Аудиота:

    Былыргы сайылык өтөҕүн анныгар, кыра ньалыар уу тахсыбытын маныыбын да тоҥон хаалар, үс хоннум манна кэлэн ол тухары күлүү гыммыт курдук биир чөккөөкуүлээхпин. Кэрийэн көрөбүн да нуул, кус кэлиэ эрдэ быһыылаах, үчүгэйдик уу да тахса илик, мин ис баҕа санаам бу диэн төрүттэрим өтөхтөрүгэр сайылык оҥостон Өбүгэм сиригэр сүөһү, сылгы ииттэн көрөөрү гынабын, аны биэнсийэ киһитэ туос иллэҥ буоллаҕым дии, оҕолор да улааттылар, көмөлөһүөхтэрэ. Бу сайын хоно– өрүү, сир астыы кэлэ сылдьан наһаа сөбүлээн барбыта. Хата бу сиргэ сайылык туттуохха баар эбит диэбитигэр мин иилэ хабан ылан былаан бөҕө буолбуппут…
Токуччу тоҥон, тары сиэбит ыт курдук ыбылы титирээн сайылык биир дьиэтигэр таҕыстым…
Сайын отчуттар түһэр буоланнар сэнэх, нааралаах элбэх киһи сытар.
Тимир оһоҕун оттон үргүлдьү утуйан хааллым.
Арай ол утуйа сытан иһиттэхпинэ…
–Нохоо тур тылбыйар кынаттаах кыай, сүр сүгүлээнэ буолла–
Диэн сөҥ саҥа иһилиннэ, уһуктан кэлтим күн киирэн саҕах кытаран турар эбит, сып сап хомунан дурдабар киирдим, дьиктиргии санаатым испэр туох түүлэ эбитэ буолла…
Саҥардыы олорон истэхпинэ моонньоҕон саҥата бөҕө буола түстэ, ону кытта хантан да кэлтэрэ биллибэккэ отучча үөрдээх кус уубар кыайан түспэккэ олох сырайбын кырбаан аастылар, кирийэн умса туттан олордум,, курук–курук,, дии дии эргийдилэр, арааһата кыайан түһүө суохтар дуу, күөрэтэрдии бэлэм олордум. Эмиэ уум үрдүнэн эргийдилэр , олох чөмөхтөһө түһэллэрин кытта биэстэ утуу-субуу таһаардым, кэһэн киирэн уонча куһу хомуйдум…
Дьэ били саҥа курдук түүнү быһа кус айаннаата, отучча куһу өлөрөн дьиэҕэ тахсан утуйан хааллым…
Арай ол утуйа сытан түһээтэхпинэ биир мас тайахтаах кырдьаҕас оҕонньор киирэн туох эрэ диэн мөҕөр быһыылаах, сырайа хараҕа кытаанах…
Ол мөҕө турдаҕына биир эмээхсин баар буола түстэ да оҕонньору таһырдьа дьөгдьөрүттэ уонна миэхэ хааман кэлэн сып-сымнаҕас илиитинэн төбөбүн имэрийдэ, чэпчэкитин хааман дуу устан дуу тахсан барда.
Уһуктубутум күн ырааппыт, түүлбүн тойоннуу сыттым да тугу да өйдөөбөтүм, туран уот отуннум сууннум тараанным,аһыам иннинэ эһэкээммин аһаттым, буокка баарыттан куруускаҕа кутан эһэкээммэр куттум. Киэһэлик эмиэ киирэн кус бөҕө ыттым, күн тахсыыта тахсан утуйа сытан эмиэ түһээтим, оҕонньорум үөрбүт аҕай, арай эмээхсин кыыһырбыт сөмүйэтин чочоҥнотор.
Күнүс уһуктан эмиэ түүлбүн тойоннуу сатаатым, ол саас көтөр бөҕө суһардым.Бүтэһик түүммэр утуйа сыттахпына иккиэн киирэ сырыттылар түүлбэр үөрбүттэр аҕай…
Дойдум үчүгэй хараҕынан көрсөн атаарбыта,
Хайаан да сайылык туттар эбиппин диэн айаннаан иһэн санаатым.

Арыылаах, С.