҕэ киирбиттэрэ Рома аҕата баар. Маргарита балыыһаҕа анализ туттара барбыт. Чэйдии олороннор Рома эбии водка куттан истэ. Мээнэ тыллаһара элбээтэ. Аҕатыгар моһуогурар. " Бу иитиэх уолгун Русланы өйдөөх буолан ыраах тиийиэ, диэн алҕыыр курдук этэр этиҥ дии! Миигин буоллаҕына сирэй харах анньар этиҥ! Эн тылыҥ тиийэн байбыт. Онтон миигин оччоҕо кыраатаҕыҥ дии! - Рома бэйэтин олоҕо сатамматаҕар аҕатын буруйдуур.
– Рома убаай. Аҕаҕын итинник диэмэ. Үөрэхтээх киһи буоллун диэн эйигин такайа сатыыр этэ дии. “Оҕоҕо саамай күндү дьон төрөппүттэр бааллар эбит” диэн мин тулаайах киһи иҥсэрэ саныыр этим - Руслан буойа сатыыр.
– Эн миигин үөрэтимэ! Учуонай профессор буоллум диэн, миигин сэниигин дуо?! –диэн баран эмискэ остуолтан быһаҕы харбаан ылан Русланы хабырҕаҕа сырбатта. Онуоха аһыттараары тиэрэ чинэрис гыммыта да син биир моонньуга табыллан, хаана өрө тыга түстэ. Руслан охтон түһэр кэмигэр Маргарита киирдэ. Уолуйан сарылаата.
– Русланы тоҕо итинник дьүүллүүгүн! Кини иэһин көрдөөбөт. Эбиитин миигин Москваҕа эмтэтиэхтээх этэ дии! Ситэри миигин сиэ! Ситэри тыыммын салҕаа! - Маргарита сарылыы, сарылыы ытаата.
(Салгыыта суруллуо)
Ородьумаан
12.03.2026.
Укажите e-mail или номер телефона для связи:
Опишите причину жалобы:
Содержание
Кыра уолчаан ийэтин уҥуоҕун аттыгар, умса туттан олорон ытаан санна дьигиҥниир. Тугу эрэ саҥарар да дьүүлэ биллибэт.
– Чээ тоойуом Русланчик бардыбыт. Массыына күүтэр - тастыҥ эдьиийэ бастаан эйэҕэстик төбөтүн имэрийдэ. Уолчаан истибэтэхтии олорор.
– Бардыбыт диибин дии. Дьон күүтэр! - эдьиийэ санныттан өрө тардан уолчааны дэллэриттэ. Руслан төлө мөҥүөх курдук буолан иһэн барсарыгар тиийдэ. Дьон аһыммыттыы көрөллөр.
" Уолчаан барахсаны", " Эдэр сааһыгар бараахтаата" диэн ботур - итир кэпсэтэллэр.
Руслан ийэтэ ыарахан ыарыыга ылларбыта. Соҕуруу эппэрэссийэҕэ барарыгар диэн, ыксаан аҕаларыттан хаалбыт Нива массыынаны урал мотосыкылы атыылаабыта. Москваҕа олорор убайдара уонна харчы ыыппыта.
" Маама тоҕо атыылыыгын, мин улааттахпына сүүрдүөм дии!" - уолчаан уулаах харахтарынан чоҕулуччу көрбүтэ. Онуоха ийэтэ барытын кэпсииригэр тиийбитэ.
Уол туоҕу эрэ, ырааҕы анааран эрэрдии көрбүтэ.
" Оттон тал оччоҕуна, массыыната суох хаалар ордук дуу маамата суох хаалар дуу?" - диэбитэ ийэтэ.
" Суох мама. Эн папа курдук эмиэ кэлбэттии бараары гынаҕын дуо? Барытын атыылыахха " - диэн уолчаан таһырдьа тахсан биэлигин киллэрдэ.
" Мама маны эмиэ атыылыахха. Маны мин дэлби сууйуоҕум. Сатыы сылдьыам буоллаҕа зато эн миэхэ бааргын " диэхтиир.
Ийэтэ уолун уйадытымаары хосхо киирэн, уйа - хайа суох ытаата. Уола киирэн.
" Маама ытаамарыый. Паапа саата эҥин баар дии, ону эмиэ атыылыахпыт " - диэтэ. Иккиэн куустуһан олорон ытаатылар.
Күн сирэ күндү. Уоллаах ийэ бөрөөн - сөрөөн мунньубут харчыларын, аҕаларын саатын сиэйпэтигэр хатаабыттара.
Оннук сылдьан ийэтэ ити буолаахтаата.
Руслан эдьиийэ Маргарита уолу иитэ ылла. Руслантан үс сыл аҕа кыыстаах, уонна икки сыл аҕа уоллаах эбит.
Маргарита Русланы илдьэ кини дьиэтигэр бардылар.
– Руслан эн ийэҥ харчылаах буолуохтаах этэ дии? Ханна уурбутай?
– Ону хайаары гынаҕын? Эмтэнэригэр диэн мунньубуппут. Уонна успейдаабатыбыт. Ол харчы ити сейфэҕэ баар. Мин улаатыахпар диэри турар. Уонна мин матасыкыл массыына ылыныам - диэн уолчаан эдьиийин диэки көрөр. " Кып кыра эрээри хараҕа сытыытын! " - Маргарита бэйэтин хараҥа санаатыттан кыбыстыбыттыы туора көрдө.
– Бу дьиэни дьоҥҥо куортамныахпыт дии. Ол иһин ити сейфэни арыйыахха наада. Уонна ити харчыны син биир ууруохпут. Эн улааттаххына массыына ылыахпыт буоллаҕа - Маргарита уолу утары көрүмээри сейфэни имэрийбитэ буолла. Руслан итэҕэйэн күлүүһү биэрэригэр тиийдэ.
Эдьиийин ааҕар нэдиэлэ курдук олорбутун кэннэ эдьиийэ икки күн кэлбэтэ.
– Эдьиэй Маргарита тоҕо кэлбэтий? - кыыһыттан ыйытар.
– Соҕуруу күүлэйдии барбыта.
– Оттон
" харчыбыт суох"- диэн кэпсэтэр этигит дии?
– Буллаҕа дии! Барыта эйиэхэ наада!
25.02.2026.
2
Руслан оҕо саадыгар сылдьар. Дьоҕурдаах буолан бэлиэр ааҕарга суруйарга үөрэннэ. Уонна суоттуурга үчүгэй эбит. Дьиэтигэр кэллэҕинэ үксүн онон дьарыктанар.
" Эһиги бу дьиэтээҕи үлэҕитин санааҕытыттан оҥоруоххутун! Ити кыра уол Руслан бэлиэр ааҕар, суруйар буолбут. Оскуолаҕа киирдэҕинэ отой ыраатыыһы! " - аҕалара Савелий иккис кылааска үөрэнэр уолун Романы кытта, иитиэх уолун Русланы мүнүүтэҕэ аахтаран көрдө. Руслан аҕыйах этиинэн чорбойон таҕыста.
Рома маһыттаран кыыһыран буугунуур.
Кэнники аҕалара үлэтиттэн кэллэҕинэ, уола Рома икки сыананы ылбыт буоллаҕына кыйаханар буолла. Уолун Русланынан сирэй - харах анньар. Таһырдьа оонньото ыыппат буолла.
Ол иһин Рома дьоно суохтарыгар сымыйанан " харчыбын уорбуккун!" - диэн баайсан Русланы дьиэтиттэн үүрэн таһаарда.
Русланҥа Рома эргэ сонун биэрбиттэрэ, тэллэҕинэн киэҥ буолан тыал көҥүл оонньуур. Уолчаан ойоҕоһо тоҥон шарфигынан курдуу бааммыта , аны кыһыҥҥы чысхаан сирэйин хаарыйар. Уол ыксаан ханна барыан саныыр. Бэйэлэрин дьиэлэрин нэһиилэ булан тиийдэ. Киирбитэ киниттэн обургу икки уолаттар бааллар, уонна кини барыллаата кыысчаан баар. Дьоно көстүбэттэр. Руслан тоҥон тииһэ тииһигэр ыпсыбат.
– Һок! Бу киммит кэллэ? - уолаттар өрүкүнэйэ түстүлэр. Руслан иттэ түһээри бытааннык дорооболоспута буолла.
– Дорообоҥ баппатах буоллаҕына дорообо! Ханна баран иһэҕин? Хайыы сылдьаҕын дуу!?
– Мин манна олоро сылдьыбытым ээ…
– Абырааб
ыккын. Оттон билигин биһиги олоробут дии!
– Атыыласпык
кыт дуо?
– Ону тоҕо билэ сатаатыҥ?!
– Көннөрү ыйытабын.
– Чэ таҕыс. Мэһэйдээмэ биһиги оонньуубут!
– Тохтоо..ычуу кыратык иттэ түһүөм…
– Иттимэ хайаама! - диэн уолаттар Русланы таһааран хаарга төкүнүттүлэр, буккуйдулар. Эбиитин күлсэ, күлсэ хоонньугар хаары симтилэр. Уонна дьиэлэригэр киирэн хааллылар.
Руслан ытыы сытан баран турда. Хоонньугар хаар киирбит буолан, эбии титирээтэ. Тэйиччи уоттар көстөллөр. " саатар онно тиийэн ханнык эмит подьездка иттибит киһи" диэн санаалаах. Суолу икки гына хааман байаатаҥнаан истэн. Этэ - сиинэ дьагдьайа сатаан баран, устунан итийэн барда. Арай көрбүтэ ханна эрэ ийэтэ ыҥырар. Саҥа хоту тиийбитэ ийэтэ турар. " Хайыаа оҕом тоҥмут дии " диэн кууһан ылла. " Маама эн уонна ханна да барыма, миигин баһаалыста быраҕыма, ыалга хаалларыма! " диэн уолчаан ытыыр.
Русланы дьиэлэриттэн үүрэн таһааран хаарга буккуйбут, уолаттар аҕалара үлэтиттэн кэлэн иһэн, хаарга оҕо сытарын көрдө. Үгүһү элбэҕи токкуйдуу барбакка, дьиэтигэр аҕалла.
Аҕалара дьиэҕэ баарыаҥы
уолу көтөҕөн киллэрбитин көрөн соһуйдулар, куттаннылар. Үүрбүт уолаттартан биирдэстэрэ ыалларын уоллара эбит. Дьиэтигэр тахсыбыт.
Сотору ийэлэрэ кэлэн эмиэ айманна.
– Бу оҕону таһырдьаттан булан киллэрдим.
– Оо бу хантан кэлбитий? Кимнээх оҕолоро эбитэ буолла?
– Ити уол баарыан манна иттэ диэн киирбитэ. Ону убайым Владик уонна ити сосед Максим үүрэн таһааран хаарга буккуйбуттара, мин буойталыы сатаабытым - диэн кыысчаан дьонугар эттэ. Русланы аһынан хараҕын уута тахсар.
– Оо бу иэдээни! - диэн дьиэлээхтэр эбии айманнылар.
Владик мөҕүллэн баран Максимҥа таҕыста. Максимы таһырдьа ыҥыран таһаарда.
– Максим дьэ хаайыыга барар дьон буоллубут! - диэн мунна сурдурҕаан сыҥсыйар.
– Аһара дендилаан өйгүнэн бырахтараары гынныҥ дуо? – Максим күлэр.
– Күлэн ырбаҥнаан бүт! Баарыан хаарга буккуйбут уолбут үлүйбүт.
– Оо кырдьык дуо? - Максим күүлэ уотун сырдыгар, дьэ Владик сирэйэ кубарыйбытын өйдөөн көрдө.
– Итэҕэйбэт буоллаххына тахсан көр. Аҕам биһиэхэ киллэрдэ.
– Хайдаҕый тыыннаах дуо?
– Билбэтим. Хамсаабат. Дүлүҥ курдук көтөҕөн киллэрдэ. Миигин дэлби мөхтүлэр.
– Оттон миигин эппэтиҥ ини ?- Максим ыксаата.
– Балтым барытын кэпсээтэ - диир Владик.
27.02.2026.
3
Ыаллар аҕалара Русланы дэлби массажтаата. Этин эһэ сыатынан сотто.
– Бу оҕо чуолаан тоҕо биһиэхэ кэлбитэ эбитэ буолла?
– Эрдэ манна олоро сылдьыбыттар үһү.
– Оо оччоҕуна бу Савелий Романовичтаах иитиэх оҕолоро буоллаҕа.
– Балыыһаҕа илдьиэххэ.
– Кэбис тохтоо! “Үүрэн таһааран хаарга буккуйбуттар”- диэн оҕолорбутун эрийиэхтэрэ. Халымыр соҕус. Бэйэбит эмтээн көрүөххэ.. температуралаах…хата кыл мүччү түбэһэн булбуппун - дэһэн дьиэлээхтэр кэпсэтэллэр.
Русланы түгэх хоско киллэрэн сытыардылар. Уолчаан “этэ умайар” түлээгирэн баллыгырыыр. Ийэтин ыҥырар.
Русланы аҕыйах күн бу ыаллар, олордон эмтээтилэр. Буруйдаах уолаттар кинини бэрийэн бөҕөлөр. Албыннаһан дендилэрин,сегаларын уларсан оонньотоллор.
Руслан эдьиийэ Маргарита күтүөтүнээн Савелийдыын, бастаан иитиэх уоллара баарын суоҕун аахайбатахтара. Онтон киэһэлик оҕолоруттан ыйыттылар.
– Мин үүрбүтүм. Манна олорботун! - уоллара Рома буугунуур.
– Ол эйигин хайаабытыгар үүрэҕин?!
– Эһиги биһигиннээҕэр кинини эрэ ордороҕут. Папа кинини эрэ хайҕаан тахсаҕын! - уоллара ытаары мунна сурдурҕуур.
– Ити оҕону биһиги опекунҥа ылбыппыт. Билигин ханна эрэ тоҥон үлүйбүт буоллаҕына, хаайыыга бардахпытына ким эйигин иитэр?! - Савелий Романович уолун куттаан этэр. Ол тыллартан дьиэлээхтэр бэйэлэрэ дьиксинэн, тахсан Русланы көрдүү сатаатылар.
Аҕыйах күн көрдүү сатаан булбакка ыксаан олордохторуна, били дьиэлэрин куортамнаабыт киһи Русланы аҕалан
биэрдэ.
Мунан сылдьар оҕо тоҥмутун булан, дьиэтигэр эмтээбитин кэпсээтэ.
Икки өттүттэн буруйдаах буолан, мээнэ үгүс кэпсэтии тахсыбата. Оҕо көстүбүт, чэгиэн туруктаах диэн онон, оннук ааста.
Тулаайах эрэйдээх - буруйдаах уолчаан олоҕор син биир туох да уларыйыы, чэпчэтии тахсыбата.
Көйгө оҕо быһыытынан дьиэ иһигэр " биир муостанан хаамар". Сүрэх баастаах оҕо барахсан, эмиэ тымныыга таһырдьа үүрүөхтэрэ диэн куттанар. Дьиэлээхтэр маастарын таба сатыыр. Этиллибити улгумнук толорон иһэр. Иһит сууйар, муоста сотор. Аһы сатаан да буһарбатар, хортуоска хаҕылаһан санаатыттан көмөлөһө сатыыр.
Ол да үрдүнэн син биир булан мөҕүллэр. Тугу эмит булан сиилииллэр. Тэлэбиисэри аһара улаатыннарбыт аатырар. Бөх кэмигэр тоҕуллубатах буолар. Сыччах сөтөлүннэҕинэ " Бу быччаныах ыарыытын сыһыарыа!" диэн буолар. Онон сөтөллөрө, ытырдара да көҥүлэ суох курдук. Эгэ төбөм ыарыйда диэн эмп көрдүүрэ кэлиэ дуо. Оннооҕор буруйа суох кэмигэр да " Бу философ учуонай, мэлдьи туоҕу үөрэтэрий, оскуолаҕа киирэ да илигиттэн! “- диэн була сатаан тыл иһиллэр. Эбэтэр ыаллар бэйэлэрин оҕолоро үөрэхтэригэр кыһамматтарыттан ,кыйыттан ордугурҕууллара эбитэ дуу.
Ыаллар этистэхтэринэ " аны мин хаарыллыам " диэн уолчаан куттанан " кутуйах иинин кэҥэтэр “.
Руслан оҕолор курдук дендинэн оонньуон баҕарар. Эдьиийиттэн Маргаритаттан киниэхэ ,денди ылан биэрэригэр ыйытыан баҕарбыта да, тыла тахса илик. Эдьиийэ мэлдьи дьэбин уоһуйа сылдьар курдук. Арай биирдэ арычча көнньүөрэн сылдьар кэмигэр ыйытта. Онуоха уолчаан ыарыһах ийэтэ мунньубут харчытын, апчарыйбыт дьахтар хайыай саҥа дискеттэрдээх денди оонньуу ылан биэрдэ.
Ону уоллара Рома былдьаан ылан бэйэтин эргэтин биэрдэ.
Туоҕа да суох тулаайах уолчаан онтон санаатын түһэрбэтэ. Эргэ да буоллар бэйэтэ бас билэр оонньуур тэриллэннэ.
Руслан саас халлаан сылыйыыта ,эмиэ үүрүлүннэ.
Ыаллар сааскы бырааһынньыкка ыалдьыттары ыҥыртаан, күүлэйдээн аргылаабыт түмүктэригэр Рома биир дьахтартан харчытын уоран баран, Русланҥа баайсыбыта.
Савелий холуочугар тэптэрэн уолчааны саҕатыттан таһырдьа анньыбыта.
Тулаайах уолчаан ханна бараахтыай. Көмүскэтэрэ эрэ көмүскэтин уута, харыһылтатара эрэ хараҕын уута буолан, уулусса устун мээнэ хаама тураахтаата.
28.02.2026.
4
Руслан ийэлээх аҕата ,кини күн сирин көрөрүн биэс сыл күүппүттэрэ. Кэмниэ кэнэҕэс, хомнуо хойут күүтүүлээх оҕолоро күн сирин көрбүтэ. Көрдөр харахтарын дьүккэлэрэ, көтүрдэр тиистэрин миилэтэ буолан, күннэрэ кининэн тахсара ыйдара кининэн киирэрэ. Дьиэлэрин иһигэр оҕо саҥата чаҕааран, дьэки - курус барыта үөрүүнэн туолбута.
Олохторо атын өттүнэн түөрэ эргийэн оҕолоро тулаайах хаалан, дьонтон атаҕастанан аһаҕас халлааҥҥа хаалыа эрэ диэн санаа суоҕа. Аҕалара милииссийэ үлэһитэ, хаайыылаахтар күрээбиттэрин тутуһа сылдьан ытыалаһыыга түбэспитэ.
Руслан бөх дьааһыгын хаһан ,дьон бырахпыт аһыттан үссэнэр. Киэһээ теплотрассаҕа киирэн утуйар. Халлаан сылыйан күнүс ичигэс. Иитэр ыалыгар мөҕүллэн - этиллэн сынньыллыахтааҕар манна көҥүлгэ арычча ордук курдук. Уулуссаҕа олорон ытыһын оҕотун тоһуйдаҕына, дьон кэппиэйкэ быраҕар. Онтун да ардыгар атын умнаһыттар былдьаан ылаллар.
Уолчаан оҕотук санаатыгар ким күүстээх, былаастаах ол барытын баһылыыр дии, саныыр.
Холобура кыра тэллэх ыттан улахан ыт былдьаан ыларыныы Руслан буфет аттыгар дьон ордорбут бирэскитин сиэн ньэмээритэ олордоҕуна, умнаһыт улахан уол былдьаан, хабы тардан ылар.
Уолчаан ийэтэ бирэскини хатаҕалаан сиэтэ сатыырын саныыр. Хараҕа ууланар.
Иитэ ылбыт эппэкиин дьон буруйга - сэмэҕэ тардыллымаары Русланы уулуссаттан булан аҕалбыттара. Эдьиийэ Маргарита уонна кыыстара, " фуу! - фаа! " буолан сиргэнэн уолчаан таҥаһын таһырдьа уһултарбыттара. Киирэн сууммутун кэннэ Рома кыччаабыт ыраас таҥаһын кэтэрдибиттэрэ.
Сарсыныгар оҕо дьиэтигэр илдьибиттэрэ.
Приют салалтатыгар киирэн. Русланы отой кыайтарбат, санаата да баран хаалар уорар идэлээх, киһи тылын истибэт ,этиһэр. Маннык кэмэлдьилээх оҕону кыайан ииппэппит- диэн сымыйанан кэпсээн туран сайабылыанньа суруйдулар.
Соһуйуохтарын иһин уолчаан, улахан киһилии туттан туран барытын кэпсээтэ. Ийэтэ олохтон барбытын кэннэ эдьиийэ Маргарита, ийэтэ эмтэнээри мунньубут харчытын сейфэлэриттэн хостоон ылбытын уонна дьиэлэрин атыылаабытын дуу, куортамнаабытын дуу кэпсээтэ.
Савелийдаах Маргарита биир биэс тылы саҥарбат уоллара, хантан маннык эр санаа булан, чобуо баҕайдык эппитин көрөн, соһуйан тиэрэ кэлэн түһэ сыстылар.
01.03.2026.
5
Руслан опекун дьонун туһунан кэпсээбитин, оҕо дьиэтин дириэктэрэ бастаан сөхпүттүү көрдө. Итэҕэйиэх курдук буолбутугар, иитэр опекуннар уу тэстибэт гына этэн быһааран кэбистилэр.
" Бу оҕону итэҕэйимэҥ ,дьэ киһи итэҕэйиэн эрэ курдук оҥорон кэпсиир идэлээх. Ончу фантазер! Сороҕор бэйэбит кинини итэҕэйэн киирэн биэрээхтиибит!” - дииллэр.
Уолу приютка туттаран таҕыстылар.
Көрүдүөргэ Руслан эдьиийин Маргаританы кэлэйбиттии көрөр. Тулаайах уолчаан баайын апчарыйбыт эдьиийэ киһи эрэ буоллар, уулаах харахтары утары кыайан көрбөккө, мүлтү - халты туттар.
– Эдьиэй баһаалыста тохтоо эрэ, биир этэрдээхпин - уолчаан тохтотто.
– Туох баарый? эт чэ!
– Маамам баарыгар эйигин наһаа үчүгэйдик саныыр этэ…эдьийиҥ Маргарита көрө - истэ сылдьыа диэбитэ…уонна миигин эдьиийиҥ тылын истэр буолаар диэбитэ. Ол иһин мин биир да тылы өрө саҥарбакка, эппиккин барытын толорор этим - диэн эппитигэр Маргарита киһи эрэ буоллар, суобаһа оонньообута эбитэ дуу, ханна эрэ ыксаабыта эбитэ дуу, тахсар ааны былдьаста.
**
Русланҥа оҕо дьиэтигэр атын олох саҕаланна. Биллэн турар улахан уолаттар оройун чопчуйалларын аахсыбатахха, мантан ким да уулуссаҕа үүрэн таһаарбат. Бөх дьааһыгыттан ас көрдүүр курдук буолуо дуо. Син аһаталлар. Манна бэйэтин курдук тулаайах оҕолор бааллар. Төгүрүк тулаайах да буолбатар, элбэх оҕону төрөтөн иһэн - аһаан, эбэтэр үлэ булан үлэлээбэккэ ыксаан оҕолорун приютка биэрбиттэрэ да бааллар.
Руслан бэйэтин барыллаата оҕолору кытта билистэ. Оҕолор барахсаттар бэйэлэрин эрэйдээх олохторун кэпсэтэннэр, бэйэ бэйэлэрин аһынсаннар харахтарын уутун соттоллор.
Русланы эдьиийэ сымыйанан эбэн - сабан ,сүрдээн - кэптээн кэпсээбитин курдук буолбакка, сүрдээх дьоһуннаах, өйдөөх оҕо буоларын, оҕо дьиэтин иитээччилэрэ биллилэр. Эбиитин саҥа суотабай төлөпүөн үөдүйэн эрэрин, киниэхэ хастараллар, оҥоттороллор. Спутниковай антеннаны холбууру сатыыр. Тэлэбиисэри да хасыһар. Ол иһин хатаҕалаан да аһаталлар. Обургу уолаттар ону көрөн сөбүлээбэттэр. Руслан ардыгар кырбаннаҕына да үҥсэргээбэт.
Руслан биирдэ утуйа сыттаҕына, икки уон биэс саастаах уолаттар түүн туруоран илдьэ бардылар. Олорор уопсайдарыттан үөмэн таҕыстылар. Руслан уутугар аҥарыйа сылдьар буолан өйдөөбөтө. " Ханна илдьэҕитий?! " диэн ыйыттаҕына саҥарбаттар. Сирэйигэр сутурук үҥүлүтэллэр.
Хараҥаҕа ханна эрэ аҕаллылар. Уолчаан өйдөөн көрбүтэ арааһа маҕаһыыны халыы кэлбиттэр. Иһиттэн таһыгар килиэп уган биэрэр хорууданан уолчааны уган киллэрээри гыналлар. " Суох мин харчыны уорбаппын! " - диэбитигэр быарга оҕустулар, онуоха охтон түһэн түүрүллэн баран ,тыынын ыла сатыыр.
02.03.2026.
6
Русланы түүннэри күһэйэн аҕалан, күүстэринэн маҕаһыыны халата, киллэрээри туран аймаммыт саҥаларын истэн маныыһыт киһи кэлэн иһэрэ билиннэ.
Руслан быарга охсуллан тыынын нэһиилэ ылла. Уолаттар кинини өрө тардан туруоран куотар аакка бардылар.
Былааннара туолбатаҕар кыбдьырыналлар. " Кимиэхэ эмит кэпсиэҥ да сэрэн. Аныгыскыга атын маҕаһыыҥҥа барыахпыт! " – дэһэллэр.
**
Марфа Григорьевна уонна Геннадий Петрович иккиэн, институтка үлэлииллэр. Геннадий Петрович дириэктэр солбуйааччыта, кэргэнэ Марфа Григорьевна преподователь.
Түөрт уон саастарын ааһыахтарыгар диэри оҕолоро суох. Икки төгүл сатамматаҕа. Эмтэнэн да көрбүттэрэ.
Оҕо дьиэтиттэн оҕо иитэ ылаары өр сүбэлэстилэр. Кыраны ылыахтарын иккиэн ,үлэҕэ умса түһэ сылдьар буолан арычча обургуну ылыахтарын сананнылар.
Иккиэн дет.домҥа тиийбиттэрин таллардылар. Онон оҕолору сирийэн көрөллөр. Бу диэн кими талыахтарын билбэттэр.
Оҕо бөҕө сүүрэккэлиир, мэниктиир.
Марфа Григорьевна биир кыыс оҕону сөбүлүү көрдө.
Геннадий Петрович Русланҥа чугаһаата. Кини көрдөҕүнэ оҕоттон эрэ ураты курдук. Тумбочкаҕа кинигэлэрэ бааллар. Уонна туоҕу эрэ суруйар ,ааҕар. Геннадий тиийэн иитээччиттэн Руслан туһунан ыйытар.
" Саамай бэрээдэктээх, дьоһуннаах, өйдөөх оҕобут. Оҕолор кинини " философ” диэн хос ааттыыллар" диир.
Русланы хоско киллэрэн кэпсэттилэр.
" Бу ыаллар эйигин иитэ ылыахтарын баҕараллар . Сөбүлэһиэҥ этэ дуо"?- диэн ыйыппыттарын уол тута саҥарбатар да, өйдөөх харахтарынан кэриччи, үөрэтэрдии көрүтэлиир.
Санаатыгар онно тиийэн эмиэ ,хайдах дьылҕаланара биллибэт. Сүрэх баастаах оҕо санаата ханна тиийэн алдьамматаҕа баарай.
" Чэ быһаарынан этэ оҕус. Оҕо эрэ элбэх, эн эрэ буолбатах. Бу үөрэхтээх, интэлигиэнтнэй ыалларга барар үчүгэй шанс эрэ буоллаҕа! Хайыыгын!? " - баспытаатал токкуйдуу сатыы олорор уолу, ситэ күүппэккэ ыксатар. Русланҥа бүгүн улахан уолаттар " бэлэм сылдьаар бүгүн барыахпыт! " - диэн хараҥа дьыалаларыгар кыттыһыннараары кулгааҕар ботугураан эппиттэрэ. Илиитин кымаахтаан кыбдьырыммыттара.
Уолчаан санаатыгар " дьолго " барсар шанс көһүннэ диэн буолбакка , " сортон " куотар шанс диэн курдук буолла.
Маҕаһыыны халаан баран бэйэлэрэ ыраас хаалан, син биир кинини уган биэриэхтэрэ. Оччоҕуна хаайыыга бардаҕына, олоҕор эбии эрэйдэниэҕэ…
7
Маргарита эмискэ ыйытыкка кыайан хоруйдаабакка туран чэй куппута буолла.
– Русланы дет.домҥа биэрбиппит. Кыайан көрөр кыахпыт суох. Киһи тылын истибэт…түүннэри баран хаалар. Бэйэм да оҕолорбун нэһиилэ ииттэхпинэ сөп - Маргарита бөлүүһэттэн үүттээх чэй иһэн сыпсырыйар. Евгений тулаайах уолчаан туһунан ыйытта да аһын бэрийбитэ буолан хаалар.
– Руслан миэхэ сурук суруйбута саҥа тиийбит, ону туппутум - диир Евгений.
– Москваҕа сурук суруйан ыытар эбит да ол биэс саастаах оҕо - Маргарита билбэтэҕэ буолар.
– Да еще как суруйар эбит - диэн Руслан суругун биэрдэ.
Онно уолчаан ийэтэ хаһан олохтон туораабытын, мөлүйүөнүнэн харчыны эдьиийэ Маргарита сейфэттэн ылбытын, дьиэлэрин атыылаабыттарын тиийэ суруйбут. Маргарита " сымыйа !!" диэн баран ойон туруоҕун, барыта дьүһүнүттэн көстөн турар буоллаҕа. Уонна ханна эрэ иһин түгэҕэр суобаһын оҕото сөҥөн хаалбыта онто туппута эбитэ дуу. Кыайан мэлдьэспэтэ.
– Оҕону иитэр манан аҕай буолбатах.. аһа.. таҥаһа…саатар моҕуһа диибин диэн! - силбиэтэнэр киибэһэ киирээри сүнньэ босхо барда.
– Ол оҕо биир сыл иһигэр төһөккөөнү аһаабыт таҥныбыт үһү?!
– Төннөрүллүө! Бэйэтигэр эппитим улааттаххына төннөрүөм диэн! Ону быһаарса манна кэлбит эбиккин дии!
– Тулаайах уолчааны син биир ким эмит көмүскэһиэхтээх буоллаҕа дии! - диэн Евгений Маргаритаҕа племянниктара Руслан, уон аҕыс сааһын туоллаҕына балтараа мөлүйүөнү төлүөм диэн кумааҕыга суруттаран илии баттатта. Ол кэмҥэ ити сумма баһаам буоллаҕа.
Евгений оҕо дьиэтигэр тиийэн Русланы ыйыппытын, ыаллар иитэ ылбыттарын эттилэр. Адрыстарын ылан аны онно тиийдэ.
Марфа Григорьевна кытта Геннадий Петрович иитэ ылан сөбүлээн ,бэлиэр киниэхэ убаммыт уолларыгар эмискэ ханнык эрэ аймахтара күөрэйбитигэр соһуйдулар.
Евгений уолу Москваҕа илдьэ барар санаалааҕын истэн сүөм түстүлэр.
Онтон Руслан " Суох мин кинилэртэн ханна да барбаппын ! Кинилэр билигин миэхэ, ийэм уонна аҕам буолаллар!" - диэбитигэр долгуйан, кистии саба харахтарын уутун сотуннулар.
" Мин көннөрү эн санааҕын билээри гыммытым. Оннук буоллаҕына бэрт дии " - диэн таайа кэһиитин биэрдэ. “Оскуолаҕын бүтэрэн үөрэххэ киириэҥ. Баҕар Москваҕа кэлэн туттарсыаҥ. Онно биһиги да өйүөхпүт. Чэ этэҥҥэ буол!” - диэн таайа алҕаан баран барбыта.
Сыл - хонук. Руслан оскуоланы туйгун сыанаҕа, кыһыл дипломунан бүтэрбитэ. Москваҕа үрдүк үөрэҕи эмиэ бүтэрэн кэлэн, билигин институтка дириэктэрдиир. Үтүө үлэтин көрдөрөн, наҕыраада, чиэс бочуот бөҕө. Маргариталаах хаһан эрэ уулуссаҕа анньыбыттарыгар, бөх дьааһыгын хаһа сылдьыбыт оҕолорун Россия каналыгар тэлэбиисэргэ көрдөрбүттэрин сөҕө көрдүлэр. Отучча саастаах мааны киһи буолбут, бу этэрэ тыынара эриэккэһин. Туох эрэ учуонай буолара эрдэттэн биллэрэ. Билигин интэриниэти баһылаан , приложение оҥорон бу күөх экраҥҥа көстөр. Үөрэтэр оҕолоро эмиэ үрдүк ситиһиилэммиттэр.
Маргарита бэйэтин күлүгээннээн, хаайыыга киирбит уолун Романы санаан, хараастан ылла.
Өссө онтон харчы көрдүү сытар. Кыыстара эргэ тахсан барбыта да кинилэри умунна. Эрийэн кэпсэппэт даҕаны.Хаһан эмит пенсийэлэрин көрдөөрү гыннаҕына эрэ биллэр. Маргарита балыыһаҕа көрдөрүммүтэ, быраас эппит ынырык диагноһа кулгааҕын тэһитэ кэйиэлиир курдук. “Хантан харчы булан эмтэнэр?” " Кырыыстаах сейфэ! Аны ити уол Руслан кэлэн харчытын ирдэстэҕинэ иэдээн! Барыта наар аанньа" - Маргарита ыалдьар сирин туттан, ынчыктаан ылла.
06.03.2026.
8
Маргарита уола Рома хаайыыттан босхолонон тахсыбыт. Куорат
шайкаларын кытта куодарыһыаҕыттан үөрэҕэр да кыһаммат буолбута. Чэпчэки харчы хантан кэлэрин билэн онно аһара үлүһүйэн барбыттара. Сойуус ыһыллан, тас дойдуттан омуктары киллэртээн атыы - кутуу дэлэйиитэ бандалар баар буолбуттара. Ромалаах эмиэ шайка тэринэн эргиэмсиктэртэн нолуок курдук харчы ылар этилэр. Ол сылдьан киһини эчэтэн сууттаммыттара.
" Уолбут Рома куһаҕан уолаттары булсан иэдэйдэ!" - диэн дьоно атын оҕолору буруйдуур этилэр. Дьиҥэр бэйэлэрэ аһара тараҥната ииппиттэрэ. Туоҕу эмит көрдөөтө да ыла охсон биэрэллэрэ. Уоллара онно үөрэнэн тугу эмит ылбатылар да өчөһөн баран хаалара. Ол иһин араас биэликтэн саҕалаан, “Рига” мопед, " Ява", " Иж Планета Спорт" мотосыкыллары ылаллара. Уоллара кэнники “массыына наада”- диэбитигэр Руслан уурумньу харчытынан " Волга " массыына ылбыттара.
Эрдэ Руслан ийэтэ ыалдьан ыксаан харчыга наадыйан " Нива " массыынатын атыылаабыта. Оччолорго кырачаан Руслан ийэтин күн сириттэн сүтэримээри, үс кыырыктаах биэлигин эмиэ атыылаары хараҕыттан уу - хаар баһан тураахтаабыта.
Маргарита уола Рома ол да " Волга" массыынаны өр гымматаҕа. Шайкатынаан арыгылыы сылдьан көтүтэн, үлтү түспүттэрэ эбиитин атын дьон массыынатын тоҕо астаран ботуччу ыстарааптаммыта. Ону биллэн турар дьоно төлөөбүттэрэ.
Кэнники Ромаларын суутугар адвокатка эмиэ төлөөрү устунан мөлтөөн ахсаан, быстаран барбыттара. Дьиэлэрэ да эргэрбитэ.
" Туох буруйбут, аньыыбыт харабыт иһин? !" - диэн Савелий холуочуйан ойоҕун диэки таайтарардыы көрбүтэ. Онуоха Маргарита бокуонньук балтын, үүрбүт племяннигын санаан туора көрбүтэ, хараҕын куоттарбыта.
Билигин сааһыран мөлтүүр - ахсыыр , ыалдьар кэмнэригэр эбиитин уоллара Рома хаайыыттан тахсан эрэйдиир. Хаайыыттан майгыта - сигилитэ алдьанан тахсыбыт.
Рома Руслан туһунан дьонуттан истибитэ. Эрдэ охсо - тэбэ сылдьыбыт уола улаатан, үөрэхтээх баһырхай хамнастанан, дьиэлэнэн - уоттанан үүнэн - сайдан тахсыбытын, бэйэтин олоҕор тэҥнээн ордугурҕуу санаабыта. Эбиитин били харчы иэстэрин ирдэһиэ диэн, хайдах эрэ Русланы суох гынар санаа киирбитэ. Урукку шайкатыттан биир икки уол хаалбытыттан, кинилэргэ тиийэн сүбэлэһиэн санаата.
08.03.2026.
9
Русланы иитэн улаатыннарбыт Марфа Григорьевна уонна Геннадий Петрович, билигин пенсийэҕэ тахсан бочуоттаах сынньалаҥҥа олороллор. Санааларыгар Русланнара ыал буоларын күүтэллэр.
Руслан бастаан үөрэххэ, онтон үлэҕэ умса түһэн кыыс диэҥҥэ кыһаммат этэ, иллэҥэ да суоҕа. Кыргыттар билсэ , сырса сатаан баран " ботаник " дииллэрэ.
Руслан аны санаатаҕына кини саастыылаахтара, бииргэ үөрэммиттэрэ ыал буолан ырааппыттар.
Кырдьык даҕаны ыал буолан оҕо уруу төрөттөҕүнэ эрэ, кинилэр, сыдьааннара араспаанньалара хаалыыһы. Ийэлээх аҕата эдэрдэригэр да бараахтаабыттар эбит. Этэҥҥэ эбитэ буоллар өссө оҕолонуохтара эбитэ дуу.
Руслан кыыс оҕолоноро буоллар ийэтин аатын биэриэ этэ. Кэргэннэнэ да илигиттэн оҕолонорун санаабытыттан, сонньуйан күлэн ылла.
Ийэтин хаартыскатын портретка оҥотторбута иилиллэн турар. Уолун диэки санньыйбыттыы көрөр. " Үтүө киһи буолаар…" диэн эппит тыллара хатыланан, кулгааҕар сипсийэр курдук. Ийэтин сүтэриэҕиттэн төһөлөөх эрэйи көрбүтэй. Дьиэлэриттэн үүрбүттэригэр үлүйэ да сыспыта. Бөх дьааһыгын хаһан, килиэп хоручуоскатын хачыгыратарын оҕолор күлэ, күлэ ааһаллара. Эдьиийэ Маргарита чанчыгыттан тардара, Рома охсон - тэбэн көрөрө Рома эдьиийэ күлэн сыһыгырыыра хараҕар көстөн ааста. Бу билигин икки этээстээх дьиэҕэ ,собус соҕотох олорор .
Ииппит дьоно бэйэлэрэ туспа олороллор. Руслан баҕар туспа олордоҕуна кэргэннэниэ диэн сэмээр күүтэллэр.
Марфа Григорьевна " Бу үлүгэр улахан дьиэҕэ аскын астыыр, таҥаскын сууйар кэргэн наада, хайа уонна оҕо саҥата чаҕаарыа дии. Биһиги даҕаны кэлэн сиэннэрбитин көрүө этибит" диэбитэ.
Руслан студенныы сылдьан Зина диэн кыыстыын билсибитэ. Билсэн да диэн үөрэҕэр үлүһүйэн, бу кыыстыын билсэн сылдьабын да диэбэт курдуга. Курсовойун суруйан кыыска көмөлөһөрө. Зина күн аайы киниэхэ бэйэтэ кэлэн кэпсэтэрэ. Уолтан тугу эрэ эрэйэр курдуга. Руслан бу санаатаҕына Зина кинини сөбүлээбит курдуга. Атын уолаттар курдук кинини ухаасыбайдаабатаҕа. Арай аттыгар чочуонай таһаалаах, уһун суһуохтаах, нарын кыыс баара үчүгэй эрэ курдуга. Ис сүрэҕиттэн тугу эрэ таайтаран кэпсэтэ сатыыра. Арай үөрэҕиттэн быыс булан киһилии билсибитэ буоллар ,баҕар манна оҕолор саҥалара чаҕаарыа этэ дуо? - Руслан ааспыт уонна, инники олоҕун санаан үөһээ тыынна. Билигин Зина ханна баара буолла? Нүөмэрин булбут киһи - дии саныыр.
Арай ханнык эрэ биир кыыс кинини кытта, интэриниэтинэн билсэ сатыыр. Эппиэттээбэккэ гынан баран бүгүн дьэ суруйда. Ону эрэ күүппүттүү ол кыыс эрийдэ. Саҥалаах иҥэлээх эбит. Уол адырыһын ылан ойон кэллэ. Хаартыскатыгар көрөр курдук, аһара эдэр кырасабысса буолбатах эбит.
Соноон эрэр отут түөрт саастаах дьахтар. Устунан отой да баайсан кэбистэ.
Дьахтар аймаҕы дьарыйбатах, кэрэ куолары кытта мээнэ кэпсэппэтэх уолу ынньаҕалатан сүрдээх.
Марфа Григорьевна кэнники билбитэ үс оҕолоох, эриттэн арахсыбыт татаар хааннаах Фатима диэн дьахтар эбит.
Руслан хайдах да диэн тыла тахсан үүрэр кыаҕа суох.
Дьахтар устунан баайсан дьиэтийэн хаалла.
**
Маргариталаахха сыаналаах омук массыыната кэлэн тохтоото. Маргарита түннүгүнэн көрбүтэ, бэрт мааны киһи түстэ. Бу кинилэр оҕо сырыттаҕына, санаатылар да саҕатыттан таһырдьа анньар тулаайах уоллара Руслан буоларын биллэ. Маргарита барыах - кэлиэх сирин билбэтэ. Утары көрсөн илэ - сала көрсүөх курдук буолан иһэн, оронугар баран сытынан кэбистэ.
– Дорообо
лоруҥ. Дьиэлээхтэр бааргыт дуо? - Руслан киирэн аан хостон өҥөҥнүүр.
– Ким киирдэ? - хостон кэһиэхтээх саҥа иһиллэр.
– Мин Русламмын.
– Ээ оҕобут кэлбит эбиккин дуу. Көрбөтөх ырааппыт. Сыгынньахтан киир, аас - Маргарита айалаан - дьойолоон чэй бэлэмниир.
" Били чолоҕор!" " Илэчиискэ! " диэн Русланҥа анаммыт кырыктаах тыллары истибит аҕай уолга " Оҕобут " диэн тыл дьиктитик иһилиннэ.
Баҕар ол кэмҥэ " оҕобут" диэн тылы истэн ким эрэ аһынна диэн, уолчаан хараҕа ууланыа эбитэ дуу. Билигин истэн сонньуйар эрэ.
Аҕалара үлэтигэр барбыт. Кини да сааһыран мөлтөөн ахсаан сылдьар. Уоллара Рома ханна эрэ барбыта хас да хоммут.
Чэйдии олорон ону маны кэпсэттилэр. Маргарита быраата харчытын иэһин көрдөөбөтүн сэрэйэн, эмтэммэт ыарыытын кэпсээтэ. Аһыннараары устунан ытамньыйан ылла.
– Эдьиэй күн сарсын көрдөрүнэ барыах.
– Харчым суох буоллаҕа дии. Били эн иэскин да биэрэр кыахпыт суох – аһыннарбыттыы эттэ.
– Ол иэһи мин аахсыбаппын. Ааспыт да ааспыт буоллаҕа дии.
– Оо махтал тоойуом. Ийэҥ эмиэ үтүө да киһи этэ. Миигин бука диэн баалаама, алы гын дуу.
– Мин тугу да санаабар туппаппын. Манна көрдөрүнэн баран устунан Москваҕа бараар. Евгений убайбыт тоһуйуо мин кэпсэтиэм. Харчыга төбөҕүн ыарытыма мин барытын бэйэм төлүөм.
– Оҕобут барахсан үтүө да санаалаах эбиккин. Өссө төгүл бырастыы гын. Бу аньыыбытыгар харабытыгар маннык буоллубут - диэн Маргарита ытамньыйда.
Руслан эдьиийин ааттаан баран. Төлөпүөнүн нүөмэрин ылан баран дьиэлээтэ.
Тиийбитэ Фатима үчүгэмсийэн сиэркилэ иннигэр краскалана олорор . Тугу да буһарбатах.
" Кафеттан сииргэ туоҕу да ылан кэлбэтиҥ да? " - диэннээх. Эбиитин " Эн Маргаритаҕа харчыгын тоҕо биэрэҕин?! Оҕолордоох дии көмөлөстүннэр ээ! " - диир.
Фатима баҕата диэн курортка сынньаныы, көрүлээһин эбит.Уонна сыаналаах бэлэх ылаары араастаан иҥээҥниир. Руслан кинини үс оҕолооҕун, эрдэнэ сылдьыбытын да билээхтээбэт.
09.03.2026
10
Марфа Григорьевна уола кэмниэ кэнэҕэс ,хомнуо хойут кыыс булан аҕалбытын истэн үөрбүтэ.
Онтон үс оҕолоох дьахтар уолларын, куйаар ситиминэн билсэн , устунан бэйэтинэн баайсан кэлбитин истэн, тириитин таһынан ылыммыта.
Дьүөгэтигэр кэпсээбитин төттөрү өттүн эппитэ.
– Билигин оннуктар холбоһон кимнээҕэр үчүгэйдик олороллор дии.
– Үс оҕо диэн элбэҕэ бэрт дии, саатар биир буолуоҕун.
– Оҕо да оҕо диэбитиҥ дии. Дьэ сиэн оҕо бөҕөнү аҕалар кийиит көстүбүт дии. Уолгутугар эмиэ оҕо төрөтүөҕэ. Руслан Тулаайах оҕолорго көмөлөһөр сурахтааҕа - дьүөгэтэ эппитигэр,сөбүлэһиэх курдук буолбута. Марфа Григорьевна уолун ааҕар баран нэдиэлэ курдук олордо.
Бастаан дьүөгэтэ эппитигэр, сөбүлэһиэх курдук буолбута этэ да ол санаата сүттэ. Барыта наар аанньа дьахтар түбэһээхтээбитин биллэ. Үс оҕолоох буолуо ини, таҥас сууйбат, ас астаабат буолуо ини. Санаатыгар уолларын " подкаблучник" оҥостууһу.
Күнү быһа төлөпүөнү тутан баран сытар. Өссө ханнык эрэ киһилиин кэпсэтэр быһыылаах.
– Руслан кэлэригэр эбиэт буһарыахха наада дии - Марфа Григорьевна эттэ.
– Маҕаһыы
нтан наскоряк буһар астары ылан кэлиэх буолбута - баһынан баайсыбыт кийиит хата кыһаммат. Үчүгэмсийэн олорон сиэркилэҕэ көрүнэн краскаланар. Тарбыйах гиэнин курдук хойуу уһун кыламаны олордубута, халтаһата уйбакка хараҕа симириҥниир.
– Эн оттон ас астаабат, таҥаһы, дьиэни сууйбат буоллаххына хайыы кэлбиккиний?! – Марфа Григорьевна төһөлөөх уолаттары, кыргыттары үөрэппитэй. Ким хайдах майгылааҕын өтө көрөн билэрин кэриэтэ. Бу дьахтар уолларын эрэйдииһи дии санаата.
– Айуу чэ! Сууйуллуо буоллаҕа - туох үлүгэр ыксаатыҥ! – диэн соноон эрэр дьахтар оҥоһуу кыламанын симириҥнэтэр.
Марфа Григорьевна уоллара дьахтар аймахха кэнэнин , өс киирбэҕин дьэ биллэ.Буолумуна үөрэххэ умса түһэ сылдьан. Уонна бэйэлэрэ эмиэ " Үөрэххэр кыһан , кыыс аймахха пока санааҕын уурума " – дииллэрэ.
Руслан маҕаһыынтан ас бөҕө ылан кэллэ. " Мама кэл аһыыбыт " диэн ыҥырбытын барбата.
Хостон кэпсэтэллэрин истэ сытта. Баайсыбыт кийиит саҥата " Хаһан курортка барабыт " " Мин сотору төрөөбүт күнүм, кимнээҕи ыҥыртыыбыт? " диир. Уонна бэлэх эрэйбиттии этэр саҥата иһиллэр.
Руслан үлэтин туһунан, сонунун кэпсиирин истэ да барбат. Быһа түһэн бэйэтэ туһанарын эрэ этэ сатыыр.
Уонна сибигинэйэ былаан " Ити старушка хаһан дьиэлиирий зкб гынаары гынна! " диэбитин Марфа Григорьевна иһиттэ. Уонна уола туох диирин тыыммакка да кэтэстэ.
– Эн мин ийэбин мээнэ итинник диэмэ! - Руслан бу бастакы куолаһын сонотуута этэ. Марфа Григорьевна дьахтар сирэйин көрүөн баҕарда. Хос быыһынан өҥөҥнүөх курдук буолан иһэн, ситэри кинилэргэ тиийдэ. Дьахтар сирэйэ дьэс алтанныы кытарбыт.
– Турдуҥ да ийээ. Олорон чэйдээ - диэн уола үүттээх чэй кутта.
– Күн аайы маҕаһыын аһынан аһыыбыт дии. Бэйэ буһарыныахха баара - Марфа Григорьевна таайтарбыттыы этэр. Киибэстээх кийииттэрэ олоппоһу тыаһатан туран хоско барда.
Марфа Григорьевна тоҕо эрэ сүрэҕэ ытырбахтаан, хоско киирэн сытынан кэбистэ.
Аһара дириҥник тыын ыла сатаан, ынчыктыырын Руслан истэн.
– Хайа маама туох буоллуҥ?
– Сүрэҕим эмин дьиэбэр умнубуппун…
– Ханнык эмий этэ эрэ. Мин аптекаттан ылан киириэм - ыйытан баран таҥнан хачыгырайан тахсан барда.
" Ооуу маменькин сыночек! " - диэн Баайсыбыт дьахтар, сиилээбиттии батыһа көрөн хаалла.
Иһит сууйуон сүрэҕэлдьээбиттии остуол диэки көрдө.
Руслан эдьиийин ааҕар Маргариталаахха киирэн истэҕинэ, кэннигэр ким эрэ саҥарда.
Рома эбит. Улахан холуочук. Аргылаан түбэһэн уон биэс хонукка киирэн тахсыбыт. Онтон сирэйэ - хараҕа холлон, кыйыттан сылдьар кэмэ.
Рома быраатын Русланы соччо эйэҕэһэ суохтук көрүстэ. Дьиэҕэ киирбиттэрэ Рома аҕата баар. Маргарита балыыһаҕа анализ туттара барбыт.
Чэйдии олороннор Рома эбии водка куттан истэ. Мээнэ тыллаһара элбээтэ. Аҕатыгар моһуогурар.
" Бу иитиэх уолгун Русланы өйдөөх буолан ыраах тиийиэ, диэн алҕыыр курдук этэр этиҥ дии! Миигин буоллаҕына сирэй харах анньар этиҥ! Эн тылыҥ тиийэн байбыт. Онтон миигин оччоҕо кыраатаҕыҥ дии! - Рома бэйэтин олоҕо сатамматаҕар аҕатын буруйдуур.
– Рома убаай. Аҕаҕын итинник диэмэ. Үөрэхтээх киһи буоллун диэн эйигин такайа сатыыр этэ дии. “Оҕоҕо саамай күндү дьон төрөппүттэр бааллар эбит” диэн мин тулаайах киһи иҥсэрэ саныыр этим - Руслан буойа сатыыр.
– Эн миигин үөрэтимэ! Учуонай профессор буоллум диэн, миигин сэниигин дуо?! –диэн баран эмискэ остуолтан быһаҕы харбаан ылан Русланы хабырҕаҕа сырбатта. Онуоха аһыттараары тиэрэ чинэрис гыммыта да син биир моонньуга табыллан, хаана өрө тыга түстэ. Руслан охтон түһэр кэмигэр Маргарита киирдэ.
Уолуйан сарылаата.
– Русланы тоҕо итинник дьүүллүүгүн! Кини иэһин көрдөөбөт. Эбиитин миигин Москваҕа эмтэтиэхтээх этэ дии! Ситэри миигин сиэ! Ситэри тыыммын салҕаа! - Маргарита сарылыы, сарылыы ытаата.
(Салгыыта суруллуо)
Ородьумаан
12.03.2026.