Бу аҕыйах сыллааҕыта олоххо дьиҥнээхтик буолбут түбэлтэ. Тобугум ыалдьар диэммин Медкииҥҥэ көрдөрдүм. Үс нэдиэлэ устата балыыһаҕа киирэҕин диэтилэр. Киирдим. Эмтэнэ сырыттым. Оҕолору кытта билистим.     ***    Дьэ, икки аҥаар нэдиэлэ ааста. Тахсарым икки-үс хонук хаалла. Мин алтыс балаатаҕа биир кыыстыын сытабын. Сэттис балаатаҕа икки кыыс баар. Арай биир үтүө күн бииргэ хонор кыыһым тахсан хаалла. Сэттис балаата кыыһа эмиэ таҕыста. Онон миигин сэттис балаатаҕа көһөрдүлэр. Күн лаппа киэһэрбитин кэннэ.    Мин бассааптыы, муусука истэ сыттым. Кыыһым эмискэ: «Алтыс балаататтан ким эрэ тоҥсуйар. Истэҕин дуо?» – диэтэ. Мин итэҕэйбэтим. Иччитэх балаататтан ким тоҥсуйуоҕай. Улахаҥҥа уурбакка утуйардыы оҥостон сыттым. Арай, кырдьык, эмискэ улахан баҕайытык тоҥсуйдулар. Мин сүрэҕим айахпынан тахса сыста. Тоҥсуйан лиһиргэтэр. Онтон чочумча тохтуур. Ол кэннэ эмиэ тоҥсуйбутунан барар. Биһиги, улаханнык куттанан, ороммутун бииргэ холбоон сыттыбыт. Тоҥсуйалларын саараама тулуйбатыбыт. Хоспутуттан таҕыстыбыт. Сиэстэрэ көстүбэт. Улахан ааны хатаабыттар. Онус балаатаҕа уолаттар бааллар этэ. Биирдэрэ – кыра. Иккиһэ  – улахан. Олорго баран кэпсээтибит. Алтыс балаата, киһи эрэ куттаныах, аана кытта аһаҕас этэ. Кыра уолу «ааны баран сабыый» диэн көрдөстүбүт. Уол барахсан куттана-куттана сапта уонна бэйэтин балаататын диэки сүүрэн элэкэчийэ турда.    Ол икки ардыгар дьахтар кэллэ. «Туох тыаһыырый диибин. Эһиги сүүрэкэлээн оонньуу сылдьар эбиккит буолбат дуо?» дии-дии, мөхпүтүнэн барда. Биһиги саҥата суох туруохпут дуо, туох буолбутун барытын сиһилии кэпсээн биэрдибит. Дьахтарбыт хараҕа быччайан хаалла эрээри, туох да диэбэтэ. Суорҕанын, сыттыгын баран аҕалла уонна «эһигини кытта утуйуом» диэн, сибигинэйэ быластаан саҥарда.    Сарсыарда буолла. Били, онус балаатаҕа сыппыт улахан уолу таһаарбыттар. Кыра уол соҕотоҕун хаалаахтабыт. Арай түүн били кыра уол ытыырын иһиттибит. Сиэстэрэ биһиги балаатабыгар сиэтэн аҕалла. Биһиги сэрэйэн «туохтан ытыыгыный?» диэн ыйыттыбыт. «Аттынааҕы балаатаҕа ким да суох эрээри, тугу эрэ тоҥсуйан лоһурҕаталлар» диэтэ. Улахаҥҥа уурбатах дьон курдук туттан-хаптан уолбутун аралдьыта таарыйа мультик, киинэ көрбүтэ буоллубут.    Сарсыныгар, хата, мин уонна бииргэ сыппыт кыыһым тахсыбыппыт. Ол уолу таһаарбыттарын-суоҕун билбэтим. Дьэ, эҥин араас тыас иһиллэр эбит.   С.ИВАНОВА.
kyym.ru сайтан