Арай биир үтүө күн биир кууруска үөрэммит уолум эрийэн, сыбаайбатыгар ыҥырда. Кэргэн ылыахтаах кыыһа ким буоларын эппэтэ. Киһиҥ: “Эн кинини билэҕин. Ол гынан баран эппэппин. Соһуччу түгэн буоллун”, – диэнинэн муҥурданна.        Мин үөрүүнү кытта сөбүлэстим. Иҥнэрим диэн, бэлэх ыларбар харчым мэлиһээй кэмэ буолан биэрдэ. Ээ, чэ, бэл, “атас туһугар атах тостор” диэн баран, өр ыра санаа оҥостон баран ылыммыт сабыс-саҥа “Никон” аппарааппын бэлэхтиир буоллум. Уруу буолар сирэ куорат саҥа түөлбэтигэр баар эбит, онон балай эмэ өрө-таҥнары хааман, бутуллумахтаан баран, син дьонтон ыйдаран-хайаан, тиийиэхтээх аадырыспар тиийдим. Көрдөхпүнэ, биир подъезд таһыгар дьон бөҕө аалыҥнаһар, кэлии-барыы. Аттыгар миэбэл тиэммит массыына турар. Биир кэрэ сэбэрэлээх, саас ортолоох дьахтар миигин эрэ кэтэһэн турбуттуу, утары хааман кэлэн, истиҥ баҕайытык мичээрдиир уонна букетым диэки көрөн туран: “Эн биһиэхэ, сыбаайбаҕа кэллиҥ быһыылаах? Мин – кийиит Наталья ийэтэбин”, – диир. Мин ол ааты истээт да испэр: “Тыый, Ильям бииргэ үөрэммит кыыспытын, Наташа Сомованы ойох ылан эрэр эбит буолбаат!”, – дии түстүм. Мин устудьуоннаабыт 5 сылым тухары ол Наташканы ыраахтан таптаан муҥнаммытым да, күүс-кыах булан онтубар билиммэтэҕим. Санаам ситимигэр сөрөнөн, чочумча саҥата суох ах баран турдум бадахтаах. Дьахтарым: “Биһиэхэ, баһаалыста, бу миэбэли таһаарарга көмөлөһүөҥ? Бэлэх. Эдэрдэр (сыбаайбалаахтары этэр) сотору кэлиэхтэрэ. Бу куруусчуттар бааллар да, бытааннара сүр. Саатар лиип үлэлээбэт”, – диир.    Наташаны таптал таҥарата оҥостубут, уһун түүннэри кинини ыралаан утуйбатах киһи, эгэ эрэ, кини нарын тарбахтара тыытыахтаах, күннэтэ кинини көрөн үөрүөхтээх миэбэли таһымына! Бэлэхпин кыыс ийэтигэр туттараат, балай эмэ ыарахан миэбэллэри тасыһан бардым. Бэһис этээскэ олороллор эбит. Таһырдьа – куйаас бөҕө. Подъезд иһэ биир оннук. Ыт курдук илистии манна баар буолла. Таһан бүтээппитин кытта, сыбаайбалаахтарбыт тиийэн кэллилэр. Үрүҥ былаачыйалаах кыыһы көрбүтүм: олох да Наташа буолбатах. Эбиитин “жених” кытта... үйэбэр көрбөтөх киһим!    Сыҥааҕым аллара түһэн баран турабын. Хата, дьолбор, эмискэ төлөпүөнүм тыаһаата. Табаарыһым эрийэр: “Хайа, Сергей, ханна бааргыный? Кэлэр инигин? Кэтэһэн олоробут”, – диир...    Кэлин билбитим, уолум сыбаайбата – аттынааҕы куорпуска эбит! Кыбыстыбыт, үөрбүт дуу омуммар, аны, төттөрү көрдүүрүм сүөргү буолсу, бэлэхпин да ыла барбакка, дьоммор тиэтэйдим. Табаарыһым кыыһа эмиэ биһигинниин үөрэммит Оля эбит этэ. Наташкам ыҥырыылаахтар ортолоругар баара. Бу сырыыга ньимийбит айаҕым аһыллан, сүтэрэ сыспыт кутталым да баһыйан, хас эмэ сыл тухары иитиэхтээбит тапталбын билиммитим. Быһата, бэрт сотору доҕотторбутун аны бэйэбит уруубутугар ыҥырыахпыт. Бу бэһиэлэй кэпсээни Москуба олохтооҕо Сергей үллэстибит. Оттон мин маны ааҕа олорон, биир эстрада ырыаһыта ыҥырыллыбыт дьонун бутуйан, аттынааҕы тутууга сыбаайбалааччыларга көтөн түһэн, ыллаан-туойан тахсыбыт устуоруйатын санаан сонньуйбутум. Онон анараа дьон, хата, буор босхо ырыа истэн үөрүү бөҕө үһү. Ким эрэ ыҥырдаҕа дии санаабыттар. Кыыспыт салгыы, дьэ, ыҥырыылаах дьонугар тахсан, ырыатын толорбут этэ. Онон урууга бутуллуу баар бөҕө буоллаҕа.
kyym.ru сайтан