сайылык Мин алтыс кылааска үөрэнэ сырыттахпына буолбут түбэлтэни кэпсээри гынабын. 1960 - С сыллар ортолоро. Лидалаах Лиза игирэ кыргыттар. Күн бэҕэһээ оскуоланы бүтэрэннэр, улахан дьон аатын ылан, үөрүү - көтүү бөҕө буола сылдьаллар. Кыргыттар дьүһүннэринэн үүт - үкчүлэр, уҥуохтарынан да тэҥнэр, ол эрээри майгыларынан маарыннаспаттар. Лида - сытыы - хотуу, элбэх саҥалаах, ырыаһыт, үҥкүүһүт кыысчаан. Кини уон биэс мүнүүтэннэн балыс балтын дьаһайара да, бүөбэйдиирэ да үгүс. Оттон балта Лиза киниэхэ холоотоххо, мөдөөн, күнү супту тугу эрэ толкуйдуу сылдьар курдук, аҕыйах саҥалаах. Кинигэни тута сылдьан ааҕар. Ол онтон эбитэ дуу, ачыкы кэтэр буолан, онон эрэ сорохтор Лидатын араараллар. Аҕалара Ылдьаа, ыһыы үлэтигэр сылдьан, тыраахтарга дэҥнэнэн хаалан куораттатар буолбуттарыгар ыанньыксыт ийэлэрэ Мотуруона барсарга тиийбитэ. Онон кыргыттар ийэлэрин солбуйан хаалбыттара. Кинилэр, кыра эрдэхтэриттэн ийэлэригэр көмөлөһөн иилиҥкэйдэспит буоланнар, сүөһүгэ сыстаҕастар. Тыа сиригэр пиэрмэ үлэтиттэн атын үлэ дэбигис көстүбэт. Лида биирдэ остолобуойга үлэһит көрдүүллэр үһү диэни истэн, өрүкүнэйэн кэлэн ийэтигэр эппитэ. Диза дьонун кэпсэтиилэрин истэн туран: - Ийээ, мин эйиэхэ көмөлөһүөм этэ, ньирэй көрүүтүгэр ылаллар ини, - диэбитэ. Лида остолобуойга саҥа үлэлээн эрдэҕинэ, хата, кини дьолугар, , ырааҕынан эдьиийэ куоракка баран үөрэнэн кэлэн сыах аһыллыбыта. Кини Лиданы көмөлөһөөччүннэн ылбыта. Онон Лида үөрүү бөҕө буола сылдьар. Кинилэр астыыр сонун астара былдьаһыгынан барар. Сэбиэдиссэйдэрэ Өлөксөй Сөдүөтэбис Клавалаах Лида үлэлэриттэн астынар аҕай. Наар киирэн, Клаваны кытта хаадьылаһар, оонньоһор. Сахаҕа туналыйар маҥан толору эттээх - сииннээх, киэҥ арылхай харахтаах дьахтарга эр киһи хараҕа хатанара баа буолуо дуо? Клава сымнаҕас майгылааҕар эбии көрө - күлүүтэ сыттаҕа - үлэ чааһа бүппүтүн билбэккэ да хаалаҕын. Саас буолан, күн уһаан, бары - барыта сэргэхсийэр үтүө күннэрэ үүммүттэрэ. Биир сарсыарда Клава сонуннаах кэлбитэ: - Дьэ, кыргыттаар, саҥа хотон тутуутугар хантан эрэ соҕурууттан уол бөҕө кэлбит. Аскытын - үөлгүтүн, кытаатан, минньигэстик астаан, бу туох ааттаах кирдээх иһиттэрин кэккэлэттигит? - Диэн сиртэн көстөрүүлэлэри ылаттаата, үрүт - үөһэ уурталаан халыгыратта. Ити сонуну эдэр кыргыттар сэргии истибиттэрэ. Өр - өтөр буолбатаҕа, уолаттар кус - хаас тойугун түһэрэн көтүөккэлэһэн киирбиттэрэ. Биһиги кыргыттарбыт уолаттары көрөөт, муннукка - ханныкка түһүтэлээн хаалбыттарын кырдьаҕас үлэһит дьахталлар дьөлө үөгүлээн ылбыттара. Дьэ, ити күнтэн ыла Лида олоҕо тосту уларыйбыта. Кыргыттар эдэр дьону кытта билсиһэн, ааттарынан ыҥырсар буолбуттара, үлэлэригэр ыга киэргэнэн кэлэллэрэ. Уолаттар, нууччалыы мөлтөхтүк саҥарар да буоллаллар, соруктарын толору этинэллэр. Барыларыттан сытыы - хотуу, эйэҕэс күлэ сылдьар курдук харахтаах уоллара Ринат нууччалыы балачча үчүгэйдик саҥарар, бадаҕа, биригэдьиир көмөлөһөөччүтэ үһү. Уол уоһун үрдүнэн тор курдук бытыктаах. Кыргыттар кинини Усик диэн ааттыы охсубуттара. Уолаттар остолобуойга үгүстүк сыбыытыыллар. Усиктара кыргыттартан ордук Лиданы чорботон кэпсэтэр - ипсэтэр оонньоһор буолбута. Биирдэ субуота күн Лиданы ыҥыран: - -Лида, бу киэһэ үҥкүүгэ кэлээр эрэ, күүтүөҕүм, - диэбитэ. Бу уолу кыыс көрөөт да сөбүлээбитэ. Улаханнык долгуйа - долгуйа, кулуупка кэлбитэ, ол киэһэ Ринаттыын арахсыбакка үҥкүүлээбиттэрэ. Онтон биир үҥкүү киэһэтин кэнниттэн тапталлаахтар күн тахсыар диэри күөл кытыытынан күүлэйдээбиттэрэ. Уол дойдутугар ыарыһах ийэлээҕин, балтылааҕын туһунан кэпсээбитэ. Кини кыра сырыттаҕына аҕата ыалдьан өлбүт үһү. Дойдутугар онуһу бүтэрэн баран, дьонун иитээри, ол - бу кыра тутууга үлэлии сылдьыбыт. Дойдутугар үлэ суох буолан, аймах уолаттарынаан сүбэлэһэн, биригээдэ тэринэн, " харчы өлөрө" диэн ааттаан, Саха сиригэр кэлбиттэр. Эбиитин Ринат: - Бу бөһүөлэккэ үлэ көстүбүтүгэр дьылҕабар махтанабын, онтон атын эйигин көрсүөм суох этэ, - диир. Лида сарсыарданнан хоһугар сыбдыйан киирбитэ, Лизата уһуктан, кинигэ ааҕа сытар эбит. Баччааҥҥа диэри кыргыттар бары сэкириэттэрин барытын аһаҕастык кэпсэтэллэрэ. Бу да сырыыга Лиза эдьиийэ тэтэрбит, өрүкүнэйбит сирэйин - хараҕын көрөн: - Ханна сырыттыҥ? Кими кытта? - Диэн ыйыталаспыта. - Кэлин, кэлин, Лиза, утуйуохха, - диэн эдьиийэ сып - сап оронугар дьылыс гыммыта. Сарсыныгар Лида утуйаары сытан Лизаҕа: - Хотон тута кэлбит уолаттартан биир уолу таптаан кэбистим быһыылаах, табаарыстаһабыт, - диэбитэ. Лиза саҥата суох сыппахтаан баран оргууй аҕай: - Лида, омук буола - буола. Чэпчэки кыыс аатын ылаары гынныҥ дуо? Уонна ол киһи күүлэйдээн баран быраҕан

кэбиспэт дуо? - Диэбитин кулгааҕа эрэ истэн хаалла. Кини итинник саҥарбыта эрээри, сүрэҕэ атыны этэн тиҥиргиирэ: " мин - мин… Бэйэм - бэйэм… Эмиэ - эмиэ… "
Лиза, ньирэйдэрин оҕо курдук бүөбэйдээн, күн иллэҥэ суох. Үлэтин олус сөбүлээтэ. Ньирэйдэригэр эҥин араас ааттары биэртэлээбит. Индийскэй киинэ ааттара да иһиллэллэр. Ол быыһыгар: " Ринат… " - Диэн сибигинэйэн эрэ ымманыйар кип - киэҥ чоҕулуччу көрбүт харахтаах ньирэйдээх. Бу саас омук уолаттара үлэлии кэлиэхтэриттэн ыла уларыйан хаалбытын бэйэтэ да билинэ сылдьар. Кини үлэлиир хотонуттан чугас сабыс - саҥа хотон тутуллан дьэндэйэн эрэр. Бу улахан, киэҥ хотону Лиза, кэлэ - бара олус астына көрөр. Хотон тутааччылар ортолоругар биир киэҥ хара харахтаах, куудара баттахтаах бытыктаах сытыы уол Лизаны ааһан истэҕинэ мэлдьи хаадьылаан тыл быраҕара. Ол курдук устунан биир эмэ күн уолу көрбөтөҕүнэ суохтуур буолан испитэ. Биирдэ ол уол Лиза эдьиийиниин Лидалыын кулуупка тиийбиттэригэр хараҕын быһыта симмэхтээбитэ: - Хайдах хайдаҕый? Хараҕым иирэр дуу… Наһаа да майгыннаһаҕыт, игирэлэр буоллаххыт дии! Бу дэриэбинэҕэ саамай кыраһыабай кыргыттар эһиги эбиккит. Мин Лиданы билэбин ээ. Эн биһикки эмиэ билсиһэн кэбиһиэх, аатым Ринат диэн, - диэмэхтээбитэ. Ол киэһэ Ринат күүстээх илиитэ кинини үҥкүүгэ эргичиппитэ. Лиза Ринаты эрэ санаа ымыыта оҥостор буолбута. Кини ытыы - ытыы көрөр индийскэй киинэтин геройа сиргэ илэ түспүтүн курдуга. Күн - дьыл ааһан истэҕин аайы " хотон тутуллан бүтэн эрэр, Ринат дойдутугар барара чугаһаата… " Дии санаатаҕына сүрэхтиин - быардыын туоххаһыйа, ыгылыйа түһэр. Лиза үлэтигэр үтүрүйтэрэн, чугас дьүөгэтэ Катяны кытта быыс булан сэлэһэ да иликтэр. Биир киэһэ дьүөгэтэ, хата, бэйэтэ күүлэйдии кэлбитэ. Кинилэр чэйдии - чэйдии кэпсэтэ олорбуттара. Эдэр кыргыттар аан - бастаан саҥа сонун уолаттар тустарынан кэпсэтэллэрэ чуолкай буоллаҕа ээ. Бэйэлэрин уолаттарыттан хал да буолан бардахтара. Чэйин ортолуу иһэ олорон, Катя, тугу эрэ сэрэйэр курдук дьүөгэтин утары көрөн олорон: - Лиза, эдьиийиҥ Лида ити омук уолаттарыттан Ринат диэн ааттаах уолу кытта табаарыстаһан түүнү быһа күүлэйдииллэрин билэҕин дуо? - Диэбититтэн Лиза, соһуйан чааскылаах чэйин дьалкыһытан ылбыта. Дьүөгэтин сирэйэ - хараҕа уларыйан хаалбытын көрөн, Катя барытын өйдөөбүтэ. Кэпсэтии соччо тахсыа суоҕун сэрэйэн, Катя ханна эрэ сылдьардаах аатыран тахсан барбыта. Ити күнтэн ыла Лизаны туох да сэргэхсиппэт буолбута. Аат эрэ харата ньирэйдэрин көрөр, үҥкүүгэ, киинэҕэ сылдьыбат. Бэйэтэ - бэйэтигэр бүгэн хаҕа эрэ сылдьар курдук. Лидалыын кэпсэтэллэрэ да аҕыйаабыта. Эдьиийэ биирдэ омугун уолун туһунан кэпсээри гыммытыгар ситэ истбэккэ тахсан барбыта. Балта туох эрэ санааҕа ылларбытын сэрэйэн Лида, биирдэ оҥостон олорон ыйыппыта: - Лиза, эн миигин кытта кэпсэппэт буоллуҥ. Тоҕо бэйэҕэр бүгэн хааллыҥ? Туох эмит кыһалҕалаах буоллаххына миэхэ кэпсээриий. Урут биһиги икки ардыбытыгар кистэл суох буолааччы дии. Эбэтэр ыалдьаҕын дуу? - Диэн эдьиийэ сэрэнэн токоолоспута. - Ээ, суох, суох, бэйэм. Ыалдьыбаппын, доруобайбын, - диэн кылгастык эппиэттээбитэ балта. Ит итинэн ааспыта. Лидалаах Ринат киэһэ аайы кэриэтэ көрсүһэллэр. Күһүөрү сайын хотон тутуллан бүппүтэ, уолаттар дойдуларыгар сус гынан хаалбыттара. Үлэлэрин туттара, харчыларын аахса диэн Ринат эрэ хаалбыта. Арай биир күн Лида Ринаты дьиэтигэр аҕалбыта. Лиза кинилэри көрөөт, үлэтигэр ыстаммыта. Лида Ринаты ийэтигэр билсиһиннэрбитэ, холбоһоллорун туһунан эппитэ. Ийэтэ, хайыа баарай, омук күтүөттэнэн эрэрин сөбүлээбэтэр да, туох баарынан остуол тардан чэйдэппитэ. Лиза дьиэтиттэн тахсан, пиэрмэтин суолуттан туораан, күөл кытыытыгар бэйэтэ эрэ билэр, тапталлаах хатыҥчааныгар тиийбитэ. Кыыс сүрэҕин кистэлин, Ринаты таптыырын туһунан аан бастаан киниэхэ эрэ билиммитэ. Бу да сырыыга саһарбыт сэбирдэҕин таммалатан хатыҥчаана тэҥҥэ ытаспыта… Сотору Ринат тутууларын харчыларын аахсан, үлэһиттэригэр ыыппыта. Таарыйа ийэтигэр ботуччу харчыны ыытан астыммыта. Лидалаах Ринат саҥа тэриллибит сопхуос отделенетын хонтуоратын аҥаарыгар, хос ылан, ыал буолан олорбуттара. Лида остолобуойугар үлэлиирэ. , Ринат кыһын ол - бу бытархай үлэлэргэ сылдьыбытын кэннэ " Беларусь" тыраахтары туттарбыттара. Кыайыгас, улгум үлэһит буолан хайҕалтан түспэт буолбута. Лиза Ринаты таптыыра ааһыахтааҕар, кинини санаабатах күнэ суох буолан эрэйдэммитэ ахан. Биир сарсыарда үлэтигэр тиийбитэ, таптыыр ньирэйэ иһинэн ыалдьан, эрэйинэн тыынан бөтүөхтүү сытара. Сатахха, оройуон киинигэр киирбит бэтэринээри аҕалаары техника көстүбэккэ Лиза ыксыы сылдьыбыта. Киэһэлик санаата түһэ сырыттаҕына Ринат көрсүбүтэ. Кини оройуон киинигэр киирэ сылдьардааҕын эппитэ. - Массыына уларыстым, таарыйа эйигин пиэримэҕэр илдьэн биэриим, мин бэтэринээри булан илдьэ кэлиэм, - диэбитэ. Ринат кини кыһалҕатын кыһалҕа оҥостубута кыыһы долгуппута. Суол ортотугар дылы саҥата суох айаннаабыттара. Эмискэ Ринат массыынатын тохтоппута уонна, Лиза диэки хайыһан, чочумча олорбохтоон баран: - Лиза, арай былырыын мин эйигин талан доҕордоспут буолуум. Эн хайыаҥ этэй? - Диэн ыйыппыта, - Сэмэйгин, килбиккин олус сөбүлүү көрөр этим ээ. Лида ордук сытыы, быһаарыылаах буолан, кинилиин чугасаһан хаалбыппыт. Эн, саатар, хотоҥҥуттан атыны кэрэхсээбэт да курдук этиҥ… Лиза сирэйэ итий гынан ылбыта, кини бу эмискэччи билинииттэн соһуйуон да үөрүөн да билбэккэ: - Суох, суох туох буоллуҥ, мин эйигин эрэ санаабаппын! Түргэнник бара охсуохха! - Диэн дьаһайар кэриэтэ тиэтэппитэ. Ити итинэн ааспыта. От үлэтэ саҕаламмыта. Лиза дьоно кэтэх сүөһүлэригэр Чабычах алааһыгар оттууллар. Быйыл аҕалара Ылдьаа күтүөтэ Ринаты кытары оттуу сылдьан, эчэйбит атаҕа бэргээн, төннөн тахсыбыта. Ол кэмҥэ Лида балыыһаҕа харыстаныыга сытара. Онон быйыл оттуур да киһилэрэ күтүөттэрэ эрэ буолбута. Аны киниэхэ, үс - түөрт хоно - хоно аһылык илдьиллиэхтээҕэ. Улахан суолунан таһаҕас таһар массыынаҕа олорсуллуохтааҕа, онтон аара түһэн баран, чаас кэриҥэ куһаҕан суолунан сатыылыыллара. Биир үтүө күн били күтүөттэрэ өйүөтэ бүппүт буолуохтаах диэн, киһини хоргутан өлөрүөхтэрэ дуо, ас илдьэн биэрэ, Лиза барар буолла. Ньирэйдэри киэһэ ийэтэ аһатыахтаах. Лиза Ринаты көрбөтөҕө ыйтан орто. " Өйүөбүн туттардым да сатыы да буоллун, кэлэ туруом" дии санаабыта. Аарааҥҥа диэри массыынаҕа олорсон, чаас курдук хааман, оттуур ходуһаны булла. Күүстээх үлэ барбыта биллэр, балачча элбэх бугул кэчигирээбит. Кыыс Ринаты хайгыы санаабытыттан иһиллээбит курдук уу чуумпуга сүрэҕин тэбиитэ күүһүрэн, мэктиэтигэр кулгааҕа куугунаан ылла. Бөлөх талахтар диэки балаакка туртайан көстөр. Лиза чэпчэки - чэпчэкитик үктэнэн тиийэн, балаакканы өҥөс гынна. Ринат таҥнары ууруллубут мас таараҕа олорон, куруускатыттан уу иһэ олорор. Иннигэр туох да ас баара көстүбэт. Лиза хайдах эрэ, уолу аһыныах санаата кэллэ. Ринат киһи атаҕын тыаһын истибэтэх буолан, Лизаны көрөн, соһуйан, уутугар чачайа сыста. Онтон өй ылан, аны куотан хаалыа диэбиттии, халбарыс гынан, Лизаны киллэрээт, балаакка айаҕын бүөлүү турунан кэбистэ. Үөрбүтэ сүрдээх. Лиза, өйүөнү туттараат да, таһырдьаны былдьаһан эрдэҕинэ, эр киһи күүстээх илиитинэн күөйэ кууһан ылан, бэйэтигэр сыһыары тардыбыта уонна ахтыбыттыы уоһуттан уураан барбыта. Уураһыы имэҥин билэ илик кыыс туймааран хаалбыта. Ринат кыыһы сэрэнэн көтөҕөн ылан сытыаран эрэрэ… Биирдэ өйдөөбүттэрэ барыта бүппүт этэ… Ити түбэлтэ кэнниттэн икки ый ааһа охсубута. Лиза биир сарсыарда сүрэҕэ өлөхсүйэн өҕүйэн ылбыта. " Оо, ол иһин даҕаны, ыарахан буолбуппун… Бу сааты - сууту, саатар күтүөппүттэн буола - буола, айыбыын! .. - Дии санаан тымныы көлөһүн аллыбыта. Баҕар букатын да оннук буолбатаҕа буолуо диэн эмиэ да бэйэтин уоскутуна сатыыр. Ол гынан баран, киинэлэргэ көрдөҕүнэ, дьахталлар хат буоллулар да өҕүйэллэрэ көстөрө. Көрдөрөллөрө сымыйа буолбатаҕын төрдүс ыйыгар чуо билбитэ. Лиза түүнүн, сыттыгар саба түһэн, хараҕын уутунан суунара. Ринаты көрүстэҕинэ куота - көтө сылдьар буолбута. Кыыс барахсан дьон хараҕыттан төһө өр кистэнэ сылдьыа буоллаҕай, бэһис ыйыгар иһэ төгүрүйэн биллэн барбыта. Иһин кистии сатаан, сотторунан ыга курдана сатыыра. Биирдэ Лида ону алҕаска көрөн. - Тоҕо сотторунан искин баанаҕын? - Диэбитэ. - Ээ, бүөрүм ыалдьар, ону баанабын, - диэн хоруйдаабыта. Лида балта аанньа аһаабат уонна сүгүн кэпсэппэт буолбутун, наар санаа түһүүлээх сылдьарын көрбөт бэйэлээх буолуо дуо? Ол иһин ийэтигэр: - Кыыскын кытта кэпсэт эрэ, миигинниин сүгүн кэпсэппэт, - диэбитэ. Ийэлэрэ кыыһын кытта кэпсэтэрдии оҥостубута. Сарсыарда ким да суоҕар Лизаны уһугуннарбыта. Аһылыгын, сүөгэйдээх лэппиэскэни, кыыһын иннигэр ууран баран, бэйэтэ утары олоппос ылан олорунан кэбиспитэ. Өр соҕус кыыһын сирэйин - хараҕын тонолуппакка көрөн олорон баран, ыйытыахтааҕын ыйыппыта: - Хайа, дьэ, Лиза, барытын миэхэ кэпсээ. Тугу да кистээмэ. Мин ийэҥ олоробун. Ити Катя кыыс тугу - тугу кэпсиирин ситэри өйдөөбөтөҕүм. Күтүөккүттэн ыарахан буолан багдаллан олороҕун дуо? Кэпсээ, диибин дии кырдьыгынан! - Диэн кыыһын өйүн - төйүн булларбакка ыган - түүрэн барбыта. Кэмниэ кэнэҕэс кыыс эрэйдээх билинэригэр эрэ тиийбитэ. Кыыһа билинээтин кытары ийэтэ ситэ истибэккэ даҕаны сарылыы түһээт, ойон туран кыыһын хаста да сирэйгэ биэртэлээбитэ. - Дьэ, кырдьар сааспытыгар дьон хараҕын таба көрбөт оҥордоҕуҥ, сэлээрчэх кыыстанан ааппыт - суолбут алдьаннаҕа. Күүлэйдээн да аһыы сырыт, киэр буол, аны икки харахпар төрүт көстүмэ! - Диэн элбэх - элбэҕи саҥаран, кыыһы ийэтэ муустаах ураҕаһынан дьиэтиттэн үүрэн таһаарбата. Лиза муҥнаах ийэтиттэн үүрүллэн баран, биирдэ өйдөөбүтэ, били хатыҥчаанын диэки баран эрэрэ. Халыҥ хаары кэһэн, мочоохтоон, дэлби сэниэтэ эстэн, хатыҥыгар тиийэн өйөммүтэ. Кыыс оҕо буолан, тапталы билэн, бу үлүгэрдээх саакка - суукка, эрэйгэ тэбилиннэҕэ… Ити кэннэ олох олорон да диэн. .. Оо, тымныытыан! Ийэтэ үүрдэ дии… Ыччакабын даа… Тоҥноҕуон… Хантан сылаас сири булар? .. Хайдах дьон сирэйин утары көрөр? Саат - Суут… Эмискэ итии салгын илгийдэ. Силигилээн турар айылҕа суугуна билиннэ. Отуу уотугар оллооҥҥо күөс бидилийэр, минньигэс сыта дыргыйар. Ринат кинини чэпчэкитик көтөҕөн ылан эргичитэр. Кыыс лыҥкыначчы күлэр. Дьолоохтор даҕаныы - ы - ы… Кыыс сүппүтэ хас да хоммутун кэннэ, сылгыһыт киһи түбэһэ көрөн, дьоҥҥо тыллаабыт этэ. Кыыһы оннук булан көмпүттэрэ. Хаарыаннаах эдэр олох уонна төрүү илик оҕо дьылҕалара итинник хомолтолоохтук түмүктэммиттэрэ. Ити кэнниттэн Ринаты дойдутугар үүрбүттэрэ. Лида уол оҕолонон баран ыалга биэрбит, бэйэтэ куоракка куоппут. Олоҕо алдьаммытыттан сылтанан буолаахтыа, кэлин иһээччи буолбут сураҕа иһиллэрэ. Икки кэрэ, эдэркээн кыыс, дьэ итинник дьылҕаламмыттар. Ийэлэрэ кэмсинэн да төһөнү кэмсинээхтиэй, аны кэлэн тугу да көннөрбөт. Оччолорго аҥаардас сылдьан хат буолуу, саакка - суукка турара. Эбиитин күтүөтүттэн. Ол эрээри аны кэлэн, чопчу буруйдааҕы бу диэн кими да, тугу да булан эппэккин. Ииндийэ киинэтиттэн үлүһүйбүт, чараас эйгэлээх, кэнэн эдэркээн кыыһы дуу, оччотооҕу кэм кытаанах сиэрин - майгытын дуу, эбэтэр быһымахха муус сүрэхтэммит ийэ эрэйдээҕи дуу? .. " ЧИЭСКИН ЭДЭРГИТТЭН ХАРЫСТАА" - диэн мээнэҕэ эппэтэхтэр.

#Владилен#. 🌾🌾🌾🌾🌾🌾🌾