Оччолорго уон сэттэлээхпин. Оскуолабын бүтэрэн, устудьуон олоҕун саҥа билбит кэмим. Ол саҕана билиҥҥи курдук массыыналар субу-субу айаннаабаттара. Саҥа дьыл чугаһаан, дойдубар, Бүлүүбэр, айанныыр буоллум.     ***    Аргыс дьоммуттан кими да билбэппин. Үксэ саастаах дьон быһыылаахтар этэ. Син өр айаннаатыбыт. Суолбут аҥаарыгар тохтоотубут. Ким эрэ көҕүрэттэр, ким эрэ табахтыыр. Мин оҕо буоллаҕым, кыбыстыбыта буолан, ыраах баҕайы чэпчэтинэ бардым. Түргэнник киириэм дии санаан, соммун ылбакка таҕыстым. Арай тохтообут сирбитигэр чугаһаан истэхпинэ, массыынам холбонно да, иннин диэки көтүтэн уһуурда турда. Хаһыытыы-хаһыытыы кэнниттэн эккирэтэ сатаатым да, туһа тахсыбата. Уонча мүнүүтэ турдум. Тоҥнум. Ыксаатым. Ыгылыйдым. Суохпун биллэхтэринэ, кэлэн ылыахтара диэн эрэх-турах санаалаахпын. Ол эрэлим улам уостан барда. Туох баар айыылартан, таҥараттан көрдөһө турдахпына, суол биир өттүгэр чуп-чугас бөрө улуйда. Кутталбыттан сүрэҕим айахпынан тахса сыста. Туох баар сэниэбин мунньан, суол биир өттүнэн тыа диэки куоттум. Ол куотан истэхпинэ, аны иннибэр ырдьыгыныыр. Сотору буолаат, улуйан ылар. Итинник күөйэ көтө сылдьан ханнык эрэ алааска таһаарда.    Арай көрбүтүм, доҕоор, үүтээн оһоҕун буруота бу унаара турар эбит. Кып-кыра түннүк быыһынан чүмэчи уота кыламныыр. Үөрүүбүттэн үүтээн таһыгар хайдах баар буола түспүппүн да билбэккэ хааллым. Аан иннигэр чугаһаан баран өйдөөбүтүм, тоҥмут аҕай эбиппин. Бөрөттөн куотан тоҥмуппун да умнубуппун. Хаарга хаста да охтубутум. Ааны тоҥсуйан иһирдьэ киирдим. Кырдьаҕас оҕонньор уонна эдэрчи эр киһи бааллар. Миигин көрөөт, маҥнай куттаннылар. Абааһы киирдэ дуу диэбиттии, чинчийэн көрөттөөтүлэр. Туох буолбутун кэпсээн биэрбиппэр дьэ уоскуйдулар. Оҕонньор аҕабын билэр буолан биэрдэ. Утутардыы тэрийэн сытыардылар. Сарсыныгар атынан 30-ча км. чугастааҕы дэриэбинэҕэ илдьэн биэрдилэр. Мин дьолбор, биир дойдулааҕым уол бу дэриэбинэҕэ күтүөт эбит. Сарсыныгар дойдутугар бараары оҥосто-тэринэ сылдьарыгар, хата, түбэһэн биэрдим. Кинини кытта дойдулуур буоллум. Тиийбитим, дьонум миигин үлүйэн өлбүт дии санааннар, ытаһыы-соҥоһуу бөҕө буола олороохтууллар. Ол эрээри, кэлин аҕам кэпсээбитинэн, ийэм тыыннаахпын сэрэйэн билбит эбит.    Миигин илдьэ испит массыына Бүлүүгэ тиийэн дьонун түһэртээн баран, мин суохпун биирдэ билбит. Кууркам уонна таһаҕаһым эрэ сыталлар үһү. Кууркам сиэбигэр пааспарым баара, ону хостоон көрөн дьиэм аадырыһыгар тиийбит. Аҕабын кытта төттөрү барбыттар. Ол кэмҥэ мин номнуо сылаас үүтээн иһигэр утуйа сыттаҕым дии. Суоппары хайаабыттарын билбэппин. Ыйыталаһа барбатаҕым. Оҕонньор үүтээҥҥэ биэрбит соно билигин даҕаны баар. Сүрэхпэр чугас, күндү малым курдук саныыбын.    Бөрө миигин күөйэн, үүтээни булларан, олохпун өрүһүйэн турардаах. Билигин үс оҕо ийэтэбин, тапталлаах кэргэммин.   Мария НИКОЛАЕВА.
kyym.ru сайтан