Нулевой кылааска саҥардыы киирэн үөрэнэ сылдьабын. Биир күн дьиэлээн иһэн Былатыанап Баанньыкка: - Сарсыарда биһигини кытта оскуолаҕа барыаххын. Дьуурка, Генчик буолан кэпсэтэ-кэпсэтэ барабыт,налыччы - диэтэ. Мин сарсыарда аайы Лээхэптэргэ тахсабын,онтон мустан сүүрүү-хаамыы аргыстаах улахан уолаттары сырсабын. Тыын быһаҕаһынан тыынан, аҕылаан-мэҥилээн тиийэбин,оскуолабар. Инньэ гынан киһибэр сөбүлэстим. Кини Генчиккэ үргүлдьү ааһар,мин Дьууркаҕа тахсабын,онтон сыыр анныгар көрсөн оскуолалыах буоллубут.
Сарсыарда Дьууркаҕв таҕыстым,киһим саҥа туран сууна-тараана сылдьар.

• Чэ,Арсен,киирэн чэйдэ иһис.
• • Суох,чэйдээн киирдим.
• Юраны кэтэһэ таарыйа аһас,таах туруох дуо?
• Ийэтэ остуолга ыҥырар,солуобуйатыгар аккаастаабыта буолан баран,остуолга ааһабын.

    Суоппуйа асчыт бэрдэ,аһа минньигэһэ сүрдээх,бурдук ас арааһын астыыр. Саҥардыы чэйдии олордохпуна,киһим тотон,таҥна барар. Школьнай форматын, кууркатын, бэргэһэтин кэтэн,суумкатын сүгэн баран мин бүтэрбин кэтэһэн олорор. Били кинини кэтэһиэхтээх этим,аны кини миигин кэтэһэр. Аһаан бүтэн дьэбарабыт,хойутаан эрэрбитин син билэбит.
Киикэ таһынан ааһан иһэн:

• Киикэ баара дуу?
• -Барбыта буолуо
• -Баҕар баар буолуо,киирэ сылдьыахха.

Саҥа туораан истэхпитинэ Мааса утары тахсан:
-Уолаттар баарыын барбыттара,хойутаары гынныгыт,түргэнник бара охсуҥ - диэн тиэтэтэр. Хаамыыбытын эбэн биэрэбит,сыыр анныгар дьоммут кэтэһэн тураллар эбит. “Баанньык Уута” тоҥон муус үрдүнэн сылдьабыт, чараас хаардаах. Кыһыҥҥы суолбут арыллыбыт кэмэ. Ол эрэн Дьууркабыт кыһыҥҥы суолунан буолбакка,күһүҥҥү суолунан илтэ. Кэлин өйдөөтөххө,кэннибититтэн кэлэр учууталлар ыксаппатыннар диэн албаһа эбит.
    Аара суолбутугар СПТУ гарааһа турар.- Маны үстэ эргийиэҕиҥ - диэн буолла,тута сөбүлэһэ охсон аа-дьуо эргийбитинэн барабыт. Түннүгүнэн гарааж иһигэр турар техникалары көрөбүт. Дьиҥэр,элбэхтэ көрбүт сэптэрбит да,биир да боксаны көтүппэккэ көрөбүт. Ситэри үстэ эргиппэт,харабынай Илларионов Ньукулай кэлэн үүртэлиир:- Тугу гына сылдьаҕыт манна,үөрэххитигэр бара охсуҥ,хойутаатыгыт!". Заправкаҕа дылы арыаллыыр.

Билиҥҥи Тайбаан Арыытыгар тахсан дьэ налыйабыт,мантан ким да ыксаппат да,холдьохпот да.

    Дьуурка Баанньалыын кэпсээннэрэ дэлэй дьон. Сайын аайы Ньурбанан, Дьокуускайынан сылдьан кэлэллэр,онон билэллэрэ-көрөллөрө үгүс. Генчик биһиги истээччилэрбит,дьоммут былдьаһа-былдьаһа кэпсииллэр. Мин ,дьиэбиттэн тэйбэтэх киһи, ордук сэҥээрэбин.

• Ньурбаҕа трамвайынан айаннаан истэххэ кумах хайалар бааллар.
• Тахса сылдьыбыккыт дуу?
• Тахсан,саамай чыпчаалыгар таҕыстахха Маар көстөр.
• Кырдьык дуо?
• Кырдьык.
• Массыынанан айаннаатахха суол кытыытыгар тыһыынча лабаалаах мас баар
• Кырдьык дуо?
• Кырдьык
• Ол ким аахпыт үһүнүй,лабаатын?
• Учуонайдар
• Ээ сөп
• Ньурбаҕа күлүгээттэр бааллар
• Көрбүтүҥ дуо?
• Көрөн, 5 чаас кэннэ уулуссаҕа ким да тахсыбат, күлүгээттэр дьону кырбыыллап
• Кырдьык дуо?
• Кырдьык

Ити курдук сымыйа-кырдьык аҥардаах кэпсэтиилээх айанныыбыт. Дьуурка аны туран худуоһунньук бэрдэ. Кэпсээнин хаарга ойуулаан көрдөрөр,онто өссө итэҕэтиилээх.

Дьокуускайга сылдьыбыттара өссө элбэх кэпсээн- ойуу буолар. Тоҕус этээстээх дьиэҕэ лиибынан хатааһылаабыттар. Өрүскэ киирэн “Ракета”, “Метеор” теплоходунан устубуттара, куорат тула поеһынан айаннаабыттапа, вагон-рестораҥҥа аһаабыттара,астара мип-минньигэс үһү.

Тоҕус мэндиэмэннээх “1000 мелочей” лааппыга тимэхтэн саҕалаан “Волга” массыынаҕа тиийэ баара, кинилэр сылдьалларыгар биир саха киһитэ 15 тыһыынчаҕа хап-хара “Волга” ылбыт эбит.“Колесо обозрения” саамай үрдүттэн куорат ытыска уурбут курдук көстөр эбит. Баанньыкка аҕата балкоҥҥа тахсан табаахтыы турарын көрбүт, дьиэлэрэ төһө да куорат түгэҕэр турдар. Карусель,аттракцион арааһыгар сылдьыбыттап, кэлэ-бара сөмөлүөр арааһынан көппүттэр уо.д.а. арааһы кэпсээн үөрэх эрэ, туох эрэ отой умнууга хаалан бэрт налыччы хаамабыт. Оскуолабыт көһүннэҕинэ эрэ түргэтиибит. Ол гынан бастакы уруок бүтэрэ уонча мүнүүтэ хаалбытын кэннэ кылаастарбытын буоабыт. Икки-үс күн ол курдук аайдаан сырыттыбыт онтон дьоммутугар үҥсүү киирэн аргыстаһарбытын тохтоттулар.

01.08.19 сыл
Арсен Михайлов
Маар с.Ньурба