Оҕо сылдьан ол-бу араас иччи, сибиэн, абааһы туһунан кэпсээннэртэн куттамматах киһи диэн суоҕа буолуо. Сир түннүгэ таайбытыттан ыххайан кэриэтэ итинник түбэлтэлэри кэпсэтэн сордооччубун. Биирдэ манныгы кэпсээбитэ.   ***    Оччолорго уончалаах уолчаан төрөппүттэрин, убайын кытта тэйиччи тыаҕа отоннуу барбыттар. Киэһэлик урукку үүтээни булан, оһохторун оттон, сирдэрин-уоттарын аһатан, сылайбыт дьон сиэринэн утуйардыы сыппыттар. Түүн үөһүгэр таайым хабаҕыран, таһырдьа көҕүрэттэ тахсыбыт. Дьыалатын оҥорон баран үүтээҥҥэ киирэн иһэн кэннигэр киһи сөтөллөрүн истибит. Өр толкуйдуу барбакка, үүтээҥҥэ сүүрэн киирэн, түргэн үлүгэрдик ааны хатаат, аҕатын хоонньугар дьылыс гынан хаалбыт. Аҕата ити кэмҥэ уһуктаҕас буолан, киһи сөтөллөрүн эмиэ истибит. Дьэ уонна бүтүннүү кулгаах буолан баран, иһиллии сыппыттар.    Били күтүрдэрэ үүтээни тула эргийэ сылдьан баран, тугу эрэ ботугуруу-ботугуруу, хаста да ааны тардыалаан баран, иһийэн хаалбыт. Сарсыарда тураат, саҥата-иҥэтэ суох хомунан дьиэлээбиттэр. Дойдуларын булан дьэ уоскуйбуттар. Ити түбэлтэ умуллубутун кэннэ, аҕата булчуттарга кэпсээбит. Онно биир кырдьаҕас булчут манныгы сэһэргээбит.    Урут, ааспыт үйэлэргэ, биир кэмҥэ араҥ ыарыы тура сылдьыбыта. Бу дойдуну эмиэ тумнубатах. Биир икки оҕолоох эдэр ыал ыалдьыбыттар. Ол иһин бу ыалы, дьонтон ыраах арааран, түҥ тыаҕа көһөрбүттэр. Ыаллар син тулуктаһан олорбуттар да, ыарыы ыар тыына дьыалатын оҥорбут. Маҥнай аҕалара быстыбыт. Онтон уон биэстээх уоллара өлбүт. Ийэлэрэ барахсан уончалаах уолун кытары иккиэйэҕин хаалбыттар. Астара-үөллэрэ бүтэн барар. Бүтүннүү баас, ымынах буолбут дьон ханна ыраатыахтарай, устунан бэргээн бараллар. Дьахтар эрэйдэнэн өлөртөн саллан барар. Киһилии көмүллүө суохпут диэн хараастар. Ол иһин түүн уола утуйа сыттаҕына, быһаҕынан сүрэххэ анньан өлөрөн кэбиһэр. Бэйэтэ балаҕаҥҥа киирэн быаланан өлөр. Кэлин аймахтара, син дьон буоллахтара, санаалара буолбакка, сыл курдугунан бара сылдьан кистээбиттэр уонна балаҕаны уоттаан кэбиспиттэр.    Сыл-хонук ааспытын кэннэ, бу бултаах-астаах, балыктаах дойдуга ол балаҕан чугаһыгар булчуттар үүтээн туттубуттар. Булчуттар «биирдэ эмэ ытаабыт-соҥообут дьахтар биллэн ааһааччы» диэн кэпсэтэллэр эбит. Бу сырыыга кинилэр курдук икки уол оҕолоох ыал отоннуу кэлбиттэрин сэҥээрбитэ буолуо диэн сылыктыыллар. Онтон ыла ити сиргэ сылдьа иликпин диэн, таайым кэпсээнин түмүктээбитэ.
kyym.ru сайтан