Тыйыс айылҕалаах Кутурчинскай Белогорье сиригэр-уотугар дьикти быһыы-майгы тахсарын билэҕит дуо? Биллибэт төрүөттэн дьон сураҕа суох сүппүттэрэ география өттүнэн дьиибэ түбэлтэлэри үөскэттэллэр. Ааспыт сылга сүппүт Усольцевтар дьиэ кэргэттэрэ уонна сэттэ сыл анараа өттүгэр тайҕаҕа сүтэ сылдьыбыт биэнсийэлээх Виктор Виноградов бэйэ-бэйэлэриттэн чугас, хас да биэрэстэлээх тэйиччи сиргэ, олорбуттара билиннэ. Виноградов кыыһа Татьяна кэпсииринэн, Усольцевтар олорбут Сосновоборск уонна Тартат, ону тэҥэ Виноградов төрөөбүт Подгорнай бөһүөлэктэрэ каартаҕа тэҥнээтэххэ, чуолкай «үс муннугу» (треугольнигы) үөскэтэллэр. Бу пууннар ыккардылара 11 килэмиэтир. Бу тугуй — көннөрү түбэлтэ дуу, эбэтэр дьон өйдөрүн-санааларын аймыыр дьикти сирдэрэ дуу? Усольцевтар дьиэ кэргэн сүтүүлэрэ Усольцевтар — Сергей, Ирина уонна кинилэр кыыстара Арина — 2025 сыл балаҕан ыйын 28 күнүгэр Буратинка хайатын тэллэҕэр дьаарбайа сылдьан сүппүттэрэ. Киэҥ далааһыннаах көрдөөһүн туох да түмүгү аҕалбатах: кинилэр суоллара да, тус маллара да көстүбэтэхтэр. 21 хонук тайҕаҕа Бу быһылаан буоларын сэттэ сыл иннинэ, 2018 сыл алтынньы 6 күнүгэр, чуолаан бу сирдэргэ 66 саастаах Виктор Виноградов Тор диэн ытын кытта тыаҕа тахсан баран сураҕа суох сүппүтэ. Хас да нэдиэлэлээх көрдөөһүн туох да түмүгэ суох хаалбыта. Эрэл күн аайы уостан испитэ, ол эрээри 21-с хонугар аччыктаан-дьүдэйэн, нэһиилэ сылдьар эр киһи дьоҥҥо бэйэтэ тахсан кэлбитэ. Виноградов тыыннаах хаалбыт түбэлтэтэ киинэ сценарийын санатар. Кини кэпсииринэн, бэркэ билэр тыатыгар эмискэ хараҥаран хаалбыт уонна сирин-уотун бутуйбут. Үс нэдиэлэ устата эр киһи тайҕа устун муна сылдьан, отонноон, эриэхэлээн уонна тиит сымалатын сиэн тыыннаах хаалбыт. Оттон Тор диэн ытын кутуйахтары тутан аһаппыт. Үһүс нэдиэлэтигэр тыраахтар тыаһын истэн, ол диэки баран быыһаммыт. Тайҕа алҕаһы бырастыы гыммат Усольцевтар аймахтара билигин даҕаны маннык дьикти түбэлтэ салгыы хатыланарын итэҕэйэллэр.  Усольцевтар сүппүттэрин кэннэ атын да түбэлтэлэр эмиэ тахсыбыттара биллибиттэрэ: 2020 сыл от ыйын 19 күнүгэр 62 саастаах Людмила Мотыгино бөһүөлэгин таһыгар тэллэйдии, отоннуу тахсан баран төннүбэтэх. Дьахтары да, малларын да булбатахтара. Өссө биир дьикти түбэлтэ 67 саастаах Владимир Шатыгинныын буолбута. Кини 2019 сыл атырдьах ыйын 28 күнүгэр сүппүтэ. Сири-уоту бэркэ билэр, уопуттаах тэллэйдьит куруук сылдьар сиригэр тахсыбыт эрээри, халлаан эмискэ уларыйан, мунан хаалбыт. Саамай дьиктитэ  хас да нэдиэлэ буолан баран, кинини тыаҕа сылдьарын көрбүттэр, ол эрээри кини дьон көмөтүттэн аккаастаммыт. Ол кэнниттэн эр киһи сураҕа суох сүппүт. Билигин Усольцевтар дьиэ кэргэни көрдөөһүн салҕанар. Биир эрэ санаа дьону долгутар — «Сибиирдээҕи трегуольникка» чахчы туох буола турарый?
edersaas.ru сайтан