Дьиэ устаары киэһэ Залогка тиийдибит. Мин күнү быһа үөрэнэн, онтон ол кэннэ хас даҕаны аадырыһы кэрийэн, үлтү сылайбыт, аччыкатаабыт киһи, кэнникиннэн отой сэниэм эстэн нэһиилэ саллаҥалыы сылдьабын. Талбаным аһыннар даҕаны, чэ бүгүн бу аадырыска сылдьан баран бүтүөхпүт, тулуй чыычаах, диэн ааттыы-ааттыы илиибиттэн соһо сылдьар.
Чааһынай дьиэ эбит. Хаһаайка, нуучча дьахтара, тахсан дьиэтин киллэрэн көрдөрдө, наһаа үчүгэйдик кэпсэттэ. Сыаната кыра буолан, сөбүлэһэн баран, тахсыы буолла. Талбаным кэнниттэн олбуор устун хааман сукуҥнаан истэхпитинэ, арай, кэннибиттэн ыт ырдьыгыныырын истэ биэрээт хайыһа түүс: ААА!!!! Күтүр улахан хахай саҕа ыт ыстанан эрэр эбит ээ!!!! Бүттэ …
Кырдьык этэбин, бүттэ диэн - отой сүтэн хааллым… Арай, биирдэ өйдөммүтүм калитка аанын уулусса өттүттэн тахсан, ыга баттыахпынан баттаан баран турар эбиппин ээ. Иһирдьэ, олбуор иһигэр, иэдээн айдаан умайыктанара, хабыр хапсыһыы буола турара иһиллэр: Талбаным хаһыыта, ыт маргыара, дьахтар часкыыра - ынырык оргуйуу!!! Ол быыһыгар калитканы арыйа сатаан анньыалаан, тэбиэлээн тилигирэтэллэр, оттон мин буоллаҕына ону маҕыйыахпынан-маҕыйан баран ыгыта баттаан аҕай турар эбиппин. Сотору буолан баран олбуор иһэ дьикти баҕайытык чуумпуран хаалла. Онуоха дьэ өйбөр кэлэн, харахпар барыта хаан-сиин буолбут киһим сиргэ суулла сытар хартыыната көстөн кэллэ… Салыбырыы сылдьар илиибинэн ааны тэлэйэ баттаат, көрбүтүм, Талбаным, сэгэрим сыыһа, ырбайан хаалан баран, тыыннаах! Миигин утары көрөн баран турар эбит! Һууу… Үөрүүбүттэн ытамньыйан ылаат киһим моонньугар хатааста түстэҕим дии )))
Кэргэним кэпсээнинэн: ыт ырдьыгынаабытыгар эргийэ биэрбитэ, арай мин харахпын быччайыахпынан -быччайан, айахпын хаһыытыы иһэр курдук аллаччы атан, ол гынан баран биир да саҥаны таһаарбакка, аттынан киһи итэҕэйиэх суох реактивнай түргэнник сүүрэн тибигирэйэн ааһан хаалбыппын уонна калитка тыаһа “хап” гына сабыллар тыаһа эрэ иһиллэн хаалбыт… Онтон дьэ хабыр хапсыһыы саҕаламмыт ээ!!! Хата илиитигэр мин тобус-толору кинигэлэрдээх, сабыч-чаҥа суумкабын тута сылдьар буолан, онон ытын саайталыы -саайталыы калитканы быыһанар сир курдук санаан өрө мэҥийэн сүүрэн тиийбитэ, аны онтубут аһыллан эрэ бэрт - лигир курдук кытаанах турар үһү. Ытын кытары охсуһа-охсуһа Даринааа!!! Ааны арый арыыый!!! Хаһыы бөҕөтүн түһэрдэҕэ дии, күн сырдыга күндү буоллаҕа… Хантаан ааны анараа өттүттэн анньан турарым биллэр үһү уонна арыйар диэн - суох! . Хата хаһаайка сүүрэн кэлэн ытын нэһиилэ тутан, быыһаабыт. Оттон бэйэлээтэр-бэйэтин ойоҕо ыкка сиэтэ турдаҕым ди. Хайдаҕый?! Дьаабы киһибин батта!!! Уонна маннык киһини ойох оҥостон абыран …

Биллибэт автор