(Поп кулууп)

Сергей Максимов, Афанасий Стручков - саха эстрадатын кэлэр көлүөнэ артыыстара. Кинилэр билигин республикатааҕы эстрада театрын айар мастарыскыайыгар уһуйуллаллар уонна үөрэнэллэр. Эмиэ кинилэр - СГУ саха филологиятын, төрүт культуратын факультетын төрүт культураҕа салаатын кэтэхтэн студеннара. Онон бүгүн эһигини бу икки куобаҕы тэҥҥэ өлөрөр уолаттары кытта билиһиннэриэм.

Кинилэр сотору кэминэн үрдүк үөрэҕи туоһулуур икки диплому ылыахтара. Эстрада театрыттан - “Эстрада солист-вокалиһа” уонна университеттан - “Культуролог . Эстрада солист-вокалиһа” диэн идэлэргэ. Үчүгэй буолбатах дуо? Онуоха эбии билигин эстрада театрыгар үөрэнэллэрин таһынан, хамнастаах үлэһиттэр. Онон, икки өртүттэн барыстаахтык сылдьаллар. Биэс сыл үөрэммит, үлэлээбит үөрүйэхтэрин сотору кэминэн эһиэхэ көрдөрөргө, иһитиннэрэргэ бэлэмнэнэллэр. Маннык сонун суолунан инники идэлэрин ымпыгар-чымпыгар кинилэри Российскай Федерация уонна Саха Республикатын үтүөлээх артыыһа, СГУ доцена, саха эстрадатыгар бэйэтэ туспа суоллаах-иистээх Юрий Егорович Платонов үөрэтэр. Уолаттар үөрэхтэрин ирдэбилин быһыытынан билиҥҥитэ киэҥ көрөөччүгэ тахса иликтэр. Аан бастакы сүрэхтэниилэрэ сэтинньигэ биһигини кытта Хаҥалас улууһугар ыччат нэдиэлэтин чэрчитинэн ыытыллыбыт тэрээһиҥҥэ буолбута. Онон, үөрэ-көтө көрсүөҕүҥ, алгыстаах айаҥҥа алгыаҕыҥ:
Сергей Максимов Амма улууһун II Чакырыттан төрүттээх. Оҕо эрдэҕиттэн ырыаны доҕор оҥостубут эбит. Кыра сылдьан телевизорынан артыыстары көрө-көрө, сиэркилэ иннигэр туран эрэн ыллыыра үһү. Сэттис кылаастан Аммаҕа бэйэтигэр спортивнай оскуолаҕа тустууга дьарыктаммыт. Ол кэмҥэ оскуола вокальнай-инструментальнай ансамблыгар ыллаабыт. Ырыаҕа ордук дууһата сытара таайдаҕа, оҕо сааһын ыра санаата олоххокиирэр быатыгар, 1997 с. Улууһун культураҕа управлениета эстрада театрын айар мастарыскыайыгар сүүмэрдээһиҥҥэ ыыппыт. Тургутан көрүүнү ситиһиилээхтик ааһан, аны СГУ төрүт культураҕа салаатыгар кэтэхтэн ити мастарыскыай иһинэн көрүллэр анал миэстэҕэ киирии экзаменнары туттаран, биирдэ икки сиргэ студент буола түһэр.
Билигин төрдүс курска үөрэнэр. Үлэни, үөрэҕи тэҥҥэ дьүөрэлиир буолан, уолаттарга иккиэннэригэр даҕаны иллэҥ кэм кэмчи быһыылаах. Кроссворд таайарын, анекдоттары ааҕарын, КВН-нары көрөрүн сөбүлүүр үһү.
Афанасий Стручков - Мэҥэ-Хаҥалас Бүтэйдээҕин уола. Бэйэтэ этэринэн, 10кылааска археологическай лааҕырга СГУ студеннарын кытта сылдьан, гитараҕа аккорд баттыырга үөрэммит. Онтон ыла ыллыыр буолбут. 1998 С. Университекка төрүт культура салаатыгар күнүскү үөрэххэ киирбит.

Чуолаан төрүт культураны бары өртүнэн сайдарга табыгастаах диэн. Бастакы курска үөрэнэ сырыттаҕына, республикатааҕы эстрада театрынайар мастарыскыайыгар сүүмэрдээһин буолбут. Онно туттарсан, тоҕус буолан ылыллыбыттар. Инньэ гынан, иккис сылыгар кэтэхтэн салааҕа көһөр. Дьылҕата кинини Юрий Платоновы кытта итинник булларбыт. Үлэтин, үөрэҕин сүрдээҕин сөбүлүүр. Бэйэтэ ырыаҕахоһоон суруйарга, мелодия айарга холонор. 10-Тан тахса ырыалаах. Үксүгэр Семен Капитонов хоһоонноругар суруйар. Сахалыы уус-уран литератураны ааҕарын, сканворд таайарын уонна гитараҕа оонньуурун сөбүлүүр.
Уолаттар үөрэхтэрин атын культура идэтин кыһаларыттан уратыта диэн, хас биирдиилэрин кытта анаан, туох да хааччаҕа суох, төһө наадатынан дьарыктаналлар. Учууталлара Юрий Егорович үөрэҕин сүрүнэ - ыллыыр куолас сайдыыта диэн. Айылҕа биэрбиткуолаһын сайыннаран, идэтийбит вокалист таһымыгар таһаарар сыаллаах. Кини үөрэнээччилэрин баҕаларын хаһан даҕаны күөмчүлээбэт. “Киһи күүһэ муҥура суох” диэн санаалаах. Онон оҕолорго, этэргэ дылы, бары кыах, көҥүл бэриллэр. Мастарыскыайга итини таһынан үөрэтэллэр: музыкальнай салайааччы Владимир Якимец, леди-саксофон Ольга Алексеева, концертмейстер Жанна Филиппова.
Онтон үлэлэригэр киирдэххэ, олус табыллан дуэтынан ыллыыллар. Куоластара да барсар. Иккиэн гитараҕа оонньууллар, фонограммаларын бэйэлэрэ оҥостоллор. Репертуардарыгар нуучча эстрадатыттан, Афоня ырыалара, Сергей бииргэ үөрэммит доҕоро Н. Константинов ырыалара бааллар. Биһигини кытта сылдьан “Иванушки-Интернэшнл” бөлөх хит буолбут “Тополиный пух” диэн ырыатын сахалыы тылбаастаан ыллаабыттара бэрт сонун этэ.
Инники өртүгэр былааннара - дуэтынан бөлөх тэринии. Ону таһынан, биирдиилээн эмиэ программа туруоран, эһиил гастролга барыахтара. Учууталлара маны сайыннаран, инники өртүгэр вокальнай-инструментальнай дуэт таһаарар баҕа санаалаах. Онуоха кыах баар диэн кини этэр.
Сергей уонна Афоня: “Дуэппытыгар билиҥҥитэ аат булуна иликпит. Онон, хата, түгэнинэн туһанан, “Эдэр саас” ааҕааччыларыттан көрдөһүөхпүт этэ, биһиэхэ аат толкуйдааһыныгар көмөлөһүҥ диэн”. Уонна уолаттар кинилэри өрүү өйүүр, өйдүүр, аҕаларынтэҥэ саныыр киһилэригэр Юрий Платоновка махтал тылларын этэллэр. Кини үөрэппитсуолунан айар үлэлэрин саҕалыыр санаалаахтар.

PS. Онон, дьэ, күндү ааҕааччыларбыт, уолаттарга аатта толкуйдуурга көмөлөһүҥ. Бэйэҕит баҕаҕытын биһиги редакциябытыгар “Саҥа дуэтка аат” конкурска диэн бэлиэтээн ыытыҥ. Ону хайаан да кинилэргэ тиксэриэхпит.
Кэлэр нүөмэргэ кинилэр үөрэнэр айар мастарыскыайдарын туһунан ааҕыаххыт.
Светлана Аммосова.
2000 сыл