«Эн миигинэ суох сатаан олоруоҥ суоҕа» диэн тылларынан күн аайы кэргэним мэйиибин сууйара. Ол тыллар мин өйбөр-санаабар дириҥник иҥэн, мин чахчы оннук дии саныырым… Ол эрээри тулуйар санаам тоҕо барбыт түүнүн мин хаһан да умнубаппын. Ол түүн Эрчим эмиэ холуочук, өссө ордук кыыһырбыт кэлбитэ. Мин үлэбиттэн кыратык хойутаан кэлэммин, ас бэлэмнээбэтэхпин, дьиэни хомуйбатахпын сөбүлээбэтэҕэ. Ол күн кини миигин төбөбүнэн истиэнэҕэ күүскэ охсубута. Хараҕым туманырбыта, хааным сирэйбинэн, моонньубунан сүүрбүтэ. Ити кэннэ өссө кини, сылайбыттыы, илиитин суунан, дьыбааҥҥа утуйан хаалбыта. Оттон мин ваннаҕа сүүрэн киирэн, сиргэ олорон, ытыы-ытыы сиэркилэҕэ көрүммүтүм. Хааннаах сирэйбин, хараҕым анныгар көҕүрүүнү көрөн баран, дьэ өйдөөбүтүм: «Мин манна өлөр эбиппин. Ким да миигин быыһыа суоҕа, бэйэм быыһамматахпына, мин суох буолабын». Ол түүн ытаабатаҕым — ол түүн миэхэ олус ыар, ол эрээри соҕотох сөптөөх быһаарыыны ылыммытым. Сарсыарда кини үлэтигэр барбытын кэннэ, мин дьэ былааммын олоххо киллэрэргэ түһүммүтүм. Сирэйим, этим-сииним көҕөрбүтүн, хаппыт хааннаах баастары төлөпүөнү ылан, барытын хаартыскаҕа түһэрбитим. Онтон балыыһаҕа баран, травматолог бырааска сиһилии көрдөрөн, ыспыраапка суруттарам ылбытым. Быраас миэхэ олус көмөлөһүөн баҕаран, тутатына полицияҕа үҥсэргэ сүбэлээбитэ. Ити кэннэ мин дьиэбэр төннөн, хоспор хатанан олорон, социальнай ситимҥэ бэйэм ааппынан уһун да уһун, иннэ-кэннэ биллибэт, дириҥ ис хоһоонноох пост суруйбутум. Онно мин барытын кэпсээбитим: хайдах таптал саҕаламмытын, хайдах кырбыырын кистээбиппин, тоҕо тулуйбуппун, хайдах курдук өр кэм устата түүннэри-күнүстэри кутталга олорбуппун. Хаартыскаларбын уонна ыспыраапканы эмиэ хаартыскаҕа түһэрэн бу баар диэн илэ көрдөрбүтүм. Түмүгэр маннык суруйбутум: «Мин курдук дьахталларга, кыргыттарга сүбэлиибин — куттанымаҥ, тулуйумаҥ! Биһиги туох да буруйбут суох. Таптал диэн хааннаах, бастаах охсуу буолбатах. Бэйэҕитин харыстааҥ!». Ити кэннэ «отправить» диэн тимэҕи баттаабыппар илиим салыбыраата, ол эрээри сүрэхпэр уоскулаҥ, чэпчээбит курдук истиҥ санаа кэлбитэ. Постум сөкүүндэ иһигэр Сахабыт сирин соцситимнэринэн тыал курдук олус түргэнник тарҕаммыта, бары социальнай ситимнэри, сонуннары тилийэ көппүтэ. Хас да чаас иһигэр тыһыынчанан репост, сүүһүнэн өйөбүл тыллаах, ытыс таһыныылаах сурук кэлбитэ. Дьон миэхэ күүс-көмө буолбуттара, юристар босхо сүбэ биэрбиттэрэ, психологтар көмөлөспүттэрэ. Атын куораттартан, дэриэбинэлэртэн билбэт дьонум «эн соҕотох буолбатаххын, биһиги эйигин кытта…» диэн суруйбуттара. Ол дьон өйөбүлэ миэхэ кынат үүннэрбитэ, кутталбын суох гыммыта. Ити күн дьэ мин өйдөөбүтүм — мин сөпкө гыммыппын, маннык олохтоох мин эрэ буолбатахпын. Ол киэһэ полиция үлэһиттэрэ кэлэн, Эрчими тутан илдьибиттэрэ. Кини миигин «сымыйанан үҥсэҕин, дьону албынныыгын» диэн суоһарҕаммыта эрээри, тарҕаммыт хаартыскалар,  ыспыраапка уонна дьон-сэргэ, уопсастыбаннас өйөбүлэ кинини кыайбыттара. Суут кини буруйун толору дакаастаан, көҥүлүн быһан, хаайыыга ыыппыта. Мин, дьэ, арахсыыга сайабылыанньа биэрбитим уонна сокуонунан көҥүл буолбутум. Суут кэмигэр кини миигин көрөн баран, туох да диэбэтэҕэ, баҕар, дьэ кырдьык кыайтарбытын өйдөөбүтэ буолуо… Билигин мин саҥа олоххо үктэнним. Сөбүлүүр үлэлээхпин, эрэллээх доҕоттордоохпун, күн аайы куттаммакка, сүрэхпэр эрэллээх уһуктабын. Билигин кыргыттарга көмөлөһөр пуондаҕа волонтердыыбын, маннык ыар дьылҕалаах дьону өйүүбүн. Кыргыттарга туһаайан этиэм этэ — таптал диэн хаһан да охсуу, атаҕастабыл, хаайыы буолбатах! Таптал диэн көҥүл, өйөбүл, харысхал уонна сайдыы. Эһиги ханнык да эр киһиттэн куттаныа, ханнык да «аныгы» сыһыаннаһыыга бэйэҕитин сиэртибэлэниэ суохтааххыт. Хараҥаттан толлубакка тахсыҥ, көмөнү көрдөөҥ, бэйэҕитин харыстааҥ. Дьол уонна көҥүл — ол хас биирдиибит илиибитигэр баар, онон дьол иһин туруулаһар наада… Сайдам
edersaas.ru сайтан