Уонча сыллааҕыта Новосибирскай куоракка көстүүнэйгэ түһэн сыппыттааҕым. Аатын умнан кэбиспиппин, “Новосибирск” диэн быһыылааҕа. Куорат саамай киинигэр баара.        Иккиэ буолан икки миэстэлээх хоһу ыллыбыт. Ол иннинэ алларанан айаннаан кэлбит, түүн утуйбатах эҥин буолан, киэһэ 5-6 чаас саҕана көстүүнэйи булаат, мин таҥастыын ороҥҥо сытан утуйан хааллым. Доҕорум уол сууна-тараана, тугу эрэ тилигирии, таҥаһын-сабын бэринэ хаалбыта. Бу сытан түһээтэхпинэ, арай, нүөмэрбит устун ким эрэ хаамыталыыр. Олус күүскэ, иһиллэр гына өрүтэ тыынар, ынчыктыыр дуу, ыҥыранар дуу курдук дорҕооннору таһаарар. Ол быыһыгар, киһиэхэ биллэр гына ойоҕоспун таарыйан ааһар, санаабар, тэллэхпин өндөтө-өндөтө туга эрэ хасыһа сатыыр курдук. Мин төһө да утуйа сыттарбын, табаарыһым билигин ваннаҕа сууна сылдьарын, мин бэйэм түһээн баттатан эрэрбин өйдүү сытабын. Бу сытан көрдөхпүнэ, сырдык көстүүмнээх, кытархайдыҥы хаалтыстаах киһи аттыбынан туох эрэ олус улахан санааҕа ылларбыт киһи курдук туттан-хаптан төттөрү-таары хаамыталыыр, ороннорбут аннын өҥөйөн көрүтэлиир, туумбалары хасыһар. Сирэйин көрө сатыыбын да, төбөтүн быһыыта хайдах эрэ чуолкайа суох, суураллан хаалбыт дуу, хаанньаччы баран хаалбыт дуу курдук моһуоннаах. Төбөтүгэр, арааһа, сэлээппэлээх быһыылаах. Мин уһукта сатаан мөхсөбүн, хамсыы сатыыбын да – кыайан уһуктубаппын. Саатар, ол киһи кэннигэр табаарыһым ваннаҕа киирэрин-тахсарын илэ көрө сытабын. Хата, табаарыһым суунан бүтэн кэлэн: “Туох буоллуҥ, баттатыҥ дуо? Саҥаҥ-иҥэҥ тоҕо сүрэй, ситэ өлөрүллүбэтэх борооску курдук орулуугун. Үүт-үкчү”, — диэн уһугуннарда, күлүү гынна. Уопсайынан, аргыһым киһи чуҥкуйбат көрдөөх-нардаах киһитэ этэ. Уһуктан баран, тоҕо эрэ ытырыктата санаатым. Уопсайынан, туох да түүлэ-битэ суох, сымара таас курдук бүтэй эттээх киһи буоллаҕым. Ол мин түүлбэр кытта биллибит буоллаҕына, чахчы туох эрэ баар буолуон сөп дии санаатым. Ол онон хаалла.    Киэһэ 8-9 чаас саҕана биһиги уолбутунуун аллара рестораҥҥа аһыы түстүбүт. Түһэн иһэн, туох тэһэ имнэммитэ буолла, портьеҕа тиийэммин: “Ити биһиги түспүт хоспутугар туох буолбутай? Туох киһитэ хаама сылдьарый?” диэн ыйыттым. Хоһум аатын этэрбин кытта (543 диэн курдук нүөмэр этэ) киһим сирэйэ тута уһуурга дылы гыммытын тута бэлиэтии көрдүм. Чахчы, тугу эрэ билэр эбит. Ону мэҥэһиннэрэн, ситиһиибин ситэри сиэри, киһим таҥаһын-сабын, дьикти төбөтүн ойуулаан бардым. Бу кэпсии турдахпына, киһим туох эрэ кнопканы баттаан ыҥырда дуу, хайдах дуу, көстүүнэй администратора дьахтар тахсан кэллэ. Кэпсээммин бэркэ сэргээн иһиттилэр. Дьахтарым тута: “Хантан кэлбиккитий? Хаскытый? Хас чааска манна киирбиккитий?” — диэн ыйыталаста уонна “ эһиэхэ алҕаһаан атын нүөмэри биэрбиттэр, ити броняламмыт нүөмэр. Эһигини атын нүөмэргэ көһөртөөн биэриэм. Айыы таҥара быыһаатын, онно туох да буолбатаҕа” диэн ньалҕаарытан кэбистэ. Ол гына-гына мин сирэйбин олус болҕомтолоохтук, чинчийэрдии көрөр. Быһаарсан бүтэн рестораҥҥа күүтэн олорор табаарыспар баран эрдэхпинэ, администратор дьахтар сырсан кэлэн, тоҕо эрэ сибигинэйэн “ойууҥҥун дуо?” диэн ыйытта...    Ол кэннэ биһиги атын нүөмэргэ көспүппүт. Сарсыныгар бу көстүүнэйгэ ис-тас сууйуу-сотуу үлэҕэ сылдьар гастарбайтер кыргыз дьахтарын кытта кэпсэттибит. Кыргыз дьахтара биһигини уруургуу көрөн, “кимиэхэ да этимэҥ” дии-дии кэпсээбитэ. Кырдьык, ол нүөмэргэ былырыын куһаҕан быһылаан буолбут. Ол биһиги түспүт хоспутугар ханна эрэ ыраах Сибииргэ ньиэп дуу, гаас дуу хостооһунугар холтууралаан, элбэх харчыны өлөрөн баран дойдулаан иһэр хохуоллар биир киһилэрин өлөрбүттэр. Өлөрөн баран дуу, тыыннаахтыы дуу, 5-с этээстэн аллара бырахпыттар. Онно төбөтүн үлтү түспүт. Дипломаттаах харчытын уоран барбыттар. Ол дьону туппуттарын дуу, суоҕун дуу интэриэһиргээн ыйыппатаҕым. Быһылаан кэнниттэн ити нүөмэргэ дьону түһэрбэккэ кэриэтэ турбуттар үһү. Ол өлбүт эрэйдээх билиҥҥэ диэри уоруллубут харчытын сонордоһон сордоно сырыттаҕа. Сарсыныгар киэһэ Толмачево аэропордугар барарбытыгар, администратор дьахтар иннибэр-кэннибэр түсүһүү, албыннаһыы бөҕө буола сылдьыбыта. “Туох эрэ улахан ойууннара, тугу барытын курдары көрө сылдьар дьон кэлэн бардылар, этэҥҥэ кыраабакка, порча ыыппакка бардаллар ханнык” дии санаабыт буолуохтаах.   Егор Неустроев, Дьокуускай.
kyym.ru сайтан