Биһиги олорор дэриэбинэбит федеральнай тыраасса кытыытыгар турар буолан, суолу оҥорууга улахан үлэ ыытыллыбыта.        Оскуолаҕа ол киэргэли бары эргитэ сылдьан көрбүппүт. Харааран хаалбыт синньигэс тимиргэ кыһыл, күөх оҕуруолар тиһиллибиттэр. Онон-манан аҕыйах салаа сиэл хаалбытыттан көрдөххө, сиэлинэн эмиэ киэргэппит быһыылаахтара. Устуоруйа учууталыгар көрдөрбүппүтүн оскуола түмэлигэр биэрэригэр эппитэ. Билигин эбитэ буоллар, хайа да улахан киһи миэстэтигэр төннөрөргө этиэ эбитэ буолуо. Оттон оччолорго дьон абааһыны, иччини итэҕэйбэт кэмэ этэ. Кэлин истибиппит – Куочук ончу даҕаны түмэлгэ туттарбатах эбит. Оннук көрүнньүк оҥостон баран, ханна гыммытын өйдөөбөт.    Күн-дьыл ааспыта. Биһиги бары утуу-субуу ыал буолан, оҕоломмуппут, бэл, оҕолорбут урууларыгар ыалдьыттаспыппыт. Биир күн иэдээннээх сурах кэлбитэ: Куочук соторутааҕыта эрэ ыал буолбут соҕотох уола массыына саахалыгар түбэһэн, суорума суолламмыт. Майгылыын, дьүһүннүүн үчүгэйкээн уолчааны бары олус аһыйбыппыт. Сыл-хонук ааһан истэҕин ахсын мин өйбөр, били, түөскэ кэтиллэр киэргэл элбэхтик киирэр буолбута. Оччоттон өй-санаа, итэҕэлгэ санаа уларыйдаҕа. Биирдэ кылааһынан көрсүһүүбүтүгэр ити санаабын Куочукка эппитим. Киһим ол киэһэ сирбиэтэнэн кэбиспитэ. Оттон хас да хонон баран дьиэбэр кэлэ сылдьыбыта. «Айылҕалаах дьонтон ыйыт эрэ. Чахчы, былыргы киһи уҥуоҕун сүргэйбит сэппэр-сэмэбэр оҕобуттан ытыс соттубутум буолуо. Салгыы барбатын курдук, тугу гыныахпын сөбүй? Көмөлөс...» диэбитэ. Мин билэр эмчиппэр сүбэлэппитим.    Куочук эмчит сүбэтинэн киһи уҥуоҕун аттыгар тиийэн сиэри-туому толорбута. Эмчит бэйэтэ эмиэ барсан, ситэрэн-хоторон биэрбитэ. Ол сиэр-туом дьайдаҕа дуу, хайдаҕа дуу, Куочук дьиэ кэргэнэ сыыйа аматыйан барбыта. Кэргэнэ улаханнык ыарытыйа сылдьан баран, сүрдээҕин өрүһүммүтэ. Онтон кыыстара ыал буолан, сиэннэр кэлэн, тиэргэн иһэ эмиэ сэргэхсийдэ.    Көрбүөччү этиитинэн, сокуоннай сааһын туола илик эдэркээн кыыс бүөрүнэн ыалдьан өлбүт, ийэтэ бэлэхтээбит киэргэлин көрдөөн, ытаабыт-соҥообут. Онон Куочук дьиэ кэргэнигэр кэлбит иэдээн былыргы киһи киэргэлин иэстэбилэ буолуон сөп.   Семен ПАВЛОВ, Таатта. Тарҕат:
kyym.ru сайтан