Эргиллибэт эдэр, эрчимнээх сааһы кырдьан олорон ким истиҥник,
сылаастык ахтан-санаан ылбатаҕа баарай? Оччоҕо эйиэхэ туох эрэ
биллибэт күүс киирэн хараҕыҥ сырдаан, санааҥ күүһүрэн кэлэр
буоллаҕа.
    Мин дьиэбэр күнүс соҕотоҕун олордохпуна, остуолга сытар
сиэбим төлөпүөнэ өрө тырылыы түстэ. Соһуйбут курдук эһэ тардан ылан истибитим, дэриэбинэттэн эдьиийим Ольга эрийэр эбит. Үөрбүт-көппүт, чуолкай баҕайытык эрчимнээхтик чаҕаарбыт куолаһа бу аттыбар баар курдук иһилиннэ.
    - Быраатым, дорообо! Хайа туох сонуннаах олороҕун?
    Сонун дуо? Оттон ол чопчу тугу интэриэһиргииргиттэн буоллаҕа дии. Эйиэхэ туох баарый? Урут эрийбит киһи маҥнай кэпсии түһүүй.
    - Оо, кэпсээтэххэ дэриэбинэбит иһинээҕи бэйэбит кыараҕас олохпут-дьаһахпыт, кыһалҕабыт кыайтарбатын тустарынан аҕыннахха, син иирбэ-таарба үчүгэй да, куһаҕан да сонуннар баар аҕай буоллахтара буолуо.
    - Хайа оттон, үчүгэй сонуҥҥуттан саҕалаарыый.
    - Дьэ, быраат, мин санаам көтөҕүллэ сылдьар…
    - Куоласкыттан сэрэйэн олоробун.
    - Тыый, билэриҥ бэрт эбит дии.
    - Мин чугас киһим куолаһыттан кутун-сүрүн эндэппэккэ билээччибин ээ.
    - Оччоҕо, чэ, иһит. Бэҕэһээ комсомол төрөөбүт күнэ буолан ааста дии. Билэр инигин?
    - Билэбин, кулуупкутугар ону бэлиэтээтилэр
дуу, онно сырыттаҕыҥ дии.
    - Эчи суох, ол тымныытынан аатырбыт кулуупка ким кэлэн былдьаныай. Оннук үтүө тэрээһини ыытыах да киһи баара көстүбэккэ дылы. Хата тэлэбиисэрбин бириэмэтигэр холбоон комсомол төрөөбүт күнүгэр аналлаах биэриини дуоһуйа көрдүм. Ырыаһыт Александр Самсонов комсо­мол туһунан ырыалары ыллыырыгар, көр, тэҥҥэ ыллаһа олордум ээ. Киһи санаатын көтөҕөр, урукку эдэркээн сааһы санатар, сүрэҕи ортотунан киирэр үчүгэй да ырыалар… Эдэр сылдьан ити ырыалары ыллыыр да этибит. Уйадыйаммын адьас харахпыттан уу-хаар тахса олордо эбээт. Олус астынным да, үөрдүм да. Дьиэм бүппэт түбүгүттэн киэһэ аайы сылайан эрдэ сытар бэйэм, ити комсомолум ырыаларын испэр киҥинэйэн ыллыы ыллыыбын хойукка диэри ону-маны гыммыта буола сырыттым ээ. Оҕонньорбунаан, Ньукулайдыын, үйэбит тухары бииргэ олорбут, комсомол оҕолор холбоспут, комсомол холбообут дьоно буоллахпыт дии. Оҕонньорум миигиттэн соһуйда быһыылаах. Хайа, бу эмээхсин комсомолугар
төттөрү төннөөрү гынна дуу диэн үгэргээн эппитин саба саҥаран кэбистим. Иккиһин төрүүрүм буоллар улахан үөрүүнэн төннүөм этэ, эн да комсомол буолбатах этиҥ дуо, билигин демо­крат буолбутуҥ аанньа, дьэ, тугу онно тоҕо көтөн олороҕун диэтим ээ. Оҕонньорум барахсан тугу да саҥараахтаабата, истэн эрэ кэбистэ.
    - Оҕонньоргун улаханнык хоппуккун дии.
    - Кыратык киирэн биэртин, кырдьык, хоттум быһыылаах. Чэ, бачча сааспытыгар диэри нэммитин билсибит аҕай дьон буоллахпыт эбээт, ол аайы холку муҥутаан кыһанаахтаабат.
    Нөҥүө сарсыардатыгар сундуугум түгэҕэр уура сылдьыбыт шкатулкам түгэҕиттэн комсомолум билиэтин уонна значогун булан ыламмын имэрийдим-томоруйдум. Сүрэҕим сылааһынан илгийдэ. Эдэр сааспар билиэппин куруук бэйэбин кытта илдьэ сылдьарым, значокпун түөспэр анньынарым, үчүгэй да кэмнэр этилэрэ. Ыллым да значокпун кэтэ сылдьар дьиэтээҕи халаатым таһынан анньынан кэбистим. Күнүс оскуолаҕа үлэлиир уолум
Саша эбиэттии киирдэ. Анньына сылдьар значок­пун көрөн соһуйда аҕай:
    - Хайа, ийээ, бу туох значогун анньына сылдьаҕын, халааккар буола-буола?
    - Тоойуом, бэҕэһээ комсомол төрөөбүт күнэ этэ дни, эдэр сааспын санааммын бу анньына сылдьабын ээ. Оскуолаҕытыгар туох буолла?
    - Суох, туох да буолбатаҕа.
    - Дьэ ити, сэрэйбит курдук, урут комсомол диэн эдэр ыччаты түмэр, үчүгэйгэ салайар тэрилтэ баар этэ. Октябреноктар пионерга, пионердар комсомолга, комсомоллар партия чилиэнигэр үүнэн тахсаллара, - диэн сырдатан ыллым.
    Эдьиийим эдэр ыччат урукку комсомол курдук салайар, көҕүлүүр тэрилтэтэ суох буолан муна-тэнэ сылдьарын, үлэҕэ-хамнаска кыһаллыбатын, компьютер, интернет, сиэп төлөпүөнэ күнү быһа кинилэр арахсыспат күннээҕи оонньуурдара, дьарыктара буолбутун сэмэлээн да, абаран да элбэҕи кэпсээтэ.
    - Ыччаттарбын, оҕолорбун аһынабын да, үлэни өрө тутар үчүгэй олох бу мин кэнним уһаабыт, инним кылгаабыт киһи үйэбэр кэлбитин көрүөм дуо? - диэн муҥатыйан сонунун түмүктээтэ.
    Кырдьык даҕаны! Мин эдьиийбэр кырдьыгы эппитигэр сөбүлэһэ түстүм!