Үөрэх министерствотын иһинэн республикатааҕы оҕо олимпийскай эрэллэрин оскуолатын тэрийиитинэн чэпчэки атлетикаҕа “Гран-При” буолан ааста. Манна түһүмэхтэргэ кыайбыт 75 оҕо кытынна. Олор истэригэр улахан түһүлгэлэр кыайыылаахтара Т. Нахова (Горнай), С. Громов (Чурапчы), А. Попов (Чурапчы), Ф. Жирков (Дьокуускай) бааллара күрэхтэһии сытыытык ааһарын туоһулуура.
Уопсайа үс түһүмэхтээх күрэхтэһиигэ кыргыттарга кубок хаһаайынынан Таня Нахова буолла. Онтон уолаттарга — Слава Громов. Таня 11+11+11+6=39 очколаах. Кыһын сабыылаах сиргэ, зональнай күрэхтэһиигэ, “Старт” спартакиадаҕа кыайталаан, 11-дии очкону сурунна. Онтон эбии 6-та 3.000 М Россия түһүлгэтигэр бу саас Саха сирин рекордун тупсарбытыгар эбиллэр. Бу күрэхтэһиигэ Таня 1500 м 4м.59,3С. Кэлэн эмиэ бастаата.
Слава көрдөрүүтэ 11+11+11+6+6=45+22=67. Бу уол күрэхтэһии аайы Саха сирин рекордун сүүрүүгэ араас уһуннарга тупсаран очкота элбээн, “Гран-При” кубогын эрэллээхтик ылла.

Иннокентий АММОСОВ.
Хаартыскаҕа: “Старт” спартакиадаҕа Слава Громов күрэхтэһии уотун уматар.
Александр Назаров
түһэриитэ.
Тирии бэрчээккэ сонуннара

Сотору Бакуга боксаҕа эдэрдэргэ Европа чемпионатыгар кыттар быраабы былдьаһа, Саратов куоракка Саха сириттэн олимпийскай эрэл училищетын үөрэнээччитэ Василий Сыроватскай барар буолла. Кинини тренерэ Л. С. Соломонов арыаллыаҕа. Васябыт кыайарыгар, Бакуга өрөгөй үктэлин билэн кэлэригэр эрэнэбит.

Аны Америкаҕа улахан дьоҥҥо Аан дойду чемпионатыгар Россия чиэһин көмүскүү 51 киилэҕэ Георгий Балакшин барара сабаҕаланар. Ыҥырыы суругу Россия олимпийскай хамаандатын начальнигыттан Л. Е. Цидловскайтан тутан, Георгий Кисловодскайга сүүмэрдиир эрчиллиигэ көттө. Тренерэ, Артур Пахомов, сүүмэр иккис түһүмэҕэр Подольскайга бараары сылдьар.

“Эдэр саас” корр.
“Олоҥхо оонньууларын” дуораана
Спортсменнар санаалара
Кыайыылаах СГУ хамаандатын биир бастыҥ быһыйа Василий Ильин буолар. Бэйэтэ Хаҥаластан төрүттээх. Педагогическай институт 3 курсун студена.
—Мин 5км уонна 10км үһүс миэстэ буоллум. Үс иһигэр киирбит киһи диэн баҕабын толорон, кырдьык үһүс буоллум. Уонна биһиги, университеттар, хамаандабыт бастакы миэстэни ылбытыттан улаханнык үөрдүм. Биһиэхэ бу кыайыы соһуччу. Тоҕо диэтэххэ, Ньурбаҕа ыытыллыбыт “Олоҥхо оонньууларыгар” тохсус миэстэ буолбуппут. Оттон быйыл — бастакы.
Сэттис сылбын сүүрүүнэн дьарыктанабын. Оскуолаҕа үөрэнэ сылдьан күрэхтэһиилэри көтүппэт этим. Бириистээх миэстэлэргэ тиксэрим.
Оскуолаҕа үөрэнэр сылларбар Михаил Архипов тренердээбитэ. Кэлин Гаврил Нохтунскайга эрчиллибитим. Оттон билигин Артур Феофановка

дьарыктанабын.
Сүүрүү спорт аҕата. Спорт көрүҥнэрэ барыта итинтэн саҕаланар диэн этиэхпин баҕарабын. Республикабытыгар сүүрүүгэ өссө элбэх күрэхтэһии ыытыллара буоллар дьон интэриэһин тардыа этибит. Биһиэхэ бу көрүҥ күүскэ сайда илик, ол да иһин буолуо, Саха сиригэр сүүрүүгэ аҕыйах спорт маастара баар.
Сүүрүүнэн дьарыктаныҥ. Сүүрүү эһиэхэ чөл олоҕу, кытаанах доруобуйаны 100 бырыһыан түстүө.
Сүүрүүнү хаһыатынан сырдатыахха
Альберт Софронов (Бүлүү) — республикаҕа биллэр сүүрүүк. Кини “Олоҥхо оонньууларыгар” 5.000 М сүүрэн иккис миэстэни ылла. Бириэмэтэ 15,25,1.
— Сүүрүүнэн киһи көтүппэккэ дьарыктаныан наада. Оччоҕо ордук туһалаах. Хайаатар да спортсмен буолуом диэбэккэ, доруобуйаны тупсарар да туһугар сүүрүөхтэрин сөп. Оттон мин тус бэйэм 1994 с. Спорт быһыытынан дьарыктанабын.
Бу сылга республика чемпионатыгар 10 км — үһүс, 5 км — бастакы миэстэлэри ылаттаабытым. Оттон бу сырыыга 10 км — иккис, 5 км эмиэ — иккис буоллум. Результаттарбын тупсаран иһэбин.
Көрөөччүлэр мас тардыһыыны көрөллөрүн курдук сүүрүүнү улаханнык сэҥээрэн көрбөттөр. Тоҕо диэтэххэ, сүүрүү хаһан да улаханнык сырдатыллыбат. Дьиҥэр ааҕааччыга доруобуйаҕа туһалааҕын өйдөтүөххэ наада. Онуоха атын күрэхтэһиилэргэ оонньонор бирииһэ да улахана дьон болҕомтотун ордук тардар. Холобура бу сырыыга ветераннарга 5.000 М сүүрүүнү сэҥээрдилэр, уһугуннулар. Тоҕо диэтэххэ онно аан бастаан массыына оонньонно.
Уопсайынан киһи биир сүүрүүгэ кыайар, иккис сырыыга кыайтарар. Ол дьарыктан, сөптөөх усулуобуйаттан, аһылыктан эмиэ улахан тутулуктаах. Онон спорт бу көрүҥэр улахан болҕомто ууруллара буоллар диэн баҕалаахпын. Итиэннэ түмүкпэр улууспут спорка управлениетын кылаабынай специалиһыгар Н. Куличкинаҕа улахан махталбытын тиэрдэбит. Кини биһигини, спортсменнары, куруук өйүүр. Ол да иһин биһиги спорка интэриэспит улаатан иһэр.

Үчүгэй көрдөрүү элбэҕи ирдиир
Александр Бугаев былырыын ДьПУ-1 физкультурнай салаатын бүтэрбит. Ол кэнниттэн СГУ пединститутугар үөрэҕин салгыыр. Сүүрүүнэн 1995 сыллаахтан дьарыктанар. Александр “Олоҥхо оонньууларыгар” бастакы “сүрэхтэниитин” ааста.
— 37 Киһилээх СГУ хамаандатын гимназияҕа түһэрбиттэрэ. Атын хамаандалары Таатталар спонсордаабыт буоллахтарына, биһиэхэ спонсор суоҕа. Ас өттүгэр кырыымчык этэ. Ханнык баҕарар спортсмен күрэхтэһэр кэмигэр үчүгэйдик аһыахтаах. Холобур, уһун дистанцияҕа сүүрээччилэр аһылыктара быдан элбэх витаминнаах буолуохтаах. Үчүгэй көрдөрүү итинтэн эмиэ улахан тутулуктаах. 11-С кылааска үөрэнэ сырыттахпына оскуолабытыгар Артур Феофанов кэлэн эрчийбитэ. Онтон саҕалаан

күүскэ дьарыктаммытым. Билигин да кини тренердиир. Быйыл ыытыллыбыт республика чемпионатыгар бастаабытым. Бэйэм сөбүлүүр дистанциябар 1500 километрга сүүрэбин. Бу көрүҥүнэн дьарыктаныан баҕалаахтарга сүбэлиэм этэ, дьарыккытын саҕалаатыгыт да тохтотумаҥ, оччоҕо эрэ үчүгэй ситиһиилэниэххит.

Балаһаны бэлэмнээтилэр: Наташа Ефимова,
Иннокентий Аммосов, Сардаана Баснаева.
1999 сыл