Түннүгүнэн ыраахха, халлаан саҕаҕар суураллан эрэр күөх хайалары одуулуу олорон, Вероника санаатын сааһылаата. Киниэхэ барыта баар курдук. Дьон ымсыырар олоҕо: куорат киинигэр саҥа дьиэҕэ икки хостоох сырдык кыбаартыра, түннүгүн анныгар турар хара дьүһүннээх джип массыына, куорат таһыгар сайынын сир астыыр, салгын сиир сылаас даача, сылга иккитэ-үстэ муораҕа сынньаныы, хамнастаах, туруктаах үлэ. Барыта баар. Арай биир эрэ суох – баайы-дуолу, ситиһии үөрүүтүн кытта тэҥҥэ үллэстэр чугас киһитэ. Түөрт уон биэс сааһын туолар күһүнүгэр, Вероника олоҕун кинигэтин хаттаан арыйан, ааспыт кэмнэрин ыараханнык ааҕа олордо. Сүүрбэ саас — кынаттаах ыра Сүүрбэлээх Вероника – уоттаах-төлөннөөх, иннин хоту эрэ дьулуруйар, харахтара эрэлинэн кытыаста сылдьар кыыс. Университет бүтэһик кууруһун туйгуннук үөрэнэн бүтэрэн, кини иннигэр аартыктар бары аһаҕас курдуктара. «Бастаан атаҕар бигэтик туруохтаах, олох оҥостуохтаах, онтон эрэ кэлин дьиэ кэргэн туһунан толкуйдуохха сөп», – диэн бэйэтигэр бигэ тылын биэрбитэ. Бу тыллар кини олоҕун устатыгар кыһыл көмүс быа курдук субуллубуттара, сороҕор – кырдьык суолун ыйар сулус, сороҕор – кэлин өйдөөтөҕүнэ, бохсор, хаайар хандалы буолан. Оччолорго таптал киниэхэ иккис былааҥҥа турбута. Устудьуоннуу сылдьан бииргэ үөрэнэр, гитаралаах, уһун уҥуохтаах, хоһоон ааҕар уолун сөбүлүү көрөрө.Эдэр уол кинини киэһээ атаарара, күүлэйдии тахсыахха диэн ыҥырара. Ол гынан Вероникаҕа ити барыта – бириэмэни ыскайдааһын. Киниэхэ диплом, карьера, харчы – ити тыллар тапталтан, ырыаттан, хоһоонтон ордук суолталаахтыы иһиллэллэрэ. «Эн наһаа ыра санааҕын батыһаҕын, оттон мин олоҕу дьиҥнээхтии көрөбүн», – диэн биирдэ уолга эппитэ. Ол тыллар икки ардыларыгар көстүбэт эркини туруорбута. Уол сотору атын кыыстыын сиэттиһэн хаамар буолбута, оттон Вероника кыһыл дипломун кууһан туран, үөрэ-көтө: «Мин үрдүк үөрэхтээхпин!» – дии санаабыта. Бу кэм – сыралаһан туран, сыратын-сылбатын биэрэн үлэлээһин кэмэ этэ. Түүннэри-күннэри отчуот, бырайыак, сыыппара. Кини үлэтигэр бастыҥ буолуон баҕарара, уонна бастыҥ буолбута. Хамнаһа үрдээбитэ, дуоһунаһа үүммүтэ. Дьүөгэлэрэ кэргэн тахсан, оҕолонон, дьиэ-кэргэн түбүгэр ылларбыттарын көрөн, сороҕор дууһатын муннугар чуумпуга соҕотохсуйуу куруһа сүрэҕин кымаахтаан ылара. Онуоха кини бэйэтин: «Мин атыттар курдук буотахпын, мин күүстээхпин, мин барытын бэйэм ситиһэбин!», – диэн уоскутунара. Отут саас — ситиһии чыпчаала Отут сааһыгар Вероника – ситиһиилээх дьахтар. Дьэ, ол атаҕар бигэтик туруу диэн өйдөбүл эт-хаан буолбута: ипотекаҕа ылбыт кыбаартыратын болдьоҕун иннинэ сабан, эркиннэрин бэйэтин хара көлөһүнүнэн сууйан-сотон, киэргэтэн, уйа оҥостубута. Онтон массыына атыыласпыта. Кини олоҕо – чопчу былаан. Барыта кээмэйдэммит, суоттаммыт. Манна тапталга, соһуччу көрсүһүүгэ, иэйиигэ миэстэ суох курдуга. Бу кэмҥэ эр дьон кинини эргийбэт буолбатахтара. Биир үлэтигэр баар, маһы ортотунан тоһутуох көрүҥнээх, кэскиллээх эр киһи болҕомтотун уурбута. Кинилэр хаста да киинэҕэ сылдьыбыттара, эрэстэрээҥҥэ киэһээ ахсын аһаабыттара. Арай Вероника киһини микроскобунан көрөр курдук сыаналыыра. «Ити чааскытын сыыһа тутар… Бу тылы тоҕо туһанар? Инникигэ былаана суох эбит…» – диэн итэҕэстэри көрдүүрэ. Дьиҥэр, кини бэйэтэ оҥорбут «идеалыгар» сөп түбэһэр киһини көрдүүрэ, оттон олоххо оннук дьон бааллара биллибэт. Кини тула туппут кириэппэһэ үрдээн, халыҥаан испитэ. Бу кириэппэс кинини олох куһаҕаныттан харыстыырын таһынан, үтүөтүн да киллэрбэт буолбута. Аймахтара, дьүөгэлэрэ: «Кэргэн тахсар кэмиҥ кэллэ, сааһыҥ ыраатта», – диэн кыбыһынннарбыттыы саҥараллара. Онуоха Вероника: «Ким эрэ моонньугар олорор кэриэтэ, олохпун бэйэм оҥостубутум ордук», – диэн  кыыһырара. Кини ити тылларынан бэйэтин көмүскэнэрэ, дьиҥэр, ис сүрэҕэр туох эрэ сыыһа баарын сэрэйэр да курдуга. Сынньалаҥар кыраныысса таһыгар барар буолбута. Париж, Рим, Прага… Хаартыскаҕа түһэрэ, социальнай ситимнэргэ угара, дьон «лайк» баттыырын көрөн астынара. Ол эрээри ити айаннар дууһаҕа иҥэр үөрүүтэ суохтара. Кинилэр «ситиһии» диэн испииһэккэ эбии пуун эрэ курдуктара. Эйфель башнятын анныгар соҕотох турара, Треви фонтаныгар харчы быраҕан баран, тугу баҕарарын билбэккэ муунтуйара. Дьон пааранан хаамсаллара, күлсэллэрэ, куустуһаллара. Оттон кини – кэтээн көрөөччү, олох кэрэ көстүүтүн тастан эрэ одуулааччы. Түөрт уон саас — көмүс хаайыы Түөрт уонугар Вероника бары  баҕатын толорбута. Куорат таһынааҕы даачатын туттан бүтэрбитэ. Бэйэтэ оҥорбут дизайна, бэйэтэ үүннэрбит сибэккилэрэ. Чуумпу, ыраас, барыта бэрээдэк. Ол эрээри ити чуумпу сороҕор кулгаахха иһиллэрдии ыарахан буолара. Субуота киэһэ каминын иннигэр кыһыл арыгы куттан олорон, кини дьиэҕэ оҕо күлэр саҥата, эр киһи дьоһуннаах ботугурааһына хаһан да иһиллиэ суоҕун дьэ өйдөөбүтэ. Бу кини туппут кириэппэһэ этэ – сылаас, көмүскэллээх, ол эрээри кураанах. Көмүс хаайыы. Ол санаа биир чуумпу киэһэ ордук күүскэ охсубута. Бииргэ үөрэнэр дьүөгэтэ, үс оҕолоох ийэ, ыалдьыттыы кэлбитэ. Кинилэр эргэ хаартыскалары көрбүттэрэ. Онно, сүүрбэлээх Вероника, ол гитаралаах уолу кытта турара баара. Харахтара уоттаахтар, мичээрэ истиҥ. «Өйдүүгүн дуо, кини эйигин төһөлөөх күүскэ таптыырын, кэннигиттэн эккирэппитин?» – диэбитэ дьүөгэтэ. – «Эн эрэ ону аахайбатаҕыҥ, үөрэх, үлэ диэн буолбутуҥ». Вероника ол хаартысканы өр одуулаабыта. Ол кыыс, эдэр Вероника, тугу ситиһиэн баҕарбытай? Бу чуумпу, кураанах дьиэни дуо? Эбэтэр дьолу дуо? Дьүөгэтэ барбытын кэннэ, Вероника сарсыардааҥҥа диэри утуйбатаҕа. Кини олоҕун киинэ курдук эргитэ санаабыта. Ол сүүрбэлээх кыыс, отуттаах дьахтар биир сыаллаахтара – «баай-талым, дьоллоох олоҕу» тэрийии. Кинилэр «сарсын» туһугар олорбуттара. «Сарсын» дьиэлэниэм, «сарсын» массыыналаныам, «сарсын» баай-талым олохтонуом, оччоҕо дьоллоох буолуом дии саныыллара. Ол «сарсын» бүгүн кэлбитэ. Барыта баар. Арай дьол ханнаный? Дьэ онно кини өйдөөбүтэ. Олох диэн – уһун сүүрүү буолбатах эбит, түмүгэр бириис күүппэт. Олох диэн хас биирдии хардыы, хас биирдии тыын, хас биирдии күн. Кини «сарсын» туһугар олорон, «бүгүҥҥү» күнү мүччү туппут. Ол гитаралаах уолу кытта хаамыы, илиититтэн сиэтии, кини хоһоонун истии – ол дьол этэ. Ол кэскиллээх эр киһини кытта кэпсэтии,  киниэхэ сүрэҕин арыйыы – барыта дьол этэ. Кини олоҕо улуу тутууга майгынныыр: барыта чуолкай чертеһунан, былаанынан барбыт, саамай үчүгэй матырыйаалларынан туттуллубуттар, ол эрээри ол дьиэҕэ ким да олорбот. Сарсыныгар Вероника үлэтиттэн уоппуска ылла. Парижка эбэтэр Римҥэ билет атыыласпата. Хайа эрэ ыраах, билбэт улууһун киинигэр массыынатынан айаннаата. Күһүҥҥү кэрэ айылҕаны, саһарбыт мастары одуулаата. Биир кыракый дэриэбинэҕэ тохтоон, олохтоох остолобуойга аһаата, сэргэх эбээлэри кытта сэһэргэстэ. Киэһэ хонук сир көрдөөн, биир ыалга түстэ. Дьиэлэрэ боростуой, олохторо түбүктээх, ол эрээри кинилэр харахтарыгар олох баар — дьиэ кэргэн сылааһа, бэйэ-бэйэҕэ кыһамньы. Түннүгүнэн киирэр ый уотугар сытан, Вероника ытаата. Аны кини олоҕун сүрүн алҕаһын өйдөөтө. Ол гынан ону көннөрөргө билигин да кыах баар. Олох түмүктэммэт, итинэн бүппэт буоллаҕа. Баҕар, кини дьоло инники күүтэрэ буолуо. Баҕар, кини кимиэхэ да наадата суох кириэппэһин эркиннэрин көтүрэн, сүрэҕин арыйдаҕына, ол дьол бэйэтэ кинини булуо. Күн сарсын саҥаттан тахсыа. Уонна саҥа күнү Вероника «сарсын» туһугар олоруо суоҕа. Кини саҥа дэбиистээх уһуктуо: «Билигин. Бу түгэҥҥэ. Уонна хаһан?» Олох диэн биһиги олорорбут тухары «күүтэр» кэммит буолбатах, олох диэн биһиги олорор түгэммит. Сайдам
edersaas.ru сайтан