Дьиҥ олохтон кэпсээн.

Икки саха уола, сэрии бүттэҕин утаата, соҕуруу үөрэнэ баран испиттэр. Биирэ этэрбэстээх, иккиһэ бачыыҥкалаах үһү. Поеһынан айаннаабыттара хаһыс да күнүгэр, вагон сууйааччы дьахтар айдааран турбут: “Откуда это у вас сено?! Что, сено кушаете что-ли?!”- диэн буолбут. Мэхээлэтэ (кэлин Михаил Егоров диэн улахан салайааччы буолбута) Ньукулайын (кэлин Ньукулай Чуор диэн биллэр поэт, суруналыыс буолбута) сэмэлээбит: “Ньукула-ай, ити этэрбэскин уһуллаҕыҥ-кэттэҕиҥ аайы этэрбэһиҥ оһуттан угунньаҥ ото сүөкэнэр эбит ээ. Хомуна сырыт эрэ. Сүрэ бэрт дии, аны, отунан аһылыктанар аатырдыбыт”, - диэн. Ньукулай, детдомҥа улааппыт уол, истигэн буолан, онтон ыла отун муостаҕа хаалларбат буолбут.
Дьэ, итигирдик айаннаан, биһиги дьоммут барахсаттар, тиийиэхтээх куораттарыгар тиийэн кэлбиттэр. ЖД вокзал иккис этээһигэр тахсан испиттэр. Арай, үөһэ тахсаат, Ньукулай тула холоруктуу түспүт: “Мэхээлэ, ол утары этэрбэстээх уол иһэр!” - диэн. Ону Мэхээлэтэ: “Акаары, ити бэйэбит иһэбит буолбат дуо?” - диэт, истиэнэ тилэри сиэркилэни ыйан көрдөрбүт. Уруургуу көрбүт уола бэйэтин күлүгэ буолан хаалбыт. Ньукулай баараҕай сиэркилэни көрөн сөрү диэн сөхпүт. “Көр эрэ, мин иичиги этэрбэстээх бүрээт уола диэтим ээ!” - диэн саҥа аллайбыт.

Дьэ, дьоммут барахсаттар, туттарсан, үөрэххэ кииртэр уонна үөрэнэ сылдьыбыттар. Биирдэ, “хайыһарга күрэхтэһии буолар үһү” диэн буолбут. Мэхээлэ Ньукулайын соруйбут, “күрэхтэһиигэ кытын” диэн. Ньукулай да аккаастамматах, бу иннинэ физподготовка уруогар иккитэ-хаста хайыһары миинньибит эбит. Ньукулай түөһүгэр, көхсүгэр нүөмэр иилинэн, бириэмэтин кэтэһэн турбут. Хайыһарга бастакы күрэҕэ үһү. Нуучча уолаттара, бачыыҥкалаах, маастаах хайыһардаах эрэттэр, “старт!” диэтилэр да, сыыйылыннара тураллар үһү. Биһиги киһибит бириэмэтэ тиийэн кэлбит. Кини этэрбэҺигэр мааһа-тойо суох хайыһары хоппуруон быаннан баанан, бамбуук хаалыктарыгар тирэнэн, бэлэм турбут. “Старт!” диэн буолбут. Ньукулай Хорутуонап сүүрэн лабыгырата турбут. Арай, иннэ-кэннэ көстүбэт гына хаар ытыллан олорор үһү. Бирэмээнэ, хаптаһын хайыһар чигди хаарга охсуллара бөртүлүөт тыаһын курдук лаһыгыраан, халлааны сатарытан, түһэ тураахтаабыт. Мэхээлэтэ: “Чээн, мин киһим барахсан, итинник лабыгырайдаҕына, сотору эстэрэ буолуо”, - дии хаалбыт. Ньукулай оннук хоҥнон баран, дьэ, сыыйа тэбэн, иннигэр стартаабыт уолаттары тилэх баттаһа сыыйылыннаран испит.
Дьэ, “төннүөхтээх бириэмэлэрэ кэллэ” диэн буолбут. Арай, хайа кэтэҕэр тыас бөҕө сатарыйан иһиллибит, ону кытта, хайа оройугар, аан туман ортотугар, киһи баар буола

түспүт да, аллараа анньынан кэбиспит. Ньукулай барахсан, икки харахтара эрэ чоҕулуйан көстөр буолуор диэри кырыаны бүрүнэн, бастакыннан биэтэккэ кэлбит. Саха устудьуоннара “ураа!” бөҕө буолтар. Ньукулай онно этэр үһү: “Нууччалар барахсаттар, сыыры сатаан тахсыбаттар эбит, мин сүүрэн лабыгырайан ааһан иһэбин!” - диэн. Ити күрэхтэһиигэ кини 2-с разряд нуорматын толорбут.
Дьэ, саха биллиилээх поэта Ньукулай Чуор, анаан дьарыктаммыта буоллар, биллэр хайыһардьыт буолара хаалбыт эбит.

Альберт Андреев