Сунтаар улууһуттан төрүттээх Антонина Елисеевна Григорьева (Осипова) эрдэ тулаайах хаалбыта. Кыра эрдэҕиттэн ыалдьар буолан, Дьокуускай куоракка сэллиги эмтиир балыыһаҕа эмтэммитэ. — Оҕо сылдьан Дьокуускайга балыыһаҕа сытар кэммэр, Мэҥэ Хаҥалас Павловскайыгар таһааран эмтииллэрэ. Павловскайга саҥа үөрэҕи бүтэрбит, киэҥ билиилээх-көрүүлээх Изольда Васильевна уонна Виктор Александрович Левтовтар дьиэ кэргэттэрэ ыраах Ленинград куораттан 1956 сылларга үлэлии кэлбиттэрин өйдүүбүн. Оччолорго нэһилиэккэ элбэх старовердар олороллоро, сахалар аҕыйах этилэр. Виктор Александрович күнү быһа үлэтигэр түбүгүрэрин өйдүүбүн. Үлэтигэр олус бэриниилээх киһи этэ. Левтовтар саҥа үөрэҕи бүтэрбит буолан, олус эдэрдэрэ. Ону билигин даҕаны дьиктиргиибин, бачча эдэр дьон ыраах, тыйыс тымныы хоту сиригэр Ленинград курдук сиртэн кэлбиттэрин. Кинилэр оһоҕунан оттуллар мас дьиэҕэ олороллоро. Виктор Александрович оҕо санаторнай-туберкулезнай балыыһатыгар сэбиэдиссэйдээбитэ. Кэргэнэ Изольда Васильевна амбулатория бырааһа этэ. Аны саҥа үөрэҕин бүтэрбит эдэр киһи диэтэххэ, Виктор Александрович оҕолорго эпэрээссийэ оҥороро, лимфа былчархайдарын быһар этэ. Дьиэлэригэр элбэх медицинскэй литература баара, ону сэргэ хосторугар улахан контрабас турарын өйдүүбүн. Павловскайга эмтэнэр кэммэр миигин биир олохтоох соҕотох дьахтар иитэ ыла сылдьыбыта. 5 кылааска үөрэнэр кэммэр, Левтовтардыын биир дьиэҕэ олоро сылдьыбыппыт. Кинилэр икки хоско, биһиги биир хоско. Ол гынан баран, бары биир хоско аһыыр этибит. Мин үс сыл курдук олорон баран, Сунтаар Кутанатыгар аймахтарбар күрээн хаалбытым. Улахан оҕолоро Саша 2-3 үс саастаах этэ. Онтон кыыстара Марина Павловскайга күн сирин көрбүтэ. Мин ол саҕана 13-14 саастах этим. Кэлин билбитим, Левтовтар Арассыыйа биллэр артыыската Дарья Мороз эбэлээх эһэтэ эбит. Оттон кыыстара Марина Левтова быраас үөрэҕэр үөрэммэккэ, эмиэ киинэ артыыһа буолбут. Мин үөрэрим диэн, Левтовтар курдук, үтүө дьон сыдьааннара билигин даҕаны тарҕаналлар, оҕолоро, сиэннэрэ эмиэ эбэлэрин, эһэлэрин курдук үлэһит мааныта дьон буолбуттар. Оччотооҕу ыарахан усулуобуйаҕа ыраах Саха сиригэр элбэх эдэр киһи атын куораттартан кэлэн үлэлээбиттэрэ. Олохтоох дьону кытта аһара тапсаллара, — диэн билигин 80 сааһыгар үктэммит, үлэ бэтэрээнэ Антонина Григорьева кэпсээнин түмүктээтэ. ЫСПЫРААПКА: Виктор Александрович Левтов (1931 сыллаахха Ленинградка төрөөбүт) учуонай-медик, физиолог уонна гематолог, медицинскэй наука кандидата. Кыыстара Мари́на Ви́кторовна Ле́втова (Мэҥэ Хаҥалас оройуонун Нөөрүктээйи нэһилиэгэр муус устар 27 күнүгэр 1959 сыллаахха төрөөбүт), Арассыыйа үтүөлээх артыыската. Сиэннэрэ Да́рья Ю́рьевна Моро́з (1983 сыллаахха Ленинградка төрөөбүт), Арассыыйа үтүөлээх артыыската, «Ника» киинэ бириэмийэтин икки төгүллээх лауреата, «Золотая маска» театральнай бириэмийэ лауреата. edersaas.ru саайтка анаан бэлэмнээтэ Анетта Егорова Хаартыска. видео: ааптар түһэриитэ уонна https://ru.wikipedia.org https://www.spletnik.ru
edersaas.ru сайтан