Бу кэпсээни отуттан тахса сыллааҕыта ийэм кэпсээбитэ. Кини хаһан, кимтэн истибитин билбэппин. Ааспыт үйэ 1970‑с сылларын ортолоругар 18–20 саастаах уолаттар, кыргыттар биир алааска похуоттуу тиийбиттэр. Сынньана тиийбит дьон быһыытынан күнүһүн дэлби оонньоон-көрүлээн, аһаан баран киэһэ утуйаары бэрт улахан, сэбиэскэй кэм саҕанааҕы оҕуруот аһын харайар ыскылаакка киирбиттэр. Ыскылаат икки улахан ааннаах эбит. Түгэх диэки барбакка, икки кытыытыгар кэчигирэһэн сыппыттар. Өр-өтөр буолбатах, хантан да кэлбитэ биллибэт тыал ааннарын тэлэччи арыйан кэбиспит, холорук курдук ытыйан субу киириэх курдук эрийэ-эрийэ турбут. Эдэр дьон куттанан тугу да гыныахтарын булбатахтар. Холорук арыый уоскуйа быһыытыйаатын кытта ыскылааттан тахсаат, иннилэрин хоту сүүрбүттэр. Дэриэбинэҕэ кэлэн баран дьэ уоскуйбуттар. Дьиҥнээх холорук буоларын дуу, алаас иччитэ буоларын дуу сол курдук кыайан быһаарбатахтар. Кэлин улаатан, өйдөрүн тутан баран: “Мэникпитигэр тэптэрэн сирбитин-уоппутун даҕаны аһаппатах эбиппит ээ”, — диэн кэпсэтэллэр үһү. Онон сир-дойду иччилээҕин, өрүү аһата сылдьаргытын умнубат буолуҥ диэн ийэм эппиттээх.
edersaas.ru сайтан