Аудиота:

Хаһыат ааспыт нүөмэригэр эрэннэрбиппит курдук эһиги болҕомтоҕутугар республикаҕа аан маҥнай ыытыллыбыт быраабылата суох охсуһуу кыайыылааҕа Анатолий Андреевтыын кэпсэтиибитин таһаарабыт.

— Анатолий, быраабылата суох охсуһууга хайдах, туох санааттан кэллиҥ?
— Бу күрэхтэһии буолуон аҕыйах хонук иннинэ Алексей Уваров ыйыппытыгар тута сөбүлэспитим. Харчы туһунан санаабатаҕым. Видеоҕа уруккуттан маннык охсуһуулары көрөн боруобаланыахпын баҕарар этим. Онон түгэни мүлчү туппатахпыттан үөрэбин. Бу киирсиигэ бэлэмнээбит тренерим Виктор Николаевич Колескин салалтатынан республика түһүлгэтигэр анаан эрчиллиэм. Ол эрээри тустуубун быраҕар санаам суох.
— Бу спорт көрүҥэ дуу эбэтэр шоу дуу?
— Шоу, мээнэ охсуһуу да буолбатах. Ол чуолкай. Бойобуой көрүҥнэр бары сүүрээннэрин мунньар, киһи күүһүн-уоҕун, эр санаатын көрдөрөр спорт көрүҥэ. Холобура, бокска утарылааһааччылартан биирдэрэ дөйдө, самбоҕа кутталлаах балаһыанньаҕа киирдэ да судьуйа киирсиини тохтотор. Бу охсуһууга эмиэ оннук. Мин санаабар, тай-бокска холоотоххо эчэйиитэ өссө аҕыйах. Ким да улаханнык дөйбүтэ, илиитэ-атаҕа тостубута диэн соччо суох. Ол эрээри, рингэҕэ кэпсэтэн баран тахсар түгэн баар буолуон сатаммат. Бары кыайыы эрэ иһин охсуһа тахсабыт.
— Эн санааҕар быраабылата суох охсуһууга ханнык көрүҥ ордук сөп түбэһэрий?
— Бэйэм да саныырбынан, аан дойдутааҕы таһымнаах күрэхтэһиилэртэн көрдөххө тустуу көрүҥнэрин баһылаабыт киһи кыайар кыаҕа үгүс. Охсуһуу 80 %-на тустуу албастара. Биллэн турар спортсмен бэлэмиттэн, эрчиллиититтэн, былаанын таба туттарыттан олус элбэх тутулуктаах. Ыйааһын, киһи улахана-кырата улахан оруолу оонньооботтор. Ол эрээри бу көрүҥҥэ саамай сөптөөх ыйааһын 90-100 кг. Дии саныыбын.
— Кыайыыны ситиһэргэр сүрүн төрүөтү туох ылла уонна Валентины кытта инники сыһыаҥҥытыгар бу охсуһуугут “туорай” буолуо суоҕа дуо?

— Валентины сирэй көрсөн көҥүл тустууга иккитэ хотон турабын. Бүтэһикпитин хапсаҕайга Олоҥхо оонньууларыгар тустубуппутугар сэрэтиинэн хотторбутум. Кыайыыбар сүрүн төрүөт — мин 12 мүнүүтэ тохтоло суох киирсэргэ бэлэм этим. Валентин, мин санаабар, эрчиллиитэ ситэтэ суоҕа таайан түргэн тэтими тулуйбата. Тус бэйэбит сыһыаммытыгар уларыйыы тахсыа суоҕа. Биһиги спортсменнарбыт, ким даҕаны рингэҕэ күһэйэн таһаарбатаҕа. Маннык түһүлгэҕэ бэйэтин күүһүгэр эрэммэт киһи тахсыбат. Оттон хапсыһыыга ханнык баҕарар бөҕөс кыайыыга эрэ дьулуһар. Бу сырыыга мин кыайыылааҕынан таҕыстым. Валентин спортка өр сылдьыбыт уоппуттаах киһи бэйэтэ да итини үчүгэйдик билэр буолуохтаах.
Дьэ, ити курдук санаалаах, Саха сиригэр

маҥнайгы быраабылата суох охсуһуу кыайыылааҕа, ыарахан ыйааһыҥҥа 1994 сыллаахтан республикаҕа иннин биэрэ илик бөҕөс Анатолий Андреев. Чурапчы Дириҥиттэн төрүттээх уол алтыс кылаастан көҥүл тустуунан үлүһүйэн туран дьарыктаммыт. 16 Саастааҕар Владикавказ куоракка Бүтүн Союзтааҕы турнирга 83 кг. Бастаан спорт маастарын нуорматын толорбутун маҥнайгы улахан ситиһиитинэн сыаналыыр. Онон спорду сэҥээрээччилэр мантан инньэ кини спорт атын көрүҥэр холонуутун кэтээн көрүөххүтүн сөп.

Алексей Федотов, “Эдэр саас” корреспондена.
Хаартыскаҕа: Анатолий Андреев.
2000 сыл