Биһиэхэ кылгас кэмҥэ аҕаларын кытта кэргэннии учууталлар дьиэлэнэн олоро сылдьыбыттара. Аҕаларын аата Никита, төбөтө тараҕай, кыра уҥуохтаах сонос оҕонньор. Биирдэ дьонум бу эдэр ыаллары кытта киинэҕэ бардылар. Мин сааһым аҕыһым, эрдэ утуйан хаалбыппын. Балтыбын Наташаны Никита оҕонньор сыгынньахтаан утуппут. Сарсыарда туран, аһыы олорон, ийэм балтыбыттан ыйытар: “Эйигин бэҕэһээ ким сыгынньахтаан утутта?” — диэн. Онуоха үстээх балтым хап-сабар: “Хрущев”, — диэтэ. Аһыы олорор дьон күлсэллэр: “Биһиэхэ Хрущевпут чугас”, — дэһэллэр. Оччолорго дойдубут муҥур тойоно Никита Сергеевич Хрущев этэ. Дьоммут Никита оҕонньору  дьээбэлээн “Хрущев” диэн саҥаралларын оҕо барахсан истэн өйүгэр хатаан эрдэҕэ…
edersaas.ru сайтан