Дэриэбинэ кытыытыгар киһи уҥуоҕа баара. Оҕолор ону олус дьулайа көрөллөрө. Биирдэ Доралаах киэһэлик оттоон кэлэн иһэн матасыыкыллара алдьанан, сатыылаан испиттэр. Киһи уҥуоҕун таһыгар чугаһаан иһэн көрбүттэрэ, харахха биллэр-биллибэт күлүктэр тураллара. Өссө эбиитин тугу эрэ кэпсэтэр, күлэр-үөрэр курдуктара. Хайдах эрэ бүтэҥи куолаһынан: «Сотору кэминэн кэлиэхтээх, бэлэмнэниэххэйиҥ», — дииллэрин чуолкайдык иһиттэ. Убайыгар Ньукууска имнэнэн киһи уҥуохтарын диэки көрдөрө сатаабыта. Оргууй кулгааҕар сибигинэйэн: «Дьон турарын көрөҕүн дуо?» — диэн ыйыппыта. Онуоха Ньукуус: «Суох, тугу да көрбөппүн», — диэбитигэр кыыс кутталыттан иннин хоту сүүрбүтэ. Убайа кэнниттэн ситэн кэлэн, хайдах буоллуҥ диэн ыйыта сатаабыта. Куттаммыт кыыс сүүрэр-хаамар былаастаах барарын кубулуппатаҕа. Арай ол баран иһэн кэннин хайыһан көрбүтэ, ынырык дьүһүннээх икки хара күлүк кинилэр кэннилэриттэн батыһан иһэрэ. Онуоха кыыс хайдах да буолуон билбэтэҕэ. Суол таһыгар олорор ыал дьиэтигэр сүүрэн киирбитэ. Били күлүктэр сонно күлүкүчүйэн кэлэн, ол ыалга кытары киирсибиттэр уонна тугу да сэрэйбэккэ маайкалаах эрэ олорор кырдьаҕас оҕонньор иһигэр сылбыс гынан хаалбыттар. Кыыс ону көрөн өлөрдүү уолуйбут. Маныаха ыал ийэтэ уонна убайдара кыыс туохтан куттаммытын үрүт үөһэ ыйыт да ыйыт буолбуттар. Дора туох диэн кэпсиэн билбэтэҕэ: уолуйа куттаммыт кыыс тугу көрбүтүн кэпсиэн баҕарара да, иһиттэн саҥата кыайан тахсыбат гына хайдах эрэ бобуллан хаалбыт курдуга… Ол түүн ити ыал эһэлэрэ оҕонньор сырдык тыына соһуччу быстыбыта. Бу түгэн Дора өйүгэр-санаатыгар хаһан да умнуллубат гына хатаммыта. “Ама, дьон дууһата итинник баар буолара буолуо дуо?” — диэн, мэлдьи толкуйдуура. Арай ол ыалга киирбэтэҕэ буоллар, эһэлэрэ эмискэ өлүө этэ дуо эбэтэр дьылҕа, ыйаах кэм-кэрдии кэлэрэ диэн баарын кини түбэһэ көрбүтэ эбитэ дуу…