Сэргэй тастан киирээт да, аан чанчыгар Настя уһун сотолоох хара замша соппуоската турарын көрөн, «ханна көрдүм этэй» диэх курдук, дьиктиргии санаан аһарта. Иҥэн-хаһан Настя баара буолуо дии санаабатаҕа. Илиитин суунан баран, таҥаһын уларыттаары, искэ киирэн хоһугар ааһан иһэн, киэҥ саала ортотугар таас сирэйдээх улахан остуолга умса нөрүйэн, Настя бэрт үөрүйэхтик таҥас кырыйа турарын көрөн: — Хайа, Настя!.. — диэн соһуйта: — Дорообо… — Дорообо, Сэргэй… <…> Настя орто кылааска үөрэнэ сылдьан быһыылааҕа, туох эрэ быстах сорукка Сэргэйдээххэ киирэ сылдьан, ордук өйдөөн хаалбыта диэн — ыаллар киэҥ саалаларын икки муннугар сырдык халлаан күөҕэ кырааскалаах дьоҕус мас уһааттарга олордуллубут фикустар олус өнөрдөөн үүнэннэр, саала улахан түннүктэрин үрдүнэн тилийэ бараннар, бэйэ-бэйэлэрин даҕайсан тураллара этэ. Уонна саала эркинигэр түөрэтэ оһуор-ойуу буолбут, халыҥ, тупсаҕай араамалаах, таастаах — «Мона Лиза» симик мичээринэн аан дойдуну аймаабыт мэтириэтэ ыйанан турара. Фикустар уонна хартыына билигин да бааллара, дьиэ иһин дьикти иһирэх сыта туома сүүрбэттэн тахса сыллааҕыта ааспыт оччотооҕу ахтылҕаннаах кэмнэри санаталлара… Чэйдии олордохторуна, унаарыччы көрбүтүнэн ыаллар ийэлэрэ Лөкүөрүйэ кииртэ. Настя ийэтэ Маарыйа кэлбит-барбыт, биир кэм хабытайдаммыт, сытыы-хотуу эмээхсин эбит буоллаҕына, Сэргэй ийэтэ Лөкүөрүйэ олус холку, наҕыл майгылааҕа. Хата ол оннугар аҕата Дьөгүөр сүрдээх сэргэх киһи. — Дорообо, Нааста… Маша эппитэ ээ, киэһэ эйигин ыҥыртым диэн. Онто да суох түбүктээх, биирдэ солото суох киһини эбии түбүгүрдэн, бу да кыыс… — диэн кыыһын сэмэлээбитэ. — Дорообо, Лөкүө… Киэһэ өттүгэр баҕас сололоохпо-он… — диэбитэ Настя. Лөкүө таҥаһын сыгынньахтанар кэмигэр Мария Егоровна хойуутук бардаран чэй кута охсубута. Эмээхсин куйаха кырабыайкатынан кыырыктыйбыт суһуоҕун көннөрүнэ-көннөрүнэ кэлэн остуолга олорто. — Хайа, бу биирдэ кэлбит ыалдьыккытын сулугур ууну кытта аҥаардас бөрүөгүнэн эрэ күндүлүүгүт дуо?.. Баарыҥҥы миин тобоҕо элбэх этэ ди, — диэбитэ Лөкүө, кырдьаҕас киһи сиэринэн. Мария Егоровна: — Оо, дьэ, саатар тобох ээ… Настя наһаа миин иһэн бахсырыйа, уҥуох көмүллээн кычыгырата олорбот ини… — диэбитигэр бары күлсэн ылтара. Мария Егоровна Сэргэйдээх Настяны ийэтинии ис киирбэхтик, унаарыччы көрөн ылан баран: — Биирдэ кэлбит ыалдьыты диэ… Ким билэр… Мантан антах бииргэ да буолар инигит… Эһиги буолбут киһи баар ини, эчи хаарыаны… — диэбитэ. Настялаах Сэргэй симик мичээр саҕыллыбытынан, бэйэ-бэйэлэрин кэчэспиттии көрсөн ылтара. — Бу да кыыс, оҕолору кыбыһыннаран… — Лөкүө кыыһын тылын истэн, сүрүргээбиттии туттубута. — Онноо-ок!.. Оҕолор буолбакка… Настя кэчэһэн, күлүөхчэ туттан олорон: — Хайыыбытый, Мария Егоровна, ииспитин салгыыбыт дуо?.. — Маша диэтэҕиҥ ди, Настя… Мин эмиэ уһун күнү быһа поликлиникаҕа олорорбуттан сылайаммын, дьиэбэр ийэлээх аҕабар тахсаммын, саатар аҕыйах хонукка көннөрү Маша буола түһүөхпүн баҕарабын… — Просто Мария буолуохпун баҕарабын диэ… — Сэргэй күлэн ылта. Мария Егоровна сурдьун ис киирбэхтик кынчарыйан кэбиспитэ… — Мин оскуоланы саҥа бүтэрбит кэммэр, Маша «Просто Мария» сериалы көрө сылдьан, Хуан Карлоһы боруоста таптаан кэбиһэн, туһугар муҥ этэ. Туома аһаабат да, утуйбат да буола сылдьыбыттаах… — Сэргэй эдьиийин дьээбэлээбитэ. — Ии… Сыбыс-сымыйанан… — Маша иэдэс биэрэн киэр хайыспыта. Настя туттуна сатыы-сатыы күлтэ. Лөкүөрүйэ, «бу оҕолор солуута суох буоланнар» диэбиттии, сүүһүн аннынан сүргүччү көрөн кэбиспитэ… Настя Мария Егоровна халадаайын быһан бүтэрэн, дьиэтигэр тигээри, илдьэ барта. Сэргэй Настяны атаараары тахсыһан истэҕинэ, Маша ытыстарын холбуу тутан дьээбэлэнтэ… Сааскы хото уһаабыт күн саҥа киирэн, арҕаа саҕах кэтэҕэр кытара кыыһан турара. Дьыбар түһэн, күнүс сиккиэр тыалга бигэнэн күн уотугар эрэһэ долгуннарынан дьирибинэйэ оонньообут чалбахтар уулара хайыы сахха үүт үрүмэтинии чарчыйа тоҥон эрэллэрэ. Салгын сүүйэн ылбыттыы олус ырааһа. Дэриэбинэ илин өттүгэр хайа эрэ массыына тыаһа куугунуу-быыгыныы түһэн баран, умуллаатын, уу чуумпу буола түспүтэ… — Суумкаҕын тутабын дуо? — Ээ, суох, чэпчэки ээ… Хоннохтоһон баран, сэмээр сэргэстэһэ хаамсан иһэр соппуоскалаах дьон атаҕын анныгар хатаҥат хаара, муус тыаһа дьыбарга биир кэм хаачыгыраан, чуучугураан олороро. Настя дьиэтин кэлииккэ аана оскуола эҥээринэн ордук чугаһын иһин, ол диэки хайысхаламмытын, Сэргэй тоҥолоҕунан тардан, быһа охсуу уулусса өттүнэн бартара. Настя сирэйин күлүөхчэ туттубута… Бүөтүр харааһын муннугун ис өттүгэр аан айаҕар кэлэн тохтоот, үгэстэринэн, иэдэстэриттэн уураһан ылтара. Эҥил баһыгар иилиммит суумкатын көннөрүнэн баран, аан тутааҕар илиитин уунан эрэр Настяны Сэргэй бэгэччэгиттэн харбаабыта… Арылхай харахтарын кэҥэтэн соһуйбуттуу көрбүт Настяны Сэргэй сэрэнэн биилиттэн кууспута… Онтон ыга сыстан, оргууй аҕай иэдэһиттэн уураан иһэн, уостарын сэмээр Настя уоһугар даҕайта… Настя санныгар иилинэн турбут суумката төлө түспүтүн өйдөөбөтөҕө да быһыылааҕа… Сэмэн Маайыһап. «Дьолго дьулуһар буоллахха», 2-с кинигэ. «Айар» кинигэ кыһата, 2025 с. Кинигэ «Айар! маҕаһыыннарыгар атыыланар.
edersaas.ru сайтан